a[2 Pi 3:8]

Psalms 90

Buku 4

(Tib 90-106)

Godigo po, me bidigo po wai

Genuai Bidi, sesemane sogo nage te dago be
mu tiwai dao.
Te wąį nǫų dabe nage dali bidali,
tama megi da me te tiwai bidibo dao.
Te sesemane bidada peyu, bidada pabo sogo,
nage te God bidibao,
te polobadu me bidali, nosali me bidaibao.
Tigidali bulu du pedalisąbadi,
tama nago te tǫde nai tigidali nigisąbadi,
tiali goli, nage God bidai dao.

Nago te we bidi dabe isimainu elama,
tama augwali te tǫ ma pedalumainu ebo da.
Tama nago te tama po wali,
“Dage tǫde we bidi, dage isilama,
tama te tǫ ma gagawaibao,” wai dao.
Nago homu kone palu,
tama te kibu be 1,000 dąį yabo homu
te deli sogo bubugade tiwai naga elama,
tama te polo tama pela silaibao, te pilama hodalu,
te do bidali sogo tiwai gagawaibao.
Awe, te kibu be 1,000 te hulide pęwadage sogo naga
tiwai ebo dao. a 
Nago te bidi dabe sela sąbo, te wę asiyu, bidi selama,
tama augwali isibo tiwai yaibao.
Augwali te pęwadage sogo bidiyu,
te naa tiwai naga ebao.
Augwali te gesi nosa te kigamu pedalubo tiwai elama,
tama te genuai holama, tama duduli pedelai.
Tiali goli, te piode te sasia pelama, tulalubo dao.

Nago dade wado elalubaso, tama nago da dolobo dao.
Nago dade haliga sębę ebaso, tama da wi mu ebo dao.
Nago dago dwai kolesaga tigidali subo da.
Tama dago geme dualama ebo sęgę tigidali,
te nago pepeli diliba hanilama,
munama, tama nago sualio.

Nago wado ebogo te da tǫde bidibo
bodolu pęwadage ilali.
Mu tama, te dago bidibo sogo polo silali,
te dago mobo deli sogo naga sabo tiwai ebo dao.
10 Da bidibo kibu be te 70 usu naga bidaibao.
Tama dago bomo elalubaso,
da te kibu be 80 usu naga bidaibao.
Tiali goli, te tigidali kibu bede da te sę dene naga eyu,
tama sęgę naga gegaibao.
Te tigidali kibu be polo silama,
tama da me pela silaibao.
11 Dego te nago wado ebo genuai bomo
te bugagia konebawe?
Tama nago augwaliba te wado ebo homu ebode
genuai wi te we bidi augwaliba pedalubo te koneaniwe?
12 Nago da bugagia ola mobaso,
te dago koneaibao,
da te tǫde sesabi elama me bidigobeo.
Tama tiyu, dago wiegi yai kolesaga koneama elaluaibao.

13 Genuai Bidi, nisu naga nago haliga
sębę ebo me elaludaibawe?
Nago naga sę bidi da homu dene yao.
14 Nago da sesemane sogo wei yali,
tama tego te tigidali sogo kigamu
te da pągąnumainu yao.
Tama tiyu, te tigidali sogo da
te bidibo ula dali bidiyu,
dago homu wiegi yai pemene elama,
te bugai haliga yaibao.
15 Hasiabolo nago daba sęgę mawai.
Tialima, megi da, nago da
te wiegi yai pemene yabo usu nao,
te sogo dabe da te sęgę tolali.
Mu tama, hauwa kibu bede
te da dwai bidali, tama nago da
te wiegi yai pemene ilibo
te tigidali kibu bede dwai bidali
usu nama, tama tiwai yao.
16 Nago te naga bomai sę dabe
te naga sę bidi dabolo ola mao.
Nago te wiegi wiegi yai bomo
te dago nosali pedalubo wąį nǫų dabebolo ola mao.
17 Genuai Bidi, nage dago God da, dago homugo
te nago olo tau sabo wiegi yai kolesaga dabolo eyu,
tama da wiegi yai bugagia ilao.
Tama dago ebo sę tigidali te wiegi yai pedalumainu ilao.
Mu tama, nago te dago ebo sę tigidali dąų walama,
tama te bugagia elalumainao.
Copyright information for `MPS