a[Jo 19:37; Ped 1:7]

Zechariah 12

Nosali Godigo Jerusalem ma saibao wali

Te e po da, te Genuai Bidigo po da, aga te dagalu genuai kegelalma, me te tǫ dodolama nigali God dao, tama agai te we bidi dabe augwaliba bidibo ula mabo da. Agai po te Israel dabeba mayu, te tama wali, “Eno te Jerusalem te kap wain me deli tiwai pedalumainu ilaibao. Tama te Jerusalem pąde elalubo tǫ kantrigo aga dolainu ebaso, te tǫ kantri augwali te kapde wain ąį tuai bidi dabe te gęǫ page dwagila mu ebo tiwai pedelaibao. Te augwaligo Jerusalemba boi hwįgi pabo side, te augwali pelama, te bagulali obo banis taun bagua sigi pelama, tama augwaligo te Juda dabego gasa taun dabe tigidali me bagua sela silaibao. Te tama tiabo sogo pedalubaso da, teda eno te Jerusalem te sęgę yai masigi me deli mu tiwai ilaibao. Te tigidali bulu tǫ kantri bidi dabe te Jerusalem dali boi hwįainu teba sisinagasaibao, tiali goli augwa digi dolaibao, bidigo te moni sęgąį masigi ugaba sagulubo tiwai gilama mu yaibao. Te sogode eno te boi bidi dabego hos kibu dabe wi ilama, tama te hos kibude dugawali bidi dabe te homu kolesaga umuna palaibao. Eno te Juda dabe tonalueibao, tiali goli eno te boi bidi dabego hos kibu dabe gedu wilaibao. Tama te Juda dabego augwa polalubo bidi dabego te tama tebo sę ebo sulama, augwa homu tomode te tiwai po waibao, ‘Awe, God, te Tigidali Bomo Elalubo Genuai Bidi, agai Jerusalemde bidibo aga we bidi dabeba bomo mawai dao,’ Juda dabego te po waibao,” Genuai Bidigo te po wali.

“Te sogo eno ilama, tama te Juda dabe polalubo bidi dabe te kalade te genuai isi bogoli dala sabo tiwai pedalu, ma te wa pai wit gide isi bogoli ula pedalubo tiwai yaibao. Tama augwaligo te augwali pąde elalubo bulu tǫ kantri bidi hani tigidali ela silaibao, tiali goli Jerusalem taun te aga elaluali pesagede tama elalueibao,” Genuai Bidigo te po wai dao.

“Ena Genuai Bidigo te eno bomo mobaso, te Juda ami bidi dabego bomo bolo ugwa mu igulama, te augwa boi bidi aiyaba ilaibao, tama augwaligo genuai nogi saibao. Tama tibaso, te Devitde bulali wąį nǫų hani dabe me te Jerusalem we bidi dabego badi te gasa Juda we bidi tigidaligo genuai nogi aiyaba me elaluamo dao, te tiwai si naga elalueibao. Te tebo sogode Genuai Bidigo te Jerusalemde bidibo we bidi te obogo bagulubo tiwai yaibao, te boi hwįbo side mubo sabelego te tigi bea sabo tiwai gilama yaibao. Te eno augwali dąų walobaso, te boi hwįabo bomo meni yani bidi dabego me, augwali te polobadu bidali bidi king Devit tiwai bomai bidi pedelaibao. Tama te Devitgo bulali wąį nǫų dabe te nosali pedalubo hani bage te augwa polalubo bidi bidaibao, te Genuai Bidigo mobo bidi ensel tiwai, ma God aga tiwai digi bidibo tiwai yaibao. Tama te sogode eno te Jerusalem dali boi hwįainu yali te tigidali bulu tǫ kantri eno dolaibao,” Genuai Bidigo te po wai dao.

Augwaligo te bidi enego enai baso, nosali augwali hobede ebo gela waibao

10 Te Genuai Bidigo po geninama ma weyu te po wali, “Te eno te Devitgo bulali wąį nǫų hani dabego me te Jerusalem we bidi dabe augwaligo te homu dene eyu tau sabo kolesaga dali, te gedu haluasa po wabo kolesaga me, te si wali pomainu ilaibao. Te eno dwasianu naga egobeo. Tama augwaligo te augwa digi enego enama isali bidiba tononalu, te augwaligo aga gela usu mayu, te bidigo deli digi wai isaide dwai homu dene ebo gela wabo tiwai yaibao. Te augwaligo agade gela dwagila mu weyu, te bidigo aga gomunai ogwa deli isaide gela wabo tiwai yaibao. a  11 Te sogode te Jerusalemde genuai gela u mu waibao, te bidi dabego te tǫ malu dolo bulu te Megido pesagede te tibo god Hadatrimon dolaide te homu dene eyu gela usu mabo tiwai yaibao.
12:11-14Te kolesaga page konea silali bidigo homugo te nogi Hadatrimon page te tibo god me deli da homu yali. Te we bidi augwaligo lotu po agaba wali, augwaligo homude kone palali te aga te tigidali kibu be deli delide te deli sa muani sogo naga isibo dao, tama augwaligo agaba gela umagia mu wali. Tama nosali, augwaligo homude te aga bidibo ula ma sidu gebo dao homu ebo dao.
Te augwali ayago togwali hani sibi deli delide te augwa homu dene ebo gela waibao. Te Devitgo bulali wąį nǫų hani bidi dabe me, te Natango bulali wąį hani dabe me, te Livaigo bulali hani wąį nǫų dabe me, te Simeigo bulali hani wąį nǫų dabe me, te gasa hanigo bulali wąį nǫų hani dabe tigidali me, te gela usu tigidaligo mawaibao. Te bulali wąį hani deli deli te deliba sisinama, te bidi dabe gasa badu bidiyu, te we dabe sibi tedali badu bidalu, tama tigidaligo homu dene ebo gela usu mawaibao, te augwaligo enani bidide,” Genuai Bidigo te po wai.

Copyright information for `MPS