a[Gag 2:9; Ped 22:2]
b[Nam 22:5, 7; 31:16; Bom 23:4]
c[Sai 16:14-15; 16:33-34; Jo 6:48-50]
d[1 Kin 16:31; 2 Kin 9:22, 30]
e[Tib 2:8-9]

Revelation of John 2

Efesus buluba Godigo po odobo we bidibolo asęai po

Te bidigo enabolo e po me wai, “Te hasia Efesus hanude Godigo po odoyu bidibo we bidi tonalubo ensel mobo bidibolo e po asęna tolao: eno dolo nogogo te hǫ a naga olama me badu si eno tolaluyu, tama ena te a naga olama me badu nogo si te lam sole tomode bilibo bidi dao. Tama tiyu, eno e po nage dali obao: Te nago ebo kolesaga tigidali eno koneani, te nage sę dene ebo dao. Te me eno koneai, nage bomo elama sęgę bugagia tolama dolaluyu, tama nago te dwai sę ebo bidi dabe augwali hagela mu yai. Te bidi dabe augwaligo nagebolo te po wai, ‘Da me te Jisasgo sę ebo bidi dabe dao’ wai. Tiali goli te menio, augwali te Jisasgo sę ebo bidi dabe menio. Tama nago augwaligo wabo po osola suai dao, tama nago augwaligo ebo kolesaga page gegelama koneai, tama augwali te ili po naga wabo bidi dabe dao. Nago tama yali augwali osola suali sę eno koneai. Tama te bidi dabe augwaligo nage suali, te nage ena wali bilibo dao, tama augwaligo nage dali dwai sę yali dao. Tiali goli nago bomo elama dolaluyu, te dwai sę nage dali eyu sęgę mabo nago bugagia tolalubo dao. Te nago tigi dene ebo hagela ebeo. Nago te sę ebo te eno konebo dao. Tiali goli, eno po me nage dali elalubao: polobadu nago enaba te konealubo po hasia dąų wali sogo, te sogo nago wiegi yai homu ena dali mu yai, tialima megi nago ena dali te hasia dwagi yai homu eyu godolo yali tiwai ebo menio. Tama polobadu nago dwagi yai kolesaga yai, tialima nago te kolesaga tagaliyu tama nage tulaluai dao. Tama nago te polobadu yali kolesaga ma homugo koneyu, tama nage homu begeleyu, te hasia yali wiegi yai kolesaga ma yao. Nago te sę esiąyu, tama nage homu begelesiąyu da, te ena nage pageba pedalaibao, tama eno nago te lam sole elaluali ena ma sagasaibao, aga nage dali me elalugobeo. Tialima te kolesaga me nago eyu tama te dolo dao: nago te bidi Nikolas hanigo ebo dwai dwai kolesaga dali boi bidi homu ebo dao. Eno me, eno augwaligo ebo kolesaga dali boi bidi homu ebo dao.”

“Te olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elaluyu da, te bidibolo eno aga usu da weyu, tama agai te bidi bidibo ula mabo ni du sela tumainao waibao. Tama te bidi bidibo ula maiabo ni te God aga gide elalubo dao.’” a 

Smerna buluba Godigo po odobo we bidibolo asęai po

Te bidigo enabolo po me wai, “Te Efesus hanuba u po asęna tolama, tama megi Smerna hanude Godigo po odoyu bidibo we bidi tonalubo ensel mobo bidibolo e po asęna tolao: ena da, ena digi te hasia bididuali bidi dao, ena te nosali sogo mu bididuabo bidi mu dao. Tama polobadu ena isai, tiali goli ena ma hodaluama, megi me bidibao. Tama eno e po nagebolo ola tolobao. Eno koneani, nago te sęgę te gasa bidi dabego nogode siyu dene dali ebo, tama tiyu nage magi nai meni yai mu bidibo te eno koneai. Tiali goli nage nai meni yai bidi mu menio, te God dali nage nai umabo elalubo bidi dao. Tama bidi meba augwaligo dagebolo posobo po wabo, te eno koneai. Tama te posobo po wabo bidi dabe augwaligo te po wabo dao, ‘Da Juda bage dao.’ Tiali goli augwali te tigide naga te Juda bage dao wabo, tama augwaligo ebo kolesagade augwali te Juda bage mu menio. Augwali te Satango hani dao. 10 Tama nosali gana gasa bagego dagebolo dene mawaibao. Tiali goli dage te dene sabo sęde wi egio. E po odao. Satango dage meba kalabus iliyu, te dage agai poba asobowe suainogo usu siyu tiaibao. Tama dage te dwai sę ebogo sęgę me dene dali te nogo si sogo usu nama saibao. Gasa bidi augwaligo dage dali te dwai sę eyu, tama augwaligo dage ela mubo sę me eyu da, teda dage enade homu kęą pai bidi dabe bidiyu da, eno dagebolo wiegi yai nai mu mawaibao, te bidada peyu, bidada pabo ula dagebolo mu mawaibao.”

11 “Olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elaluyu da, te si sogo isibogo te bidi munu me dologobeo. Mu menio.’”

Pergamum buluba Godigo po odobo we bidibolo asęai po

12 Te bidigo enabolo po me ma wai, “Te megi nago te Pergamum bulude Godigo po odoyu bidibo we bidi tonalubo ensel mobo bidibolo e po asęna tolao: ena da, ena te si dali si badu poa pai bobage ge hwą ge elalubo bidi dao. Tama eno e po nagebolo ola tolobao. 13 Nago bidibo bulu eno koneai dao. Te bulude te dwai mobo bidi Satan agai we bidi hauwa tonaluyu te tuni bidi bidibao. Tiali goli, nago eno nogi bomo elama tolaluyu, tama enade homu kęą pai bidi bidibao. Tama nago te enade konealubo po hogwa sabeo. Tama tiyu, polobadu te bidi me nogi Antipas, te eno po te we bidibolo pusali bidi, te bidi dage dali bidai. Tama agai eno po wali mu pai dao. Tama augwaligo dage tomode te bidi ela muai, te Satan bidibo bulude. Tama te sogo me te dagego eno nogi dualobeo. 14 Tiali goli eno po meba nage dali elalubao. Nage dali bidibo bidi meba, augwaligo te bidi Balamgo kolesaga wali pabo dao. Tama te Balamgo kolesaga e dao. Polobadu bidibadi agai te tuni bidi nogi Balak agabolo te Israel dabe gea gano bilabo kolesaga ola mawai. Tama ola menama, tama Balakgo te Israel we bidi homu hodolama, tama augwaligo te tibo god dabebolo ula mani nai tuyu, tama augwaligo te penani ebo kolesaga emainogo yai. b  15 Tama nage dali me, te bidi meba bidibo bage, augwaligo te bidi Nikolas hanigo ola mabo po wali pabo dao. 16 Tama tibaso, tede ge neyu nage homu begelao. Tama nago homu begelesiąyu da, teda tamadi tama ena nage pageba pedalaibao, tama eno te pedauwalide elalubo poa pai ge hwą gego te dwai sę ebo bidi dabe augwali dali hwįaibao.”

17 “Olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elalubo bidi, te bidibolo eno megi geme dulalubo tubo nai nogi mana meba mayu, tama eno te tedela yai dwasianu masigi me agabolo mawaibao. Tama te masigide gesi nogi asęai, tama niwai bidi mego te nogi konegobeo. Te masigi sali bidi, aga naga te nogi koneaibao.’” c 

Taiataira buluba Godigo po odobo we bidibolo asęai po

18 Te bidigo enabolo po me ma wai, “Te megi nago te Taiataira bulude Godigo po odoyu bidibo we bidi tonalubo ensel mobo bidibolo e po asęna tolao: ena Godigo Ogwa dao, tama eno gedu te sia bogoli sesena pai bomonama dabo tiwai, tama eno sągą te kapa meda meni yai eyu te gegemani ebo tiwai ebo. Tama eno e po nagebolo ola tolobao. 19 Nago ebo kolesaga tigidali eno koneai. Tama eno koneani, nago te bidi dabe augwali dali dwagi yai homu elama tama godolo mu eyu, tama nago homu enade kęą peyu, tama nago tigidali bidi dabe tau sabo sę ebo dao. Eno koneani, tigidali sęgę nageba pedalobode te nage bomo elama te sęgę bugagia tolobo dao. Tama eno koneani, te tiwai kolesaga hasia nago yai, te wiegi yai, tama megi nago te nosali ebo kolesaga te dwagi yai mu me ela pabo dao. 20 Tiali goli, eno te po me nage dali elalubao. Nago te we Jesebel nage dali bidibo we, agai ola mabo po dagego odobo dao. Te wego te po wabo dao, ‘Ena da, te Godigo nosali yabo sę po megi pusubo we dao.’ Tiali goli agai eno sę bidi dabebolo te penani ebo kolesaga wali pomainogo ola mayu, tama augwaligo te tibo god dabebolo ula mani nai tumainogo ebo dao. Te kolesagade te wego augwali ili po ola mabo dao. d  21 Eno homugo aga homu begelemainogo, tama eno aga osogo sula tagaliyu bidimainogo yai. Tiali goli menio. Aga te homu begelebo te homu esiąyu, te penani ebo kolesaga tagalama tudiba muabo te homu menio. 22 Tama tibaso, suao, te eno dene dali, genuai gasi dali te webolo mawaibao. Tama aga dali te penani yali bidi dabe, augwaligo homu begelesiąyu, tama aga dali yali dwai kolesaga tudiba musiąyu da, teda eno augwalibolo me te genuai dene dali sęgę dali mawaibao. 23 Tama agai wai dabe me, te eno augwali mu ela silaibao. Tama tiyu, te Godigo po odobo we bidi tigidali augwaligo koneaibao, te ena da, te tigidali bidigo homu kolesaga osola subo bidi dao. Tama dage deli delibolo eno dagego yali kolesaga dolo si wei ponaibao.”

24 “Tiali goli megi eno e wabo po dage te gasa Taiataira bulude bidibo we bidi dali obao. Dagego te we Jesebelgo dwai tibo po wali pisąwani. Tama augwaligo agai pode te po wabo dao, ‘Te kolesaga da, te Satango ebo kolesaga page mu dao, te bidi hauwago konesiąbo po dao.’ Tama augwaligo te po dagebolo wai digi, dagego te dwai po wali pabo menio. Awe, te usu dao. Eno dagebolo te po obao, dagebolo eno gasa sęgę mabo sę me mugobeo. 25 E sę naga yao: dagego megi ebo wiegi yai kolesaga bomo elama tolalua peyu, tama ena ma asobo sogo bugagia tonaluao. 26 Tama niwai bidi agai te dwai kolesaga ebo aiyaba elalubo bidi, te bidi agai te eno kolesaga wali peyu, aga te bodolu muani sogo siligibu, tama te bidi agabolo te eno te nogi dali bomo dali si menama, tama aga te we bidi haniani tǫde bidibo bage augwali tonalubo tobolu bidi bidimainao. 27 Te sę eno agabolo mawaibao, te eno Ayago agai ena te we bidi tonalubo sę mani sę tiwai dao. Tama te bidi agai te ain dono tulama, augwali bomogo tonaluaibao. Tama te tǫgo nigai sini te bidi mego donogo elebadi te dwasianu pebeda pabo tiwai, te bidigo haniani tǫde bidibo we bidi augwali aga bomogo tonaluaibao. e  28 Tama eno agabolo te kigamu mu dagalude pedalobo te genuai hǫ, te me agabolo mawaibao.”

29 “Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao.”

Copyright information for `MPS