Zechariah 5

Profet bidigo buku me bola pabo suali

Tama eno ma tonobadi yaide, eno buku me bola pabo suali. Tama ensel bidigo enabolo e tama po wali, “Nago magi nai subawe?” Tama eno te po wali, “Eno buku me bola pabo subao. Tama te buku bobobage te 10 mita usu nama, me agai genuai te 5 mita usu nama,” wali.

Tama agai enabolo e tama po walali, “Godigo te po wali, Juda bulude bidibo we bidi sese tama dene saibao po wali. Tama agai te po te buku elalubao. Tama te buku me badu bogo badu te po asęai elalubao, Godigo te kantride bidibo nai wi sabo bidi dabe sese sela sąwaibao po obao. Me ma, te buku me badu bogo badu te po asęani, augwaligo tibo po weyu mu tamao obao te bidi dabe sela sąwaibao wabo po wai te elalubao. Tigidali Bomo Elalubo Genuai Bidigo te po wali, agai te dwai bidi dolabo po toloyu, tama agai te nai wi siyu me tibo po weyu ebo bidi dabego be tomoba po ola tolaibao. Tama te po te bidi dabe augwa be tomode elaluyu, tama te bidi dabe dola silaibao,” wali.

Profet bidigo te we me deli te basket wade bidibo suali

Te ensel aga me pedelama, tama agai enabolo e tama po me walali, “Suao. Gasa nai me te asobao.” Tama eno agabolo hanalu wali, “Te magi nai dawe?” Tama agai te po wali, “Te da, basket wa me dao, tama te basket wa te dagego kantri we bidi dabego homu godolo ebo dwai sę dabe magi elama te dao,” wali.

Te basket po augwaligo aingo nigai dao. Eno tonalubadi augwaligo te basket po dabo suali, tama eno suali, te basketde we me tomode dualalubo suali. Tama ensel bidigo te po wali, “Te we da, te tigidali dwai kolesaga page tiwai piksa dao,” wali. Agai po ola silama, tama agai te we aiyaba ma pogolama, tama te basket po paliali. Eno ugwaba tonobadi yaide, eno we me si te genuai bago bogo tiwai elama, tama augwali si ena bidibo madi bola asobo suali. Tama augwali sigo te basket wa ugaba selama, sigiba bola pabo suali.

10 Eno te nai sulama, tama eno te enselbolo e tama po hanalu wali, “Augwali sigo te basket wa menaba sela pabowe?” 11 Tama ensel bidigo enabolo te po walali, “Augwali sigo te kantri Babiloniaba sela pelama, tama augwaligo tede genuai lotu be sę yainu te sela pobao. Augwali sigo te basket wa te be tomode muaibao. Tama te Babilonia we bidi dabego te basketba lotu po waibao,” wali.

Copyright information for `MPS