1 Timothy 5

Bainobo galini kimanin kukubo weng sangobe.

Kobo hangkalebwali mo dosuanemebe! Kobo weng fiab oye bianeba daaye bianeba makob keb aye daahabeb ina bianeba eka tembal isa weng fiab oye bianiba daaye bianeba makob kleb ningwali daayebeb inayemale! Eka kobo konokmonwal isa daaye bianeba makob keb biemo daawebeb inaye bianebte! Kobo souwal isa daaye bianeba makob kleb nengwali daayebeb inaye bianeba keb bobol temo ayam fumbianebte! Keb bobol temo taman bobolo mo funemebe!

Unang maki bainobo gabibi imakwali kaabeibbua ilikiem blib mole bainobo galin nakaia unangai i daaye bianiba kla kimaine! Ina otane unangi i meme isa i molobsel isa blib mole i unang eli bobolo kla funaine! I okoko mikiktemo nanomabib ole i aaleb kamwal isa faninsak kamwal isa kla kima bianiba i sino gwab bliba i kima binibbuo gabamo kibeine! Gode kukub olo kla gobo biebe. Unangi imakwali kaabeibbua i meme isa molobsel isa eka mikimwal tlemin isa dabwal tlemin isa blim imaye tla tla bianiba blibi i Gode bainobo geniba tab dim osa kwinomo dim osa amitie Gode nganhabiba daayebebe. Otane unangi imakwali kaabeibbua ili bobol tem funin ota wafu bianiba Ni inamin namino dlonoba seinomo ge funaniba ili bobol tem funin ota wafu blib mole i afen smiksa otane i makob kaanabibi ulabobe. I Gode kukubo abuk wawem bliobe. Kobo bainobo galin nakaia unangai Gode weng olo omkayemeba i kukub ayamo namiba naka mak unang maki i kukubo yatemaibo i mo funanibta i kukubo misiamobo ge funanimibe! Bainobo galin nakae e meletani klao mo kimaim blim kenemeo e kukubo misiamobe. Eka nakae e aaleb kamwali mo kimaim blim kene mole e kukubo dot misiamobe. E kukub misiam olo bainobo galinba nakaia unangai kukub misiam osa gaisenamabebe.

Kobo unang sosoni daayemang gaebo i niniino homono mo dolabenebta daayemebe! Unangi bifolo homono 60 o blimubenobuei i niniin ota dolabeneba daabenale! I imakwali makob ilita dlo bliba naka mak unang maki baaniba I kukubo ayam nabiobo gabiba i memei kla kima bianiba eka bib mak nakaia unangai imeno okaye bianiba eka bainobo galin nakaia unangai bib mak da tlaibi i skilono fubaye bianiba daaye bianiba eka nakaia unangai gembib biamuei daaye bianiba kukub afet osa ayam nabiba i imakwali kaabeib biamuei niniin ota dolabeneba daabenale!

11 Otane unangi souwali i imakwali kaabeibbuei niniino mo dolabenebta daayemebe! I baaniba Ni besa bianoba Yesus Klaiste okoko amitie okok kemomabbiobo gabib otane sinanomo i funaniba ni imakwali imin dlomo ge funaniba i weng olo baaibbuo deiboniba imakwali imin dlaibo naka mak unang maki baaniba I kukub olo misiamobo genomabiobe. 13 Eka i kukub mak osa inabiobe. I bisiabalaniba moniba am mak am mako haabianiba weng misiamo nakaia unangai mo obibba osa eka naka mak unang maki kukub misiamo nanimibo wengo wentaib osa i naka mak unang maki weng olo oye biam nabib kesoa kobo i niniino mo dolabenebta daabenemebe! 14 I inamomabib kesoa ne funania Unang souwali imakwali kaabeibbue ile imakwali imin dloniba memei yobianiba i am osa meme isa kla kimanine gabibe. I inaib mole bainobo galinba nakaia unangai nibo mo baabenibta Bainobo galin nakaia unangai kukubo misiam nabiobo ge baabenomabibbabe. 15 Unang sosoni maki Yesuse kukub ayamo deiboniba Gululame kukub misiam ota wafu bliobe.

16 Inamin kesoa Yesuse bainobo gabib nakaia unangai maki i meletan maki konokwal aibbua imakwali kulilubeib mole imaye unang eli kimanine! I mo deibenibta bainobo galin nakaia unangai bumoloko mo omyaibe! I imaye kimaniba eka bainobo galin ile konokwali ninek blim ita kimaine!

Bainobo galin nakaia unangai kimanin nakai wengobe.

17 Bainobo galin nakaia unanga ibo ib kimanin nakai okoko ayam okok kebib biamo monio sum oyine! Eka ib kimanin nakai Gode wengo nakaia unangai omkaye bianiba aleyebib naka ile i monio dot sum oyine! 18 Niminbabe, Gode buk temo baanoa

  • Eil blumakaui ibo wit dango klabiba i daaye bianiba okok kemibo ibo i sitalo mibo mo dlab bebenimibe! Deibeiba wit sano wembianibte genabianoa

eka weng mak osa baanoa

  • Nakai okok kebib mole i okoko molo yang keniba monio oyine genanobio

kesoa bainobo galin nakaia unangai kimanin nakai Gode wengo omkeimabibi ibo i okoko molo yang keniba monio oyine!
19 Naka make baanea Bainobo galin nakai kimanin nakae kukubo misiam nabebo gene mole kobo e weng olo mo wentaebe! Ina otane nakai asu eka asumatna i baaib mole i weng ota wentene! 20 Bainobo galin nakai kimanin naka make hengane mole alukum bainobo galin nakaia unangai kin dim ye kobo dobo klaneba ateniba tosiananiba kukub misiamo namino deibueine!

21 God esa Yesus Klaist esa abisel isa i kin dimo ne wengo moton baabkenamabibe. Kobo weng olo watemaebo inanale! Kobo keb nineki kla daabeneba eka keb ninekbai klao mo daabeim blim kenamin kukubo mo wafunemebe! Kobo daabenang gaebo alukum makob kimin daabenale! 22 Kobo naka make hebmamsabo mo dobonebta bainobo galin nakaia unangai kimanin nakao mo dofanemebe! Mikiktemo e kukubo ateneba e kukubo misiamobe ayamobe genebte! E kukub misiamo nabea kobo dofaneb mole kebsa e kukub misiamo nanamabeb kesoa kobo klanale! Kobo kukub ayamo amitie namale!

23 Kobo aa motono amito mo unalaebe! Kobo am mak bomanomo am mak bomanomo amitie gembeb kesoa kobo waen aaye gwab ibaneba aa baka wembeba daabkenoa ginino fotebenakebote!

24 Nakaia unangai hengmino inaminobe. Mak ile keim nabiba naka mak unang maki yatemiba nibo dlo klanabob otane maki hengmin ole ayok nabiobe. Sinanoa mubiang amo dim ota keimanota Gode dlo klanamabebe. 25 Eka nakaia unangai kukub ayam namin osa inaminobe. Maki kukub ayamo keim nabiba naka mak unang maki watemeyebiobe. Eka maki kukub ayam ole ayok nabib otane o amito mo ayok bibenomobabe, keim anamabobe.

Copyright information for `MPT