a[Ped 6:4, 5]
b[Ped 6:2]
c[Ped 7:1]
d[Jer 23:5; 33:15; Sek 3:8]

Zechariah 6

Profet bidigo karis me si me si suali

Tama nosali eno ma tonobadi yaide, hwįbo nai karis me si me si te bulu du si bras tomode pedelama edaba udabo suali. Te bedeba hos dabego te namba wan karis kegebo suali. Tama sisi yai hos kibu dabego si wabo karis kegebo suali. a  Tama nala hos dabego sela wabo karis kegebo suali. Tama te dodobolo pai hos dabego te me si me si wabo karis kegebo suali. b  Tama eno te ensel bidibolo e tama po hanalu wali, “Genuai Bidi, te karis dabe page te magi nai dawe?”

Tama ensel bidigo te po wali, “Te me si me si karis te me si me si haniani wali magiyu te yali dao. Megi tama augwali tigidali tǫde tonalubo Genuai Bidi page tagalama, augwali te asali dao,” wali. c  Te sisi hos kibu dabego kegebo te karis da, te not badu elalubo kantriba te pobao. Tama me te nala hos dabego kegebo te karis, te giliga dega saboba te pobao. Tama te dodobolo pai hos dabego kegebo te karis te sautba te pobao suali. Te dodobolo pai hos dabe sabolobo si da, augwali polo pelama, te kantri dabe bugagia tonaluainu te ebao. Tama ensel bidigo te po wali, “Te usu dao, dage piagameo.” Tialima augwali udulama pali. Tama te ensel bidigo enabolo i weyu te po wali, “Te notba pali te hos dabego tebogo te Genuai Bidigo homu kedau iligi palio,” wali.

Godigo Sekaraiabolo Josua te king bidi tobolu madi gudulao po walali

Te Genuai Bidigo enabolo po me deli mayu, e tama po wali, 10 “Te me si me si bidi, Heldai, me Tobiya, me Jedaia, te Sefaniago ogwa Josaia, te Babilon tagalama, augwali Jerusalemba polo asali dao. Megi tama nago augwaligo sesali wiegi yai maiabo nai dabe selama, tama nage Josaiago beba pao. 11 Tialima augwaligo nagebolo te mani te silva me gol selama, tama nago kingo hadi me deli geselao. Tama nago te hadi sela pelama, tama nago het pris Josuago toboluba buligi pao, te Jehosadakgo ogwa dao. 12 Tama nago agabolo e tama po walao, ‘Tigidali Bomo Elalubo Genuai Bidigo te po wali, Te Bidi Ni Abu wabo bidi aga bidibo pesagede wiegi yai mu pedelaibao. Tama agai eno be ma sę yaibao. d  13 Agai digi eno be sęnama, tama aga genuai nogi mu elaluaibao, te kingo nogi tiwai mu elaluaibao. Tama agai aga we bidi tonaluaibao. Tama te pris aga sia kingde dualaluaibao. Tama agai te prisgo yabo sęde dali te kingo yabo sęde dali si homu nagame elama bidiyu, te sę si bugagia mu yaibao,’ te po Josaiabolo pusao,” Genuai Bidigo enabolo te po wali. 14 Tama te king hadi da, te Genuai Bidigo be tomode munaluaibao. Tama te we bidigo te hadi sulama, tama augwaligo te Heldai, me Tobiya, me Jedaia, me te Sefaniago ogwa Josaiago yali wiegi yai kolesaga kone palama te koneyu yaibao, te kegeda pogobeo.

15 Te digibulu bidali bidi dabe augwali aselama, augwali tau selama, Genuai Bidigo be sę ebo tau sagasaibao. Tama augwaligo sęna silibo si da, teda dagego e tama koneaibao, Tigidali Bomo Elalubo Genuai Bidigo ena taga palama, ena dage dali bidiba, te homu koneaibao. Tialima, dagego God Genuai Bidigo po sese tama bugagia wali peyu da, teda te nai dabe sese tama mu pedelaibao.

Copyright information for `MPS