a[Tib 69:4; Jo 15:25]

Psalms 35

Te Devitgo asęani balia po me deli dao.

Te bidigo Godiba gedu haluasa po weyu, te aga tau somainu yai

Genuai Bidi, nago te ena dali
wado yainu elalubo bidi dabeba
te nago wado ilao.
Te ena dali hwįbo bidi dabe dali te nago hwįao.
Nago te hwįbo doado bage,
me te sabele dali selama,
tama nago ena tau sagasao.
Nago te ene me hwą selama,
tama ena te pobeasa bilibo bidi dabe dali hwįao.
Nago te po enabolo wao,
te ena nage tau sabo bidi da wao.

Te bidi dabego ena ela muainu ebao.
Nago te hwįyu, augwali elaluama,
tama augwali hale ilao.
Augwaligo te ena dolabo po mia sali.
Nago augwali pobelama,
tama augwali kone tua pomainu mu yao.
Genuai Bidi, nago enselgo te dwai bidi dabe
sela sąmainu ilao,
te waligo te nosa kakali sela sąbo tiwai yao.
Te nago enselgo te augwali pobeasa pelama,
tama augwaligo sunumi te hulia selama,
tama dwai bedege mu pedalumainu ilao.

Eno dwai sę augwaliba me isiąwai, tiali goli tagalao,
te augwaligo ena dolabo bono
gągą dualali elalubao.
Tama augwaligo ena tulalumainu yabo
tǫ dedage me deli nigai dao.
Tiali goli, te augwaligo konesiąwai sogo,
te augwaligo ena dolomainu te muani bono gągągo,
nago te augwa digi polo dolomainu ilao.
Tama augwa digi augwa te nigali
dedageba tolalumainu yao.

Genuai Bidigo te tama tibaso,
tama te eno wiegi yai homu pemene agaba yaibao.
Te agai ena tau sobaso,
te eno bugai homu agaba yaibao.
10 Tama te eno usu da po mu te Godiba waibao,
“Genuai Bidi, te nage tiwai me deli elalubeo.
Nago te bomo meni yai bidi dabe bugagia tau sabo dao,
tama te bomo mu ebo bidi dabego
augwali dolainu ebo te usu me egobeo.”

11 Te tibo po wabo bidi dabego enaba
te eno isiąwani dwai sę meba po
enaba kisilama wali.
12 Eno wiegi yai kolesaga augwaliba ebadi,
tama augwaligo dwai kolesaga enaba wei ponani.
Tama tibaso, eno haliga sęgę mu yai.
13 Tiali goli, eno augwaliba
te tiwai sę me ebeo. Mu menio.
Te augwali gasi elalubaso, eno homu dene mu elama,
tama eno ugwa dwai gudali.
Eno te nai tubo me habu selali,
tama tego digi enaba sęgę mani.
Tama eno usu da weyu, gedu haluasa po
te nago augwali tau somainu wali.
14 Te eno abagi me ama teba
homu sęgę ebo tiwai yali.
Ena te ida isaide te homu dene eyu,
gela wabo bidi tiwai bilali.
Ena te haliga sęgę mu elama, tama ena te gela weyu,
homu dene dali bidali.
15 Tiali goli, te sęgęgo ena gegebo sogo,
augwali sisinama, te wiegi yai homu pemene yai.
Augwali sisinama, ena elaluainu yali.
Te eno konesiąwani bidi meba,
augwaligo enaba te dwai po
kisilibo sę te toma me nabeo.
16 Augwaligo posobo po umabo mu weyu,
tama enaba sęgę mani.
Augwaligo ena wei me isiąma,
tama augwaligo enade gebo hulia sali.

17 Genuai Bidi, te nisu naga sogo
nago augwali sula tagalogowe?
Nago ena ma siyu,
tama augwaligo ena me dologobeo.
Augwaligo te laiongo ena ela muainu ebo tiwai ebao,
tama ena nago te augwali nogode ma sao.
18 Te nago tama tibaso da,
te eno nageba usu da wabo po
te hauwa we bidi sisinibo tomode te po waibao.
Mu tama, te eno nago nogi te genuai hani
we bidi tomode ugwaba saibao.

19 Te bidi mebago ena dali odolali boi bidi ebao.
Tiyu, augwaligo ena aiyaba elalu,
te kęnę wabo te nago sula me tagaligio.
Augwaligo odolali ena dali dwai homu ebao,
tama tiyu, nago eno sęgęde
te wiegi yai pemene emainu sula me
tagaligio. a 

20 Augwaligo te gasa bidi dabe dali
bugagia bidabo po dwasianu me migobeo.
Augwaligo te bidibo bulude bugagia bidibo bidi dabe
dolabo po weyu ebo dao.
Augwa te wiegi yai bidi dabe tibo po ola mayu,
dolabo po sisinama mibo dao.
21 Augwaligo enaba po kisilama,
te genuai po dągą weyu, te tama po wabo dao,
“Mu tama, dago te nago dwai kolesaga
meba te ebo gedugo sualio,” te po wabo dao.
22 Tiali goli, Genuai Bidi, nago
te bidi dabe augwali sualio.
Tama tiyu, nago pedauwali panialuamuo.
Genuai Bidi, nage enade
te digibulu me bidilamu dao.
23 Nage God, me eno Genuai Bidi,
nage hogodama, te ena tau sagasao.
Nago ena hasegelama,
tama ena tau sabo po hanilama pusao.
24 Genuai Bidi, eno God,
nago te doloba pai kolesaga ebo dao.
Nago ena tau sabo te boi bidi dabego koneama,
eno te doloba pai kolesaga wali pabo da po omainao.
Te ena dolomainu eyu, augwaligo te kęnę wabo te nago
sula me tagaligio.
25 Nago te augwade digi augwa po
mia siyu, te tama po wali,
“Wiegi yai mu da,” te po wabo
nago sula me tagaligio.
“Te dago yainu yali sę, megi da te sę yalio.”
Nago te po augwaligo omainu me igio,
“Dago aga dolali dao.”

26 Augwaligo te enaba pedelali sęgęde
wiegi yai homu pemene yali.
Tama tiyu, nago augwali dwai hale emainu elama,
tama augwaligo homu kone mu tuą pomainao.
Augwa digi augwa nogi ugwaba siyu,
te ena aiyaba elaluainu yali,
tama tiyu, nago augwali
te hale dwai mu emainu elama,
tama augwaligo nogi te aiyaba elaluao.

27 Tiali goli, te gasa bidi dabego
homugo nago ena te doloba pai bidi
nogi emainu homu eyu,
augwa wiegi yai pemene elama i weyu,
tama bugai haliga elama bidimainu emainao.
Sesemane sogo augwa te po omainao,
“Genuai Bidi te polalubo bidi mu da,” waibao,
“agai te aga sę bidi bugagia bidimainu
godolo ebo dao,” omainao.
28 Tama tiyu, te eno nago doloba pai
kolesagade po hanilama weyu,
tama nago nogi tigidali sogo
giligade me, hulide me ugwaba saibao.
Copyright information for `MPS