Psalms 58

Te Devitgo asęani balia po me deli dao.

Te Godigo te dwai sę ebo bidi dabeba dwai dene mawainogo eyu, te bidigo gedu haluasa po wai

Dage te tobolu bidi dabe,
dagego te doloba pai po
te po tųde wabo da, agawe?
Te dagego tigidali bidigo po
bugagia dagalubo da homu eba, agawe?
Mu menio. Te dagego homu
te dwai kolesagaba naga kęą pai elalubao.
Tama dagego te tigidali badu
te bidi dabe dolobo sę ebao.

Te dwai sę ebo bidi dabe te
augwa tigidali sogo bilibode
te wiegi yai sunumi tagalali.
Te augwali wąį bǫųde digi gagalali,
te augwa monu dabe eboba usu nigi peyu,
te augwaligo tibo po wabo sę naga yalio.
Te augwaligo wabo po te bidi gąų kelebo hasamanigo
kelede elalubo te bidi isibo nabi tiwai dao.
Augwa olo pania siyu yali, te hasamanigo ebo tiwai,
te aga olo pania selama, te aga po te me odobeo.
Te hasamanigo te kolesaga koneai
bidigo po me odisiąwaibao,
te agai musik wabo sogo te hasamani hodaluama,
tęąbi emainu yai.
Te agai ona elaidu geani,
tama te hasamanigo me odogobeo.
God, nago te dwai bidi dabe dolao.
Genuai Bidi, te augwali
te dolama hwįbo laion tiwai ebao,
tama tialima, nago augwali kele togolama,
tigidali guda sąyao.
Augwali te wę pelama,
tama te tǫde odolali menia siyu,
hagabo tiwai emainao.
Nago augwali agayu, tama te bidigo nosa agalama,
te isibo tiwai gilama emainao.
Eno homugo augwali te ma damubo
tiwai gilama emainao,
moni dwai kukumini emainao.
Tama augwali te wai idago haligade
isibo tiwai emainao.
Nosali idago aga ame nenama,
tama te waigo giliga susiąbo tiwai emainu yao.
Te polo mu tama, Godigo augwali dolaibao,
te bidigo dwasianu ni gelibo tiwai gilama yaibao.
Augwali te bidibo ula elalubadi,
tama Godigo augwalide haliga sębę mu elama,
tama agai augwali te pobele bage
sąbo tiwai gilama ebo dao.
10 Te doloba pai bidi dabego
te Godigo te dwai sę ebo bidi
dabebolo te dwai dene mabo subo si,
te augwali wiegi yai pemene yaibao.
Te doloba pai bidi dabego sągą
te dwai bidi dabego kanemego sągą wę telaibao.
11 Tama gasa bidi dabego te tama po waibao,
“Mu dao, Godigo te doloba pai bidi dabeba
wiegi yai sę wei pona mawai.
Mu tama, God bidibao, tama agai te tigidali bage
te doloba pai po tųgo dagalaibao,” waibao
Copyright information for `MPS