a[Ais 17:1-3; Jer 49:23-27; Amo 1:3-5]
b[Ais 23:1-18; Ese 26:1-28:26; Jol 3:4-8; Amo 1:9-10; Mt 11:21-22; Lu 10:13-14]
d[Ais 14:29-31; Jer 47:1-7; Ese 25:15-17; Jol 3:4-8;
eAmo 1:6-8; Sef 2:4-7]
f[Mt 21:5; Jo 12:15]
g[Tib 72:8]

Zechariah 9

Genuai Bidigo te gasagi yai sę dabe pedelabo sę ilama, te aga we bidi dabe tau saibao

(Dąį 9-14)

Godigo te gasa hani dabe te tǫ kantriba dwai dene mabo sę ilaibao

Te Genuai Bidigo po enabolo mayu, te tama wali. Te tigidali tǫ kantri we bidi dabe augwali te Genuai Bidi dologode naga bidiyu, te Israel hani dabe bidalubo tiwai yaibao. Genuai Bidigo te tǫ pedai Hadrak me te taun Damaskus, a  me Hamat tonalubo sę yaibao, te tǫ pedai Hadrak distrik pąde elaluali. Tama agai te taun Tair me taun Saidon te tonalubao. Te Tair dabe me Saidon dabego augwaligo te kolesaga koneani bidi dabe hauwa elaluali digi goli, te Genuai Bidigo augwali me tonalueibao wai dao. Tair te bomai taun pedelali te augwaligo dila pai masigi banisgo te taun bagulali. Tama augwaligo te hauwa silva me gol sisinani, tama te silva me gol te augwaligo gedude olo nai tiwai elaluali. Tiali goli Genuai Bidigo augwaligo te nai doado bage tigidali dagala sąwaibao. Genuai Bidigo Tair dabego te nai dabe te tamu ąįba sąwaibao, tama te boi bidi dabego te taun siago ulama, te tigidali mu dolaibao. b 

Tama te Askelon we bidi dabe augwaligo
te tiwai sę tede pedalubo dabe sulama
tama augwali wi yali.
Tama augwali me dolama,
tama nosali augwaligo bulude te bidi dabe meni yai.
Te gasa bulu bidi dabego me te genuai sęgę augwaliba
pedalubo sulama,
te augwaligo king bidi isaibao.
Te Ekron bulu bidi dabego sulama,
te sęgę tiwai augwali me saibao.
Augwaligo homugo te Tair dabego
augwali tau saiba homu yaibao.
Tiali goli, menio. Te augwali mu hagawaibao.
Te gasa gasa hani augwali
te taun Asdotba bidagasaibao,
tibaso augwali deliba taluabo usu meni yai.
Tama Genuai Bidigo te po obao,
“Te Filistia dabe augwali hagoma ebo
bidi dabe yai baso,
tibaso eno augwali aiyaba mu elaluaibao.
Te Filistia dabe me badu me bidalubo hani pedai,
te augwali eno hani we bidi pedelaibao,
tama augwali te dwasianu hani we bidi tiwai
te Juda hani tomode bidaibao.
Tama te Ekron dabe augwali
eno hani we bidi pedelaibao,
te Jebus dabe augwaligo polobadu yali tiwai.
9:7Te Jebus dabe, hasia bolo te augwali hani dabe te Jerusalem bulu page bidi dabe dao. Nosali te Devitgo te taun Jerusalem sali sogo, te Jebus hani dabe te Israel dabe dali hodobo bidali. Te tiwai po te Jos Dąį 15:63 tede elalubao.

Tialima augwaligo te kibu hasa mi
kaneme dali elalubo me tusiąma,
te gasa nai dabe me te Juda dabego
tusiąma habu selali nai dabe me tugobeo,”
Genuai Bidigo te po wali.
d 
e 

“Te eno ena tǫ kantri tonalu, eno te tǫba te ami bidi dabe uga peyu, eda asu ebo sę munu ma egobeo. Te boi bidi dabego eno we bidi dabe aiyaba elaluama, te augwaliba dwai sę ebo eno me gogolama sula tagalogobeo, magi baso meni, eno suali, te we bidi dabe augwali dene sabo suai dao.” Genuai Bidigo te po me wai.

King bidi asaibao

Dage Saion taun Jerusalem we bidi dabeo, dage homu pemene umagia mu eyu, hae wao. Suiąo. Dagego king te asobao. Te agai bidi dabe aiyaba elaluali genuai nogi elalubao. Tiali goli, agai nogi aga digi ugala me sabeo. Menio. Aga te nogi meni yai bidi asobo tiwai eyu, aga te donki kibu me deli daide ugadu dugulasa asaibao. Aga te ogwa bidi donki kibude dugulasa asaibao wali. f 

10 Genuai Bidigo po ma weyu, te po wali, “Eno te boi hwįbo karis dabe me hos kibu dabe sela sąnama, tama augwali te Israel dabe bidibo tomode munu me elalugobeo. Tama augwaligo te hwįbo ene dabe te tigidali eno dolaibao. Te dagego kingo te tigidali tǫ kantride te boi hwįbo kolesaga tagalama, te deli haliga elama bidimainogo ilaibao, tama agai te genuai tǫ pedai badu bidibo we bidi tigidali tonalueibao. Te tǫ te genuai tamu ąį dage badu gagalasa pelama, te digibulu mu elalubo tamu ąįba mu usu nigi paibao. Te me te genuai ąį Yufretisde gagalasa pali, te u badu pedai digibulu mu usu nigi paibao,” Genuai Bidigo te po wali. g 

Godigo aga we bidi dabe bidabo page ma dodolaibao

11 Te Genuai Bidigo te tiwai po wali, “Eno dąų wabo po kontrak me deli dage Juda dali yali. Te wąį nǫų dabego te ofa yabo kibu dabe elama, te kaneme gealuali. Tialima, te gelali kanemego te da dali dąų wali po kontrak dąų walali. Tama tibaso, eno dage te gasa tǫ kantride kalabus sę ebo tagalomainogo ilaibao. Te kalabus sę dwai mu yali, te dage genuai tǫ dedage tomoba munama bidibo tiwai elalu, te dage tuabo ąį menia sali tiwai elaluai dao. 12 Dagego koneani, te Genuai Bidigo dage tau saibao, tibaso dage te duga page buluba ma aselama, te dage bugagia bidaibao. Dage te sęgę genuai tolali, tiali goli eno te tiwai po obao, eno dage wiegi yai bugagia ilama, tama eno te ebo wiegi yai kolesagago te sęgę aiyaba mu elalueibao. 13 Te Juda dabe augwali eno te enesigi tolalubo tiwai eyu, tama te Israel dabe augwali te eno enesigide ene daganalubo tiwai elalueibao, tama te Jerusalem bidi dabe augwali da te hwą ge bainat gelalubo tiwai elalu, tama eno te Grik dabe dali boi hwįaibao,” te po wali.

14 Te Genuai Bidi aga we bidi augwali daiba ugadu hanilama pedelaibao, tama agai enesigi kekelama togolaibao, te agai enani ene dabe te be selego ula ebo tiwai yaibao. Tama God Genuai Bidigo te bu wabo nai biugel bu wabo si, te aga bomonama soyu, te aga bidali pesage saut badu tagalama, te wali dali tulubage si tomodu asaibao. 15 Tama Genuai Bidi Tigidali Bomo Elalubo Bidigo te aga we bidi tudi badu tonalu posolalueibao, tama augwaligo augwa boi bidi dabe ela silaibao. Te boi hwįbo side te augwaligo i wabo te bomai ąį tuai bidigo i hae wabo tiwai eyu, tama augwaligo te boi bidi dabe ela mueibao. Te boi bidi dabego kaneme te augwaligo te ofa yainu te poude tabilama te altaba gealubo tiwai yaibao.

16 Te tama tibo side Genuai Bidigo aga we bidi dabe augwali ma dobola saibao, te kibu sipsip tonalubo bidigo te aga sipsip dabe te hasa laiongo elama dolainu ebadi te ma dobola sabo tiwai ebao. Tama augwali dwagi yai mu agai tǫde bidiyu, te gasa sawi yai bugagia ula mu yai masigi te kingo tobolu madide elalubo tiwai yaibao. 17 Te tǫ da, wiegi yai mu elalueibao. Tama te gesi wegi ogwa dabego te wit nai me wain hauwa elalueibao, tama augwali te genuai hani te bomai we bidi mu pedelaibao.

Copyright information for `MPS