a[Bom 25:9]
b[Bom 25:5-6]
c[Gag 29:31]
e[Gag 38:27-30]

Ruth 4

Boasgo Rut sali

Tialima, Boas te hanuba pelama, te po mibo madi pali, tama aga tede dulaluali. Tama gesege gana isiąbadi, te sogo agai suali, te gasa bidi me te Elimelek aga deli hani asobo sualio. Tama Boasgo aga i olama, “Ae, ama, nage aselama, eba duayagasao. Eno dwasianu po elalubao.” Tama Boasgo te bulude bidibo tobolu bidi dabe nogo si bidi selama, tama augwalibolo agai te po wai, “Dage eba aselama, duayagasao.” Tama augwali aselama, duayagasalio. Tama Boasgo aga deli hani bidibolo te po wali, “Naomi te Moap tǫde bidigi pali tagalama, eba ma asalio. Agai homugo bidi me deligo da sigo deli hani bidi Elimelekgo tǫ abelama, tama tonalumainogo homu yai. Tama gasa hani bidigo te tǫ abelai dao. Tama eno te po nagebolo wainogo ebao. Ma, nago te homu ebaso da, teda nago te we Naomi tau siyu, tama te tǫ te tobolu bidi dabe dali te megi e bidalubo bidi gedude te tǫ nago ma dobola siyu, abelao. Te tǫ ma dobola sabo sęde, te nage tobolu bidi dao, te ena da te tudi badu bidi dao. Ma, nage sogobe da homu eyu da, teda nago enabolo te po wao.” Boasgo te po wali.

Te bidigo te po wai, “Te eno saibao,” wali.

Tialima, Boasgo agabolo te po wai, “Nago te Naomigo tǫ ma dobola saiba homu eba wida, teda nago te Moap bulu we Rut, te nago aga me sao. Tama eyu da, te tǫ te isali bage aga hanigo tǫ ma elaluaibao,” wali.

Tiali goli, te bidigo te po wai, “Te mu tama, te tǫ ma dobola sabo sę te eno sę dao. Tiali goli, eno te we Rut selama, tama agai wai ame nobaso, eno te ena doado bage te wai dali, te eno megi elalubo wai dabe dali, augwali tigidaliba dobabo, te tiwai sę ebo te eno hagela ebo dao. Eno te tǫ me ma dobola selama, tonalugobeo. Tama megi te nai te naga nai dao,” Boasbolo te po wai.

Te polobadu te Israel bidi dabe augwaligo abelai nai dabe te po dodolainogo da, ma augwaligo nai dobu si yai madi yaibaso da, augwaligo te tiwai kolesaga yai: bidi mego sągą nadoba me deli pedelama, tama gasa bidibolo mawaibao. Te Israel dabe augwaligo po dodolainogo tama iduai dao. Tialima, te bidigo Boasbolo te po wai, “Naga digi naga te tǫ selama, tonaluao,” tama agai sągą nadoba pedelama, Boasbolo manio. a 

Te bidigo sągą nadoba pedelama, Boasbolo mabode, tama Boasgo te tobolu bidi dabebolo, me te we bidi augwalibolo te tiwai po wali, “Dage tigidaligo suao. Hasia Naomigo te Elimelek badi, Kilion me Malon, augwaligo nai tigidali te Naomigo tonalualio. Tiali goli, megi te nai tigidali sabo sę eno yai dao. 10 Tama nai me deli digi elalubo. Eno Rut selama, tama megi te eno we dao. Te Moap bulu we Malongo sai, tama Malon isiyu, aga taga pai. Eno te Rut selama, tama Malongo tǫ te aga hanide dolo elaluaibao. Tama te isali bidi aga page bulu, te aga deli hanigo aga nogi sesemane sogo konealumainogo yaibao. Megi dagego sulama, tama dagego te sę ebo koneani dao,” te po wai. b 

11 Tama tigidali bidigo te po wai, “Awe, dago sulama, tama dago koneanio.” Tama tobolu bidi dabego te po wai, “Te we megi nago beba asobo we, dago homugo Genuai Bidigo agabolo wiegi yai sę emainogo, tama aga te Resel de Lea si tiwai pedalomainogo, te Israel dabego wai hauwa ame nani we, augwaligo auwa we si dao. Tama naga digi nage te nai hauwa elalubo genuai bidi nigilama, te Efratago hanide te Juda hani me dedeli, tama naga genuai nogi Betlehem hanude bidagameo. c  12 Awe, dago homugo Genuai Bidigo wai hauwa dage sibolo momainogo elama, tama nago te Peresgo hani tiwai pedalomai yaibao, aga te Juda de we Tamar augwali sigo ogwa,” augwaligo te po wali.
4:12Te bidi Peres da, te aga te Efrata bagego polobadu bidali wąį mu dao.
,
e 

13 Tama Boasgo Rut sali, tama Genuai Bidigo wiegi yai sę augwali sibolo yai. Magi baso meni, Boas Rut dali pilama, tama Rut haliga yai. Tama nosali agai ogwa me deli ame nanio. 14 Tama te we dabe augwaligo Naomibolo te po wai, “Dago Genuai Bidi nogi ugwaba sinao! Megi agai ogwa me deli nagebolo manio. Te e wai aga te nago wąį olama, tama aga genuai ebo sogo nage tonaluaibao. Dago homugo aga te Israel hani tomode te genuai nogi somainogo ebao! 15 Awe, agai nage bidibo tau siyu, tama nage mosi dabe ebode bugagia tonalumainogo yaibao. Naga auwago te e wai ame nani da, te we Rutgo nage godolo mu yalio. Agai nage tau sabo sę hauwa yali, tama agai yali sę te ogwa a naga olama, me badu nogo si bidigo yabo sę usu agai yali sęgo te aiyaba elaluai dao,” te we dabe sibigo Naomibolo te po wai.

16 Tialima, Naomigo te Rutgo wai selama, tama te wai aga bugagia tonalualio.

17 Tama te bulude bidali we dabego te po wai, “Rutgo wai ogwa ame nani, te Naomibolo mawai.” Tama augwaligo wai nogi mani, tama aga nogi Obet poai. Tama nosali Obet te Jesigo aya pedelali, tama Jesi te Devitgo aya, te aga Israel bagego genuai tuni bidi dao. 18 Te aga Peresgo hanide gagalama, te Devitgo haniba dąį tama igi palio: Peres te Hesrongo aya, tama Hesron te Ramgo aya, tama Ram te Aminadapgo aya, tama Aminadap te Nasongo aya, tama Nason te Salmongo aya dao. Salmon te Boasgo aya, tama Boasgo ogwa Obet, tama Obetgo ogwa Jesi, tama Jesi te Devitgo aya dao. Te tama dao.

Copyright information for `MPS