Psalms 50

Godigo te we bidi dabego kolesaga dagalaibao po wai.

Te Tigidali Bomo Elalubo God,
aga te dago Genuai Bidi da,
megi da agai po weyu, tama te giliga pedaluboba,
me te giliga dega siguluboba
usu nama, te tigidali we bidiba i obao.
Agai te tigidali bulu tǫ we bidiba i wabo dao.
God te Saionde bidiyu,
te taun te polalubo taun mu,
tama te gasa sawi yai mu elalubao, tama Godigo ula
te pepeli diliba pedelali.
Dago God aga megi da te asobao.
Tama pedauwali me pania sabeo. Mu menio.
Te tigidali nai dabo sia bogoli
te aga asobodu polasa paibao,
tama genuai wali me, tulubagego me,
aga bagulama, elalubo dao.
Agai te dagalu me tǫ asomainu i olama,
augwali sigo agai te aga we bidi dabego ebo
kolesaga te bugagia dagalobo suagasamainu eyu,
agai augwali si i obao.

Godigo te tama po obao, “Te eno we bidi dabe,
dagego ena dali te bomai po dąų walali,
tama dagego te dąų walali po dąų waliyu,
te kibu hasa dabe ofa yai.
Dage te ena dali deliba sisinagasao,” po wai.
Te dagalugo digi te tama po obao,
“God te doloba pai mu dao.
Aga digi te po tų odobo bidi jas bidibao,” wabo.
Godigo te po wali, “Dage te eno we bidi da, odao.
Eno po elalubao.
Dage Israel dabe, eno dage po tų ilaibao.
Ena naga, ena te God mu da,
tama ena te dagego God dao.
Eno te dagego yali ofade
te eno dageba wado po weyu me wabeo. Menio.
Te sesemane sogo dagego te ofa
te siaba tigidali ulubo te eno suai dao.
Tiali goli, eno te dagego obo tomode
te omai bulmakau, me ma meme omai te dagego
ofade sabo homu ebo meni.
10 Magi baso meni, te tigidali buside bidibo uni hasa,
tama te tigidali bulu dude bidibo bulmakau me,
te tigidali te eno naga dao.
11 Te tigidali ba, me te busi hasa dabe
me, te kala nosa bulude bilibo ba sibi me, te tigidali
eno muai nai naga dao,”
Godigo te po wai.
12 “Ma, te ena nasi ebaso,
te eno dageba po me wagobeo.
Magi baso meni, te tǫ dali, tigidali elalubo nai,
te eno naga dao.
13 Te eno omai bulmakau mi tubo
homu ebawe?
Eno te meme kaneme tubo homu yaiba, agawe? Menio.”

14 “Te dagego enaba usu da mu waiyąo,
tebo te dagego yabo ofa tiwai tama.
Te dagego te enaba olo mabo
tigidali nai maiyabo po wali,
te Ugwadu Bidibo God Mu te enaba dagego maiyąo.
15 Dagego tama tibo si,
tama te sęgę pedalubo sogo, dagego enaba i waiyą,
tama te eno dage tau mu siyu,
tama dagego eno nogi ugwaba sagameo,” po wali.

16 Tiali goli, Godigo te dwai sę ebo
bidi dabeba te tama po wali,
“Magi baso te dagego eno bomai po
tigidali nogibo dawe?
Tama magi baso te dagego eno dąų wali bomai pode
te po mibo dawe?
17 Te eno dage dodolobo te dagego hagela homu eyu,
tama dagego eno po sesemane sela sąbo sę ebo dao.
18 Dagego te nai wi sabo bidi dabe sulama,
tama dage augwa abagi pedelali.
Tama dage te we sabo sę dolama,
tama te penani sę ebo we bidi dabe
dali munasa, biliyu yai.

19 Dagego te dwai po,
me te tibo po sesemane sogo wabo sę ebo dao.
20 Tama dagego te duga ama dabe
po tų ilibo sę eyu,
tama dagego augwaliba te posobo weyu ebo dao.
21 Dagego te tiwai yali,
tama eno po deli me wabeo.
Tama dagego te ena te dage
tiwai tobage da homu yai.
Tiali goli, mu menio.
Megi eno dageba wado po olama,
tama dage te pepeli diliba sela munama,
te po tų ilaibao,” wali.
22 “Te ena tudiba mubo we bidi, dagego odao.
Te dage te tiwai tama bididubaso da,
teda eno dage dolaibao, tama te bidi me deligo dage
ma sainu ebaso, te usu me egobeo.
23 Te enaba usu da weyu, gedu haluasa po weyu,
te enaba ofa mabo tiwai ebo bidi,
agai te eno nogi ugwaba sobao.
Tama eno te po wali pabo bidi dabe
te eno ma dobola saibao,” po wai.
Copyright information for `MPS