a[Sai 20:11; Bom 32:40; Dan 12:7; Amo 3:7]
b[Ese 2-8-3:3]

Revelation of John 10

Ensel mobo bidi agai buku Jonbolo mayu, nago tuao po wai

Te eno suali, gasa bomo mu yai ensel mobo bidi dagaludu e tǫba dulubo eno suali. Aga tigi te dagalu pǫgo halua sai, te gudubo ugwa tiwai. Tama agai tobolude unigi bidi elaluai. Agai gesabidi te giliga ge ula ebo tiwai yai, tama agai sągą te ni tigide tigidali sia dabo tiwai yai. Tama agai nogode dwasianu buku tolaluai, tama te buku dagawai elaluai. Tama aga dolo sągą te tamu ąį daide muai elaluali, tama aga pobase sągą te tǫ daiba ugwadu munama elaluai. Tama agai i bomonama weyu, te bulude bidibo moni hudigi ebo kibu nogi laiongo gaa moni bage wabo tiwai yai. Agai te i wabode, tama a naga olama me badu nogo si te dagalu pǫ kulu weyu wei ponai. Tama te a naga olama me badu nogo si be kulu po wai digi, tama te po eno asęainogo yai. Tiali goli dagaludu po me deli asiyu wali po eno odali, “Te a naga olama me badu nogo si te be kulu weyu wali po, te po naga homude dąų elaluama, tama tede dualali po elalumainao. Nago te po asęgio,” te po wai.

Tama te ensel mobo bidi tamadi eno te tamu ąį de tǫ si tede dolalubo suali, agai dolo nogo dagaluba ugwaba muai, agai wabo po dąų omainogo, tama agai Godigo nogi weyu, te eno mu po naga obao homu eyu agai po wai. Te God aga sesemane sogo bidada peyu, bidada pabo bidi agai te dagalu dali tede elalubo nai nigali, te tǫ dali tigidali e tǫde elalubo nai nigai, tama tamu ąį me te tigidali tede elalubo nai me nigali bidi dao. Tama te ensel mobo bidigo aga nogo ugwaba munama, tama Godigo nogi weyu tama agai te po wai, “Megi me gesege iligobeo. Menio. Tama nosali te nogo a naga olama me badu nogo si wali te ensel mobo bidi me deligo agai te ona tiwai nai elebadi, te sogo te Godigo homude polobadu dualali nosali yabo sę te hania pedalama, tama agai te sę yaibao. Polobadu agai aga sę ebo bidi augwalibolo te aga nosali yabo sę po pusali, tama augwaligo koneani, te sę hania pedalaibao,” te ensel mobo bidigo te po wai. a 

Tama te eno polobadu dagaludu po me deli asiyu wali po odali tiwai, agai enabolo te po ma wali, “Te dagawai elaluali buku te tamu ąįde me te tǫde dali me te dolalubo ensel mobo bidigo nogode tolalubo buku nage pelama sigi pao,” te po wali.

Te po obaso, ena te ensel bidi pageba pelama, tama eno agabolo te po wali, “Nago te dwasianu buku ena mao.” Tama agai enabolo te po weyu “Nago te buku selama tuao,” wali. “Te nago haligade ha yaibao. Tiali goli nago pedauwalide te mege ąį pusu ebo tiwai yaibao,” te po wali.

10 Agai te po wai digi, tama eno te dwasianu buku te ensel mobo bidigo nogode selama, tama eno tuai. Tama eno pedauwalide te mege ąį pusu tiwai yai. Tama eno tuai digi te eno haligade ha yai. b  11 Tama agai enabolo te po wai, “Nago te Godigo yabo sę po ma pusao. Te po te hauwa bulu tǫde bidibo hanide me, te haniani tigiwali yai me, te haniani po wabo bulu bidi dabe me, tama te tǫde tuni bidi hauwade me, augwali tigidalide nago te nosali pedalabo sę po pusao,” agai enabolo te po wai.

Copyright information for `MPS