a[Amo 9:1]
b[Jer 9:15]
c[Ais 13:10; Ese 32:7; Jol 2:10, 31; 3:15]

Revelation of John 8

Te kibu sipsip waigo te buku dąų wali nai me badu nogo si wali me deli togwa sąwani

Te kibu sipsip wai agai te buku dąų wali nai me badu nogo si te me deli togwa sąwai, tama tibo si dagalude kili kili me wasiąyu, tama me po me wabe, tama hauwa sogo bidibo ąǫ yali, te sesabinu gana bidalio, te hap aua tama dao. Tama te dwasianu sagia sai elalu bidali sogo silama, tama nosali eno te God gesabidide dolalubo ensel mobo bidi a naga olama me badu nogo si eno suali, tama augwaligo te ona tiwai nai a naga olama me badu nogo si selama tolaluai.

Tama gasa ensel mobo bidi me te Godibolo nai ulubo sae yali pąba dolagasai. Tama agai te denami ilabo nai te kapa golgo nigai pou tolaluai. Tama augwaligo agabolo te denami ebo nai pauda hauwa mani, te agai te nai te Godigo we bidi tigidaligo wali gedu haluasa po dali manama, tama te si te golgo nigai saede te siago ulumainogo tiaibao. Te sae te genuai tuni bidi duabo nai gesabidide elalubo, tama te denami ebo pauda dali te gedu haluasa po dali agai te duabo naide dulalubo bidibolo olo mawaibao. a  Tama te pauda hano ebo denami ebo me, tama te Godigo we bidi augwaligo gedu haluasa po wabo te me, te tigidali te ensel mobo bidigo nogode tolaluali tagaliyu, tama God gesabidiba naga ugwaba te denami ebo hano holai. Tama tilama, te ensel mobo bidi agai te denami yai nai muani pou selama, tama agai te nai ulali saide sia dage te poude pągąnama, tama agai te sia tǫba aiya sąwai. Agai te sia sąwai digi, tama te dagalude be kulu kulu weyu, genuai po me weyu, tama dagalude be sele eyu, tama tǫ mali yai.

Ensel mobo bidi me si me si augwaligo te ona tiwai nai elali po

Tama te sogo te ensel mobo bidi a naga olama me badu si augwaligo te ona tiwai nai a naga olama me badu nogo si tolaluali, augwaligo te ona tiwai nai elainogo sisi elaluai. Tama te hasia wali ensel mobo bidi me deli aga te ona tiwai nai elali, tama te talua ge tulubage me, te sia dali, te si te kaneme dali gelama, tama e tǫba tulaluai. Augwaligo te tǫ me tigidali ni dabe dali te sela tama usu siyu dąį ilali, tama siago te tǫ me habu badu deyu, te ni me badu habu badu deyu yali. Tama te ni yabe tiwai nosai dabe tigidali, te me te siago dai.

Tama te hasia wali enselgo aga sę silama, tama te si wali ensel mobo bidi aga te ona tiwai nai elali, tama tialima, augwaligo magi nai me deli sąyu tama te genuai bulu du me siago dabo tiwai eyu, tama te nai tamu ąįba tulaluali. Tama augwaligo tamu ąį usu siyu dąį mubo te sela nigilali, tama me habu badu begelama te kaneme pedalali. Tama augwaligo te tamu ąįde bidibo ula elalubo nai tigidali tomode bugulama, tama te nai hani sela me tali muani, tama te nai hani me deli te sia dabo genuai bulu dugo isilali. Tama augwaligo te tamu ąįde elalubo sip, te moni geba dabe, te sip me bugulama tama tiyu, te hani sela tedali muani, tama te sip hani me deli dolai.

10 Tama te tudi badu te sela wali ensel mobo bidi aga te ona tiwai nai elali, tama te badi, te genuai hǫ me deli te sole ula ebo tiwai mu yali, te sole ula ebo hǫ dagalu tagalama e tǫba tulaluai. Augwaligo te tigidali pabo ąį aga hani sela tedali bugulali, tama hǫ te ąį hani me deliba tulaluali, tama te tigidali ąį ulu asobo digi me te sia bogoli tulaluali. 11 Tama te tulaluali hǫ nogi te Ha Ebo Marasin da wai. Tama augwaligo te ąįgo hani sela muani, tama te ąį hani me delide te ha ebo marasin pedalai. Tama bidi hauwa augwaligo te ha ebo marasin ąį tuali, tama te marasingo augwali elama tama augwali isali. b 

12 Tama te sę silama, tama te me si me si wali ensel mobo bidi aga te ona tiwai nai elali, tama tebadi, tama augwaligo te giliga me, poluade me, te tigidali hǫde me augwaligo tomode dąį sela muani. Tama te giliga ge me badu dolali, te polua me tama tiyu, te tigidali hǫ me te me badu dolali. Tama tibaso, augwaligo ula ebo sogode te ula bugagia ebeo. Ulade te me badu pedaigo te giliga gego ula bugagia ebeo. Tama hulide me te polua dali, hǫ dabe dali, augwaligo me badu ula ebo pedai te bugagia ula ebeo. c 

13 Tama eno suali, te ba kemodage tiwai ba me deli dagalu tomodu sigide bola pabo eno suali. Tama eno odali, agai i bomonama weyu te po wali, “Hobede, hobedeo, te tǫde bidibo we bidi hobedagia bidaibao. Te gasa ensel mobo bidi me sela augwaligo te ona tiwai nai elebo si, tebode te genuai dwai dwai sęgę te tǫde we bidi augwaliba pedalaibao,” te bago te po wai.

Copyright information for `MPS