Psalms 57

Devit te Solde wi pelama, tama te bulu du odua beba bidigi pai. Te 1 Samuel 22:1, me 24:1-3 tede elalubo po suao. Agai te dabolo kolesaga konemainu ola mayu, te balia asęai dao.

Te bidigo gedu haluasa po weyu, te Godigo aga tau somainu wai

God, nago te homu dene eyu,
tau sabo kolesaga enaba yao.
Magi baso meni, nago ena tonalumainu
eyu, ena nageba asobao.
Ena nage dali bidibaso, te ena bugagia bidibao,
te ba kakaruk wai dabe te aga idago bogo dologode
bugagia geme dualalubo tiwai gilama ebao.
Ena te tiwai tama bididu, te ena dolainu yali nai tigidali
silibo sogoba usu nigi paibao.
Eno te Ugwadu Mu Bidibo Godigo
te ena tau somainu i wabo dao.
Tama agai te ena sǫą pabo nai tigidali mabo dao.
Aga te dagalude bidiyu,
tama agai eno gedu haluasa po wabo odama,
tama ena ma dobola saibao.
Agai te ena dolainu ebo bidi dabe te aiyaba elalueibao.
Godigo te sesemane sogo
ena wei mu eyu, godolo elama,
tama agai ena munu me tagalugobeo. Mu menio.

Te dwai hasa laion tiwai bidi dabe
augwaligo ena bobegelali,
tama augwaligo te we bidi dabe tuainu sisi yali.
Te augwaligo kele te ene me sesemone poa pai mu
tiwai elaluali.
Te augwaligo hamena te bainat hwą poa pai mu
tiwai elaluai dao.

God, nago magi sę me deli te dagalude
te tigidali we bidiba te tiwai ola mao,
naga digi te polalubo bidi mu da olama,
tama nage te augwali daide ugwadu bidibao.
Te nago bomo te tigidali bulu tǫ pedaide
pepeli diliba hanilama, pedalumainu yao.

Te boi bidi dabego ena tola somainu
ebo bono gągą muani.
Tama tiyu, genuai sęgęgo ena aiyaba mu elaluai.
Augwaligo eno sunumide te tǫ dedage dogolama,
teba ena tula mumainu yai.
Tiali goli, ena tula mubeo.
Augwa digi te dedageba ma tulaluali.

God, te eno haligade da,
eno konealubo homu nageba dąų wali.
Awe, eno konealubo homu nageba mu mubao.
Tama tibaso, te eno nago nogi ugwaba
sabo tęąbi po waibao.
Te ena pila mubo tagalama hodaluaibao.
Eno te gita me, kulelego me, te musik waibao.
Te be posa pabode, teda eno te musik waibao.
Genuai Bidi, te eno nageba usu da wabo po
te gasa hani tomode waibao.
Te ena tigidali tǫde bidibo we bidiba pelama,
te nago nogi ugwaba saibao.
10 Magi baso meni, nago da sesemane
godolo ebo umabo mu ebao.
Te dago usu sainu ebaso da, teda te dąį te dagaluba
usu nigi paibao.
Nago da tonaluabo po dąų walama,
tama nago da me tagalubeo.
Te nago da tonalubo sogo tigidali te dago nedebaso da,
teda dąį te dagaluba usu nigiluaibao.
11 God, nago magi sę me deli
te dagalude te tigidali we bidiba te tiwai ola mao,
naga digi te polalubo bidi mu da olama,
tama nage te augwali dąįde ugwadu bidibao.
Te nago bomo te tigidali bulu tǫ pedaide
te pepeli diliba hanilama, pedalumainu ilao.
Copyright information for `MPS