Psalms 59

Polobadu Solgo bidi meba tagala palama, te Devitgo beba tonalugi pai. Augwaligo aga ela muainu yai. Te 1 Samuel 19:11 tede elalubo po suao. Tialima, Devitgo megi te balia asęyu, te dabolo bugagia ola mawai.

Te bidigo gedu haluasa po weyu, te boi bidigo aga me dolidali olama wai

Eno God, nago ena te boi bidi dabego
nogode ma dobola sao.
Nago ena bugagia seselalubaso,
te augwaligo ena me dolisiąwaibao.
Nago ena te dwai bidi dabego
nogode dagala sao.
Tama ena ela muainu ebo bidi dabede
nago ena ma dobola sao.

Augwali suao. Augwali geme dualalu,
te ena ela muainu ebao.
Augwali te dwai hwįbo bidi dabe,
tama augwali sisinama, te ena dali hwįainu ebo dao.
Genuai Bidi, augwali dali eno dwai sę me isiąyu,
tama eno nago bomai pode hagoma me ebeo,
tama eno magi nai me delide magi dwai sę me ebeo.
Tiali goli, augwali asesa pelama,
te ena dali hwįainu pąba bidagasai elaluali.
Genuai Bidi, nage te Tigidali Bomo
Elalubo God dao.
Nago polo tama ena tau sagasao.
Nage te Israel dabego God, te bidi dabe suao.
Nage polo aselama, tama te Israel hani isąwai we bidiba
dwai dene magasobo sę yagasao.
Nago augwalide homu dene me elamuo.
Te bagego wiegi yai kolesaga yaiba po wali,
tiali goli, augwaligo te dwai kolesaga
yabo homu naga elaluai.
Te augwali wei ponobo sę nago mu yao,

Te hulide augwali te genuai hanuba ma aselama,
tama augwali te taun bobegelali obo
sesege badu bagula biliyu,
tama te yowi dabego wabo tiwai i ola bilai.
Odao. Te augwaligo po te dwai mu weyu,
te bainat hwą poa pai mu tiwai yali.
Tiali goli, augwaligo te po wali,
“Dego dago te po odomainu yagawe?”

Tiali goli, Genuai Bidi,
nago augwaliba dwai gisugu mu mabo dao.
Nago te tigidali Israel hani isąwai we
bidi haniba te kęnę po wabo dao.
Nago naga ena dąų waliyu, tama ena tonalubao.
God, ena te nageba naga pelama,
tama ena te boi bidi dabede geme duala sabo dao.
10 Te eno God agai ena wei eyu, godolo mu elama,
tama aga aselama, ena tau sagasali.
Godigo te agai eno boi bidi dabe te
aiyaba elalubo te enabolo sumainu yaibao.
11 God, te nago augwali ela mugio.
Magi baso meni, te eno hani bage augwaligo
te naide homu kone ebo tagalidalio.
Genuai Bidi, nage da tonalubo bidi dao.
Te nago bomogo naga,
nago te boi bidi dabe sela sąnama,
te augwali tedela pomainao.
12 Sesemane sogo augwaligo
te dwai sę yabo po naga weyu ebo dao.
Te augwa hagoma ebo kolesagade
te augwa dolomainu sula tagalao.
Augwaligo te nago nogide po dwai weyu,
tama sesemane sogo tibo po wabo dao.
13 Tama tialima, te nago haliga sębę
augwalide eyu, te augwali elao.
Te dwai sę ebo bidi dabe mu silao.
Nago te tibaso da,
tama te we bidi dabego koneama,
nage te God, nage te da Israel dabego king bidi me,
tama nage te tigidali bulu tǫde
bagego king da olama,
te augwaligo konemainao.

14 Tama hulide te eno boi bidi dabe
te taunba ma aselama,
tama augwali te bagula biliyu,
tama te yowi dabego go wabo tiwai ebo dao.
15 Augwali te yowi tiwai biliyu, te uga peyu, eda asiyu,
te nai gegebo ebao,
tama te augwali haliga pągąsiąbaso,
augwali te i dwai mu weyu ebo dao.
16 Tiali goli, eno te nago genuai
bomode te tęąbi weyu yaibao.
Te tigidali sogo kigamude te eno tęąbi genuai weyu,
te nago ena sesemane sogo godolo ebode
te homu paliyu tiaibao.
Magi baso meni, te haniani sęgę dabe
polobadu enaba pedelali,
tama nago ena bugagia tonalu,
tama nage te eno obo tiwai elalubo dao.
17 God, nage naga te ena seselalubo bidi dao.
Eno te nago nogi ugwaba sabo tęąbi po wainogo ebao.
God, nago ena godolo mu ebao,
tama nage te eno bomai obo elalubao.
Copyright information for `MPS