b[Mt 26:31; Mk 14:27]

Zechariah 13

“Te tiwai sę pedalubo si da, teda eno ulu ąį me deli munama elalueibao. Te Devitgo bulai wąį nǫų dabe me te Jerusalem we bidi dabe augwaligo te tibo god dabeba lotu olama, te sęgę hauwa sali. Tibaso, te ąįgo augwaligo te dwai sę yali sęgę tigidali sela sąwainogo yaibao,” Genuai Bidigo te po wai.

Te tibo profet dabe silaibao

Te Tigidali Bomo Elalubo Genuai Bidigo geninama ma weyu, te po wali, “Te sogo eno te eno we bidi hanigo tǫde tibo god dabe sela sąwaibao, tama te bidi dabego augwali homu kone mu ma palogobeo. Tama eno te tibo profet dabe me sela sąwaibao. Tama eno te we bidi dabego dwai homu kolesaga elalubo sela sąnama, tama augwaligo te tibo god dabe godolo homu munu ma egobeo. Te bidi me deligo tibo po ola mayu, te profet po obaso da, teda aga aya idago digi aga waibolo te tiwai po walao, ‘Naga digi nago tibo po pusubao,’ po wao. ‘Te Genuai Bidigo po me wabeo. Tibaso, nage isao,’ po wao. Te bidigo te tiwai tibo profet po pusubaso da, teda aga aya idago digi te hwą gego aga enama isilao. Te sogo te profet po wabo bidi me deligo te aga na dabe yaide digi te homu pemene eyu, ma te profetgo gudubo ugwa gudulama te profetgo ebo kolesaga tiwai eyu, te we bidi tibo po ola mayu me tegobeo. Menio. Te agai tama po weyu, ‘Ena profet menio,’ po waibao. ‘Ena te gi sę naga ebo bidi dao. Ena te bidi me deligo olo sę ebo bidi dao,’ tama po waibao. Te bidi me deligo te tiwai po agaba hanalu, ‘Nage magi ilama te nago hagawiade hwą dolaliwe?’ tialima agai tibo po weyu, te tiwai po waibao, ‘Ena te ena abagi me deligo bede te hwągo dolai da,’ po waibao,” Genuai Bidigo te po wai.
13:6Te tobage bidi mebago te profet pedelabo homu ebo bidigo te hwą ge selama, te augwa tigi wale togobo kolesaga wali pali. Te tiwai po te buku 1 Kin 18:28 tede te po elalubao. Tama te bidi dabego aga tigi hagawiade te hwą ge dolali masalu elalubaso sulama, augwaligo te tiwai koneani, te aga profet me deli da homu yali. Tiali goli agai tibo po weyu, te menio po wali.


Godigo te sipsip tonalubo bidide po wali

Te Tigidali Bomo Elalubo Genuai Bidigo te tiwai po wali, “Bainat hwą, nage hodaluama, tama eno tonalubo sę ebo bidi dali hwįao, te bidi ena pąde bidibo bidi yali goli. Aga ela mubaso da, teda te sipsip dabe wi tedela sąwaibao. Te tama tiwai naga eno te ena we bidi dabe dali boi hwįaibao. b  Tama eno te bulu tǫ kantri we bidi dabe tigidali te hani sela bugulama, te hani si ela silaibao. Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.

Copyright information for `MPS