Psalms 47

Te Kora hani dabego asęani balia po me deli dao.

God te tigidali tǫde we bidigo king bidibao

Dage tigidali we bidi,
te wiegi yai pemene elama, nogo elao.
Dagego wiegi yai pemene ebo i weyu,
tama Godigo nogi ugwaba sabo tęąbi po wao.
Dago te Genuai Bidide wi yao,
aga te Ugwade Mu Bidibo God dao.
Aga te tigidali tǫde we bidi tonalubo polalubo king dao.

Agai te tigidali Israel hani isąwai we
bidi aiyaba elaluama,
tama da Israel bage te augwali daide
ugwadu bidibao.
Agai te gasa hani dabe te da dologode bidimainu ilali.
Godigo digi te tǫ me deli dąį ilama,
tama dabolo mawai dao.
Da te Jekopgo hani da, Godigo da godolo mu eyu,
tama dago te dena tǫde wiegi yai pemene ebo dao.

God te dagaluba pali.
Te Genuai Bidi ugwaba holali sogo,
te we bidi dabe wiegi yai homu pemene elama,
tama bomonama i weyu,
tama biugel bu weyu dali yai.
Ae, tegoba, dago te God nogi ugwaba sabo
tęąbi po hodolama, waiąo.
Dago te tęąbi po hodolama weyu,
tama agaba wiegi yai pemene inao,
aga te dago king dao.
God te king bidiyu, tama tigidali tǫ pedai tonalubao.
Dago te aga nogi ugwaba sabo tęąbi po wao.

God te king bidiyu, te tigidali hani we bidi tonalubao.
God te aga sia kingde dulaluyu,
te aga magi sę meni yai wiegi yai mu bidibo dao.
Te haniani we bidi hanigo te tobolu bidi dabe
augwali te Abrahamgo God
wali pabo we bidi dabe dali sisinama, bidibao.
Godigo bomogo te tigidali ami
dabego bomo aiyaba elalubo dao.
Aga te polalubo king dao.
Copyright information for `MPS