Song of Solomon 3

Tigidali sogo hulide ena godege pibo sogo,
eno te godolo ebo abagide na naga ebo dao.
Te eno nade aga tigidali habude gegali,
tiali goli eno aga me subeo.
Te nade ena hodaluama, te ena taun tomode biliyu,
te eno aga gegeyu ebo dao.
Ena te taun pedai habu tigidali badu bilibo dao.
Tama eno te godolo mu ebo abagi gegebo sę ebo dao,
tiali goli, eno aga dali deliba gesabidi me unulubeo.
Te taun tonalubo bidi dabego augwa bilibo sę eyu,
augwaligo ena suali.
Te eno augwaliba hanalu wali,
“Dagego eno abagi sualiwe, ma meniwe?”
Eno augwali tagalama, ena pobadi,
te polo mu tama eno ena abagi suali.
Ena aga pageba pelama, eno aga pagea selama,
te agai ena taga pidali homu eyu, eno hagela yali.
Eno aga ena idago beba odasa pelama,
tama da si te eno idago be habu tomoba palio,
te eno te na te tiwai ebo dao.
Te Jerusalem we dabe, dagego te wiegi yai
bulu uni hasa dabede homu kone palama,
te bomai po dąų wai baso da,
teda dagego da sigo haliga hodoligio.
Te sę dena side digi elalubao.

Sela wabo balia po

Gesi wegigo balia po te tiwai wali

Magi naigo te wa pai bulude
bidali tagalama, asaliwe?
Augwaligo te denami wiegi yai ebo tobage plaua dabe
ulubo sogo pedalubo hano tiwai nai pedelali.
Te aga denami ebo te bisnis bidi dabego
te mone sabo paudago denami ebo tiwai yali.
Suao. Te wiegi yai dugabo sia sai
me deli te bidi dabego tolasa asali.
Tama Solomon aga digi tede dugawali.
Te bidi sese sela 60 ami bidi dabe aga dali asali.
Augwali te bomai ami dabe da,
te Israel ami dabe dao.
Tigidaligo hauwa sogo polobadu boi hwįani.
Tama augwaligo te bainatgo hwįbo mu konea pai.
Tigidali deli deligo augwa bainat tola sesa asalio.
Te augwaligo sisi elalu tonaluali,
tiyu te boi bidi dabe hulide aselama,
hwįagasidali weyu tialio.
Augwaligo te tǫ kantri Lebanonde
wiegi yai ni dabe selama,
tama te kingo dugabo sia sai nigali,
te dwasianu be me deli tiwai.
10 Augwaligo te sia nigabo ni tigi te silvago nigali,
tama aga kekabo bono te golgo nigali.
Te dugabo pesage, augwaligo
te kingo mama yai name ugwago mesegelali.
Te Jerusalem we dabe augwaligo
te sia bugagia au ilalio.
Augwaligo kingo te sę ebo godolo mu yai dao.
11 Dage Jerusalem we dabe, dage aselama,
king Solomon suagasao.
Te kingo mubo madi agai tobolude muani elalubao.
Te king Solomon aga we sabo side
aga idago te madi aga toboluba muani.
Tama te tiali side aga wiegi yai pemene
umabogi mu yai dao.
Copyright information for `MPS