a[Tib 29:1-2]

Psalms 96

God te polalubo king, tama agai tigidali we bidi tonalubao

Dagego gesi balia Genuai Bidiba waiyąo.
Dage tigidali tǫde we bidigo
te Genuai Bidiba balia po waiyąo.
Genuai Bidiba balia wao.
Agai nogi ugwaba sao. Agai da ma sai.
Te tigidali side dago te po te we bidi dabeba pusa maiąo.
Dagego agai genuai nogide po
te tigidali tǫ pedai kantride bidibo
we bidi hani dabe pusiąo.
Te tigidali we bidiba te agai
genuai wiegi yai sę dabe yali po pusa mao.
Genuai Bidigo te genuai nogi elalubao.
Dago agai nogi ugwanu mu sidu geao.
Da te tibo god dabe wi me igio.
Dago te Genuai Bidide naga wi yao.
Magi baso meni, te gasa hani
we bidi dabego tibo god dabe
te augwali tibo god naga dao.
Tiali goli, Genuai Bidigo te dagalu dali,
te ugwadu elalubo nai tigidali nigai dao.
Genuai Bidi te genuai nogi elalu, te king bidibao.
Te aga tedali wiegi yai tempel bede
te tigidali doado bagego te agai bomo dąį ilama,
tama aga gasa sawi yai au te elalubao.

Dage tigidali tǫde bidibo hani we bidi,
dagego agai genuai nogi me bomo te ugwaba sao.
Dagego Genuai Bidigo genuai nogi ugwaba sao.
Te ofa yabo nai me deli selasa,
te agai tempel be tomoba pao.
Dage tigidali we bidi te tedali wiegi yai bidiyu,
tama Genuai Bidiba lotu waiyąo,
tama dage agade noma siąo. a 
10 Dagego te tigidali we bidi haniba te tama po waiyąo,
“Genuai Bidi te king bidibao,” wao.
“Agai te tǫ dąų walama, tama te tǫ bugagia bidiyu,
tama te mumunu me egobeo.
Nosali te Genuai Bidigo po tų eyu,
tama tigidali bidi dolo dagalaibao.”
Te po wao.
11 Dagalu, me tǫ, dage pemene yao.
Tamu ąį, nage dali, te nage tomode bidibo tigidali nai,
dagego kidagalo weyu, i hae waiyąo.
12 Tigidali gi me, dage dali te dagede
elalubo nai tigidali, dage wiegi yai pemene mu iyąo.
Tama te Godigo gedude, te buside tigidali nigo
augwa te wiegi yai pemene ebo balia waibao.
13 Magi baso meni, Genuai Bidi te aselama,
te tigidali tǫ tonaluagasaibao.
Agai te tigidali tǫde we bidi
te doloba pai kolesagade tonaluaibao.
Tama agai augwali te mu pogo naga dagalaibao.
Copyright information for `MPS