a[Ro 3:13]

Psalms 5

Te Devitgo asęani balia po me deli dao.

Te bidigo gedu haluasa po Godigo aga tonalumainu wali

Genuai Bidi, nago eno gedu haluasa po wabo odao,
tama eno homu hę wabo madi olo muao.
Nage king me eno God da, te nago ena tau somainu,
eno nageba gedu haluasa po obaso,
nago eno i wabo odao.

Genuai Bidi, te tigidali sogo kigamude
nago te eno gedu haluasa po odobo dao.
Te giliga pedalubode eno nageba
bomonama, gedu haluasa po obao,
te ena ofa ebo tiwai.
Tama eno te gedu haluasa po wali
wei ponobo te nageba tonalubo dao.

God, te dolo isiąbo kolesagade
nago te wiegi yai homu pemene me egobeo.
Tama te dwai we bidi te nago augwali gesegobeo.
Nago gedude te hagoma ebo bidi dabe
te dolalumainu me egobeo.
Tama te dwai kolesaga ebo bidi dabe
te nago godolo homu mu me isiąwaibao.
Nago te tigidali tibo po wabo bidi dolobo da.
Tama bidi ela mubo bidi dabe, me te tibo po weyu,
te gasa po dali ugwadu ma daganobo bidi,
te nago godolo homu mu me egobeo.
Tiali goli, nago ena sesemane godolo mu ebo da.
Tama ena te nago be tomoba asabo
usu ebo tiwai yali.
Eno te kidu sugunama, te nageba te nago tedali genuai
lotu be tempel tomode lotu obaso, te usu yaibao.
God, te boi bidi hauwago ena dolainu ebao.
Tama tiyu, nago eno sągą dodolobaso,
teda eno nago doloba pai kolesaga wali paibao.
Awe, te nago homugo ena somainu
homu ebo sunumi te enaba ola mao.

Te eno boi bidi dabego
te mu po dwasianu me wagobeo.
Augwaligo te gasa bidi dolabo homu naga ebao.
Te augwaligo pedauwali te gų page tǫ dedage
dalalubo tiwai elalubao.
Augwaligo te homu bega sabo po hauwade te bidi dabe
dwai madiba kekebo dao. a 

10 God, nago augwali po tų ilama,
tama augwaliba dwai dene mao.
Te augwaligo dwai sę emainu sininama,
te bage augwali dwai madi tula palomainao.
Te augwali nago gesabidide digibulu
sela sąyao, magi baso meni,
augwaligo te nagede hagoma eyu,
tama te dwai sę hauwa ebao.

11 Tiali goli, te nago tonalubo we bidi
augwali tigidali,
augwa wiegi yai homu pemene yao.
Augwa te bugai homu mu elama,
tama te wiegi yai homu pemene ebo
balia sesemane waiyąo.
Nago augwali bugagia sesela sao.
Tama tiyu, te nage wei mu ebo
we bidi dabego nago nogi ugwaba saibao.
12 Genuai Bidi, nago po wali pabo bidi
dabeba te nago wiegi yai nai mayu ebo da.
Awe, nago augwali geme dualiyu,
tama augwali bugagia mu tonalu ebo da,
te bidi te awago te seselaluyu,
te bugagia bidibo tiwai ebo dao.
Copyright information for `MPS