Romans 16

Polgo we bidi hauwabolo siade da po ola tolali

Eno homugo te dago abe Fibi aga dage bidiboba sabalobo si dagego aga selama, tama agabolo wiegi yai sę bugagia yao. Agai te ede Senkria bulude Godigo po odobo we bidi tau sabo sę ebo dao. Eno homugo dagego homu Genuai Bidiba koneama, tama dagego te we Fibi selama, te dage Godigo po odobo we bidi dali bidimai homu yao. Te wiegi yai kolesaga da Godigo we bidigo ebo kolesaga dao. Tama Fibi aga magi nai me deli meni baso da, teda dagego aga tau sao. Magi baso meni, agai abagi homu eyu tama we bidi hauwa tau sai, tama agai ena me tau sai dao.

Dagego eno siade da po wali te we Prisilade, aga bidi Akwila sibolo mao, augwali si te Krais Jisasde ena dali deli sę ebo dao. Te augwali sigo ena isidali weyu ena tau siyu isabo sisi yai elaluali. Tama eno naga eno gedu haluasa po augwali side weyu Godibolo usu da po me wabeo. Menio. Te Godigo po odobo gasa hani dabe tigidali augwaligo me te gedu haluasa po weyu, te Prisila dali Akwila dali side Godibolo puba hwi wabo dao. Tama eno siade da wali po dagego te augwali sigo beba sisinibo te Godigo po odobo we bidibolo te po wao.

Dagego eno siade da wali po te bidi Epainetus agabolo mao, eno abagi mu dao. Te moni tǫ Esiade te tigidali we bidi augwaligo augwa homu Kraisba musiąbadi te agai polasa aga Godigo po wali pabo bidi hasia pedalai.
Dagego eno siade da wabo po te we Mariabolo wao. Agai te sę dene hauwa elama dage tau sai. Te eno siade da wali po dagego te bidi si Andronikus dali Junias sibolo wao. Augwali si eno Juda hani deli tama ena dali me sogo polobadu kalabuside bidai dao. Augwali si te Godigo po sela pabo bidi augwali tomode nogi elalubao, tama augwali si ena dali polama Kraisde wadolama bidai.

Dagego eno siade da wali po te bidi nogi Ampliatusbolo mao. Da si te Genuai Bidiba wadolama tama aga eno abagi mu bidibao. Dagego eno te siade da wali po te bidi Urbanus agabolo wao, aga da dali te Kraisde deli sę ebao. Tama siade da po te bidi Stakisbolo me wao, aga eno abagi mu dao. 10 Dagego eno siade da wali po te Apelesbolo wao, aga da te aga Kraisde homu kęą pai kolesaga augwaligo usu selama tama usu da wai nogi bidi dao. Dagego eno siade da wali po te bidi Aristobulus dali deli bede bidibo bage augwalibolo wao. 11 Te eno siade da wali po te bidi Herodionbolo dagego waiyąo, aga te ena dali Juda hani deli dao. Te eno siade da wali po te Genuai Bidide wadolali we bidi augwali te bidi Narsisusgo bede bidibo bagebolo dagego te po augwalibolo waiyąo.

12 Dagego eno siade da wali po te we ama name si Trifina dali Trifosa sibolo wao, augwali si te Genuai Bidigo sę ebo dao. Te eno siade da wali po te we nogi Persisbolo wao, eno abagi mu dao. Agai sę dene hauwa Genuai Bidide yai dao. 13 Eno siade da wali po dagego te Rufusbolo waiyąo. Aga te Genuai Bidi wali pabo wiegi yai bidi dao. Eno siade da wali po agai idabolo me wao. Te we te enade te aga eno ogwa tiwai dao homu eyu, tama agai enade dwagi yai sę ebo dao. 14 Eno siade da wali po te Asinkritusbolo me, Flegon, Hermes, Patrobas, Hermas me, te bidi dabebolo dagego te po waiyąo, tama augwali dali bidalubo ama dedebolo me wao. 15 Dagego eno siade da wali po te Filologus dali aga we Julia sibolo me, tama te bidi Nereus dali aga abe dali sibolo weyu, tama te bidi Olimpasbolo me, tama augwali dali bidibo Godigo we bidi tigidali augwalibolo te po waiyąo.

16 Te Godigo we bidi dago ebo kolesaga te tiwai eyu, tama abagi homu eyu, duga hasi dage tigidali deli deligo te ama dede augwali pageiąo. Te Kraisgo po odobo hani tigidali augwaligo siade da po dagebolo ola tolobao.

Bidi mebago Kraisgo hani we bidi tomode pedebo po

17 Ama dedeo, te we bidi hani pedebo kolesaga ebo bidi dabe, te bagede dagego bugagia suao, dua dao. Te dagego Kraisde polobadu odali ola mabo po, te po augwaligo sela sąwainogo eyu, tama augwaligo we bidi dwai sę ebo kolesaga tomoba kegebo dao. Te tobage we bidi dagego tagalao, augwali tudiba mu muao. 18 Magi baso meni, te tobage bidi dabe augwaligo te dago Genuai Bidi Kraisde sę me ebeo. Menio. Te augwaligo augwa tigigo digi ebo kolesaga naga wali pabo dao. Tama pusu ebo po me tama te bidi homu begasa pabo tibo pogo augwaligo te dwai sęde konesiąbo we bidi dabe homuba tibo po ola menama, tama te bidi dabe augwaligo homugo te dwai kolesaga da homu me isąwaibao. 19 Dagego Godigo po bugagia wali pabo kolesaga po, te tigidali bidi dabe augwaligo odalio. Tama tibaso, eno wiegi yai homu pemene dagede ebao. Tiali goli eno homugo dagego te wiegi yai doloba pai kolesagade bugagia gisiga koneao. Me ma, te dwai kolesagade eno homugo dage te tobage kolesaga isąyabo homu mu yao. 20 Tama tiyu da, teda God da, aga te wiegi yai homu nagame ebo page bidi, dwasianu sogo tama silama, tama agai te Satan dagego sągą dologoba munama agawaibao. Te eno homugo te dago Genuai Bidi Jisas Kraisgo da olo mu tau sali wiegi yai kolesaga dage dali bidao.

Bidi meba augwaligo Rom dabebolo siade da po ola tolai

21 Ena dali deli sę ebo bidi, Timoti, agai siade da wabo po dagebolo ola tolobao. Tama Lusius me, Jeson me, Sosipater me, eno Juda hani deli bage, augwaligo me siade da wabo po dagebolo ola tolobao.

22 Ena Tertius, te eno Polgo pedauwalide po selama tama eno e pas eno nogogo asęai. Te Genuai Bidigo nogide eno siade da wabo po dagebolo obao.

23 Te bidi nogi Gaius agai siade da po dagebolo ola tolobao. Agai ena Pol bugagia agai bede tonaluyu nai gesali. Aga beba te Kraisgo po odobo we bidi augwali deliba sisinibo dao. Erastus, aga e hanude te gavmanigo kuskus sę ebo masigi tonalubo bidi, tama dago ama Kwartus, te augwali sigo siade da po dagebolo ola tolobao.

24 [Te dago Genuai Bidi Jisas Kraisgo da olo mu tau mani wiegi yai kolesaga te dage tigidali dali bidao. Mu dao.]

Dago God nogi ugwaba sao

25 Dago Godigo nogi ugwaba mu sinao. Eno aga gesi wiegi yai po pusubogia tama God agai dage te Kraisde homu kęą pai we bidi mu dąų wabo usu yaibao. Te wiegi yai gesi po te Jisas Kraisde elalubao. Tama polobadu tigidali sogo te po te geme dualali po geme dualaluali, 26 tiali goli megi Godigo te po hania hanilai dao. Godigo po pusali bidi profet dabego te geme dualali po polobadu asęani. Tama megi te sesemane sogo bidibo Godigo agai te augwalibolo te po pusao po olama, tama agai po sela pabo bidi dabe augwaligo te tigidali tǫde bidibo we bidibolo pusugi peyu, tama augwalibolo hania ola mabo sę megi ebo dao, te tigidali we bidi agaba konealubo po dąų olama tama agai kolesaga wali pomainogo ebao.

27 Te God agaduba deligo naga mu koneai elalubao, dago te Jisas Kraisde sesemane bidada pabo sogo aga nogi ugwaba sao. Mu dao. Eno po tama dao. Ena Pol da.

Copyright information for `MPS