a[Ais 14:29-31; Jer 47:1-7; Ese 25:15-17; Jol 3:4-8; Amo 1:6-8; Sek 9:5-7]
b[Gag 19:24]
c[Ais 15:1-16:14; 25:10-12; Jer 48:1-47; 49:1-6; Ese 21:28-32; 25:1-11; Amo 1:13-15]
e[Ais 18:1-7]
f[Ais 10:5-34; 14:24-27; Nah 1:1-3:19]

Zephaniah 2

We bidi augwaligo homu kolesaga begelemainu yao

Dage e kantri we bidi, dage deliba sisinao. Dagego duga dwai kolesagade dage hale dwasianu me ebo menio. Dagego homu bugagia kone palama, tama te dwai kolesagade hale iyąo. Tiyu, Godigo aga homu sębę haniniyu, dage deli sogo tama te plaua sasia pabo tiwai elama dolidali weyu iyąo. Tiyu, Genuai Bidigo sę yagasiyu, dage isi ulubo tiwai elama ulidali weyu iyąo.

Dage we bidi hamaga isąnama Genuai Bidigo po sela sąsiama ebo we bidi, dage agaba asiąo. Dagego duga digi aiyaba elaluama, tama doloba pai kolesaga naga iyąo. Tialima, dagego te tama tiyu da, teda Genuai Bidigo sębę elama, tama te dwai pe te dwai we bidi dabebolo wei ponobo sogo dage da dologobeo.

Genuai Bidigo Juda bulu pąde elalubo kantri dabe dolaibao

Te Genuai Bidigo te kantri Filistia dolobo sogo, te taun Gasade bidi deli me bidigobeo. Me te taun Askelonde me bidi meni yaibao. Te boi bidi dabego taun Asdot we bidi sese tama deli be posobo sogo sela sąwaibao, tama augwaligo te taun Ekron we bidi me sela sąwaibao.

Tega, dage Kenan tǫde bidibo Filistia dabe, nambisde bidibo Keret bage, dage me dolaibao! Genuai Bidigo dage po tų ela mawai dao. Tama agai dage dolama, tama bidi deli me bidigobeo. Dagego tǫ dage te tamu ąį sabide te elalubao, teda te olo kala bulu pedelaibao. Tama te sipsip tonalubo bidi dabego tede dwasianu be dabe me sipsip obo te pesagede sę eyu yaibao. Tama te dwasianu Juda hani augwali dolisąma yali, te bage augwaligo dagego tǫ saibao. Tama augwaligo sipsip kibu dabego tede nai tulama, tama te Juda dabe augwali te Askelon taun bede piyu yaibao. Tama God augwa Genuai Bidi, augwa Juda dabego Genuai Bidi augwali dali bidiyu, tama agai augwali augwa kantride bugagia bidimainu ilaibao. a 

Genuai Bidi Tigidali Bomo Elalubo Bidigo te tama po wali, “Te kantri Moap me kantri Amon bidi dabego eno we bidi posobo po olama, tama eno we bidi dali dwai po wabo eno polo odalio. Tama augwaligo hae olama, te po wali, ‘Augwaligo tǫ dago saibao,’ po wali. Mu tamao, ena Tigidali Bomo Elalubo Genuai Bidi ena bidalubao. Ena Israel dabego God, eno mu po weyu, te dąų obao. Te Moap dabe, me Amon dabe, augwali te taun Sodom de Gomora si dolali tiwai tama yaibao. Tama hae naga holama, tama augwaligo tǫ mesega saibao. Tama tamu sabo dedage dabe naga pedelama, tama te bulu dolama, te tama elaluaibao. Eno hani augwali me bidali da, te bidi dabe augwaligo augwali dali hwįnama, tama augwaligo nai dabe kegelama saibao, tama augwaligo tǫ me saibao,” te po wai. b 

10 Te tama tiwai sę te Godigo te Moap dabe me Amon dabe dali me dene mawaibao. Magi baso meni. Augwaligo hamaga elama, tobolu gagea peyu ebo dao. Tama augwaligo Genuai Bidi Tigidali Bomo Elalubo Bidigo we bidi dabe dali dwai po wabo dao. 11 Genuai Bidigo augwali wi dwai mu emainu ilaibao. Te agai te tigidali kantri dabego tibo god dabe olo nai pedelemainu ilaibao. Tama tigidali tǫ we bidi augwali augwa kantride bidiyu, Genuai Bidiba naga lotu po weyu yaibao. c 

12 Dage kantri Kus we bidi, Genuai Bidigo dage boide ela muna silaibao.
2:12Te tǫ kantri nogi augwaligo polobadu wali Kus, megi dago te nogi Sudan wabo dao.
,
e 

13 Tama aga bomogo naga Genuai Bidigo te kantri Asiria we bidi dola silaibao. Te kantri te not badu te elalubao. Tama agai augwaligo genuai taun Ninive dolaibao. Tama te taun te olo nai meni yai olo tǫ wa pai bulu elaluaibao, tama bidi te bulude me bidigobeo. 14 Te kau kibu dabe, me sipsip kibu dabe, me meme kibu dabe, me bulu hasa dabe naga, augwali teba piagasiyu yaibao. Magi baso meni, te boi bidi dabego te wiegi yai ni bǫ name dabe dadalama, buluba sąsąwaibao. Tama te hulide bilalobo ba dabe augwali te bede bidaibao. Tama augwali te windo dabede dualama, te augwa po weyu yaibao.

15 Te Ninive dabe augwaligo homugo augwali bomai bage dao homu elama, tama augwaligo homu augwali bidi dabego me dologobeo homu ebao. Tama tiyu, augwali wiegi yai homu pemene ebao. Tama augwaligo homugo augwaligo taun te hasia polalubo taun dao homu ebao, te tigidali kantri tomode. Tiali goli, mu menio. Te dwai nai dabe te Ninivede pedelaibao. Tama te bulu dolama, tama elaluaibao. Tama te bulu te bulu hasa dabego bulu gagawaibao. Te bidi dabe sese augwali te pąba pabo bage augwaligo posobo po weyu, eda ma kila siyu yaibao. f 

Copyright information for `MPS