Song of Solomon 4

Gesi ogwa bidigo balia po te tiwai wali

Eno we abagi, nage gasa sawi yai dao.
Nago te name ugwa pedai tobolude bea selama,
te nago gesabidi geme dualiyu tiali,
tialima nago gedu eno suali ula yali, magi baso meni,
nago ena godolo mu ebaso tiali.
Nago gesabidi badu hauwagasali tobolu nisi da,
te kibu meme hani me deligo
wiegi yai pemene ebo tiwai eyu,
te Gileat bulude te dwasianu bulu du dabedu
aiyaba sasa mano dulubo tiwai ebo dao.
Nago kele tedela mu yali,
te tedela sipsip tigi wali augwaligo tigi nisi poalama,
te augwali megi tama ąį telawai tiwai yali.
Nago kele deli me degebeo. Menio.
Tigidali bugagia elalubao.
Nago pedauwali te mama name ugwa tiwai mu yali.
Nago pedauwali te gasa sawia pai mu da.
Te name ugwago nago gesabidi
sesela sali, tiali goli eno nago
gesabidi ula elalubo suali.
Nago dogoni te gasa sawi yai mu,
te king Devitgo uganu sę yani
wiegi yai bobobage be taua tiwai dao.
Te nago magede domane sawi yai beli da,
te ami bidi dabe hauwago sabele dabe tiwai
te uganu mu sę yani bobobage be tauade
paide wawalo pali tiwai elalubao.
Nago ame si da, te wiegi yai bulu uni hasa sigo
te plaua dabe tomode nosai tudubo tiwai elalubao.
Nage te denami ebo wiegi yai nai dabego
te bulu du me delide pągąnąlubo tiwai dao.
Tama ena te bulu duba bidigi pelama bididubadi,
te giliga dega sigulama, te bulu kedau ebo sogoba
usu naibao.
Eno abagi, nage gasa sawia pai mu da.
Te nago tigide masalu deli me elalubeo.

Eno we o, nage ena dali asobaso,
da sigo te Lebanon bulu du dabe
tagalama, da si pinao.
Nago te bulu du Amana, me te bulu du Senir,
me te bulu du Hermon tagalama,
te nage aiyaba dulao.
Te laion dabe, me gasa bulu uni hasa dabe
te bulu du dabede bidibao.
Nage eno we, te nage eno hobolu du mu da.
Nago ena dwasianu naga suali,
te nago eno hobolu du togalualio.
Eno nago magede domoani beli sulama,
tama ena nagede mu tulaluali.
10 Nage da eno we,
te nage eno hobolu du mu da,
nago ena godolo mu ebaso,
te ena wiegi yai pemene mu ebao.
Nago te godolo homu ebo pusu mu ebao,
tama te wain ąįgo pusu aiyaba elaluali.
Te nago au yali sanda denamigo
te tobage wiegi yai pauda dabego
denami aiyaba mu elaluali.
11 Nage eno wiegi yai we da,
nago po eno olode odobo pusu mu ebao,
te hani pusu pedauwali ebo tiwai yali.
Nago wabo po wiegi yai ebao, te tubo ame pę tiwai da.
Nago gudali ugwa dabe wiegi yai denami elalubao,
te Lebanonde bulu du dabego denami ebo tiwai yali.

12 Eno we, nage eno hobolu du mu da.
Nage te obo baguai gi me deli tiwai elalubao,
tama te tomoba niwai bidi me pisąwani.
Nage te ulu wę me deli tiwai
te gi tomode elalubao.
13 Nage te wiegi wiegi yai ni du dabe
te wiegi yai gide elalubo tiwai da.
Te ni mebade wiegi yai nai elalu,
te meba nedu dude wiegi yai denami elalubao.
Mebago te wiegi yai sanda nigiyu,
te mebago naiba munama, pusu ilaibao.
Mebago te tobage au dogia pabo nai dabe nigibadi,
te mebago wiegi yai denami hano
ilibo pauda nigaibao.
15 Nage te ulu ąį pągąnama, te buluba gelama,
tama peyu, te giba ąį mabo tiwai ebao.
Nage te dwasianu ąį gomo dabe tiwai
te Lebanon bulu dude ulu pedelama,
tama te giba aiya dulubo tiwai ebo dao.

Gesi wegigo balia po te tiwai wali

16 Not badu wali, nage asao.
Saut badu wali, nage aselama,
eno gi waligo mesega sagasobaso,
te tigidali pesage te gi habu
te wiegi yai denamigo pągąną saibao.
Tama eno te godolo mu ebo abagite aga giba aselama,
tama te wiegi yai nedu du dabe tuagasomainao.
Copyright information for `MPS