Song of Solomon 6

Te we dabe sibigo balia po te tiwai wali

Nage gasa sawi yai we, tama nago tigidali we
aiyaba elaluali.
Nago abagi wali bidi mena paliwe?
Dago nage tau selama, aga gegaibao.
Tiali goli, aga mena sunumidu wali paliwe?

Gesi wegigo balia po te tiwai wali

Eno abagi wali bidi aga giba pali.
Te gide te wiegi yai denami ebo nai dabe pągąnąlubao.
Te aga meme dabego te nosai dabe tubo sę eyu,
tama agai te au sawia pai plaua dabe
sisinibo sę eyu ebao.
Te aga eno bidi da, tama ena agai we dao.
Agai aga meme kibu dabe
te sawi wiegi yai plaua dabe tomoba sela pelama,
tama te meme dabe augwa te nosai
tubo sę eyu bidibao.

A naga wali balia po

Gesi bidigo balia po te tiwai wali

Eno abagi, nage gasa sawi yai mu da,
te wiegi yai taun si Tirsa me Jerusalem tiwai da.
Eno suali, nage gasa sawi yai mu yaibaso,
tama eno homu dąų wali,
te bidigo te ami bidi genuai hani
te ugwa plak dali asobo subaso,
agai gedu tede dąų wabo tiwai yali.
Eno homugo nago enaba tonogi homu yali.
Nago enaba tonobaso da,
te ena nagede mu tulalubo dao.
Nago gesabidiba hauwagasai elalubo tobolu nisi
te kibu meme hani wiegi yai pemene eyu,
te Gileat bulu du dabedu aiyaba
sasa mano dulubo tiwai ebao.
Nago kele dabe tedela mu yali,
te augwaligo megi tama ąį paluai tedela
sipsipgo tigi nisi tiwai yali.
Nago kele deli me degebeo. Menio.
Tigidali bugagia mu elalubo dao.
Name ugwago nago gesabidi mesega sali goli,
tialima eno nago gesabidi ula ebo suali.

Kingo we hauwa elalubao.
Bidi sese sela 60 we te kwin bidibao,
te tudi badu si wali daganaluali we dabe
te bidi sese me si me si 80 bidibao.
Agai te gasa gesi we dabe hauwa me elalubao.
Tiali goli, ena da, eno abagi deli naga elalubao.
Aga te polalubo mu bidibaso,
tama eno aga godolo mu ebao.
Aga idago aga deli naga ame neyu,
tama agade wiegi yai pemene eyu,
tama aga godolo mu ebo dao.
Tigidali gesi wegigo aga sulama,
te augwaligo aga nogi ugaba sali.
Te kwin we dabego,
me te kingo gasa we dabego te balia po weyu,
te agaba wiegi yai pemene yali.
10 Dego mu enaba tononalubo dawe?
Agai gesabidi te giliga pedelainu ebo tiwai elama,
te giliga ula genuai nanobo tiwai eyu,
tama agai gesabidi mu udula pali,
te polua ula tiwai yali.
Eno aga sulama, tama eno homu dąų wali,
te bidigo genuai ami hani
te augwa plak dali asobaso sulama ebo tiwai yalio.
11 Ena dulama, tama ena te du wiegi yai
walobo ni dabe elalubo giba asali.
Ena asali, te gesi kulubi dabe te ni dabede te bulu
odogode holobo sueinogo asali.
Eno te ni waingo gesi kulubi dabe,
me te nai du walali wiegi yai elalubo
te eno sueinu yali.
12 Eno abagi we, eno nage sulama, ena noma sali.
Eno kone palali, ena te genuai bidi mu
deligo karisde bidibo tiwai yalio.

Te we dabego balia po te tiwai wali

13 Sulam we, ma asao, ma asao.
Dago nage suainogo, nage geasa ma asao.

Gesi wegigo balia po te tiwai wali

Te eno bidi dabe gedude bebegelibo danis ebo,
te magi baso dagego ena suabo homu ebawe?
Copyright information for `MPS