Acts 2

Gode Hobe dabane daak tlebiobe.

Singkalin am sumo niniino Fentikos amo tlo kesoa Yesuse bainobo galin nakai am olokiemo tem tam mina bianiba wentiba unine sume abilim ut danea makob ati unin kemsea wentenabiba daakenea am tam osa unin eta dasea deibanabiba atol inamino halbi tenoa nakaia unangai dimo alukum onon tlanoa watenabiba Gode Hobe i bobol temo alukum onon tlanea e wengo omyensea i bib mak nakai weng ota afet afet obiba Yuda nakai bib mak bib mako Gode wengo sin ota wafu bianiba alukum te Yelusalem bib ye blibi i unine wenteniba mina bianiba temibta bainobo galin nakaia unangai inaniba wengo afet afet omsiba Yuda naka maki wentibta ba i weng ota obib kesoa wenteniba smiko deibe unoa i bobol temo hekhek omfubesoa baaniba naka eli Galili naka otane i nimin kenibta bib mak bib mak naka nib wengo wente bianibta obibe? Nibo bib mak bib mako bianoba maki Fatia betan da te maki Midia betan da te maki Ilam betan da te maki Mesobotemia betan da te maki Yudia betan da te maki Kabadosia betan da te maki Fontas betan da te maki Esia betan da te 10 maki Flisia betan da te maki Famfilia betan da te maki Isib betan da te maki meb Sailini betano kikibo Libia betan da te bliba eka Lom betano biob nisa inanoba Yuda naka ni tenaboba eka nakai Yuda nib kukubo wafu blib nakai tenanoba teboba 11 eka maki Klit betan ye blib isa eka maki Alebia betan ye blib isa tenanoba mi biob otane naka eli Gode okok sumo klanebio weng sango nib weng omkeimaiba wentobobo geniba 12 i smiko deibe unoa bobol temo hekhek fumbianiba i sinwalo baase baase bianiba kukub olo mitmakamo fatnamine? ge omonsib otane 13 naka maki weng dobo weng oye bianiba Naka eli waen aaye homon dowonibta gabamon temo mimau bebiota nabiobo ge oye monsiobe.

Fitae wengo omkeima bisebe.

14 I inamsiba Fita esa eka Yesuse okok dlasanin nakai mak isa hanamaniba Fitae nakaia unangai baabenea Yuda ibsa eka naka mak unang mak ibsa teniba Yelusalem bib ele blib ibo ne weng ele baabenamabio kla wentine! 15 Ib bobol temo fumbibo Naka eli gabamon tol temo mima fube biota weng namin namin bliobo gabib otane i gabam tol temo mo mima fubeim blimobe. Memale afoko tubutubu tebo olo mole aay misiam unalin amba 16 otane bib mak bib mak nakai wengo afet afet obiba ibo wentib yo sinanggwano Gode weng omkeimalin naka e niniino Yoele weng olo Gode buk temo dolanea baanea

17 
  • Gode baanea Mubiang amo meb tlamo dimo ne Hobe dabaia monea nakaia unangai dimo alukum onon tlanea ib memei alukum unang ten isa naka ten isa i ne wengo omkeimabiba eka ne ib naka tembali inamin namino daam deib aleye biania eka hangkalebminwali daam moton aleye biam blia watememomabiobe.
18 Ae, am olo dimo ne Hobe ne okok kemin naka unang isa dobya i ne wengo omkeimaiba wentenabiba 19 ne inania inamin namin afeto dabalim olo alebenamabio ibo sino mo watemim blimobe. Ilem osa as osa atum osa otabe. Eka ibo abilim uto watemiba ne inamin namin afeto alebenia 20 afoko deskinaia mililana bianoa eka alime deskinaia ilem ananeme dim ota Sume tenamino tam tlamabobe. Am olo dim ota nakaia unangai e okoko wateniba e niniino dobtouleb nomabiobe. 21 Am olo dim ota nakaia unangai Sum ne nganatneib mole ne daabeia i ne naka an ne unang an nanomabiobo ge baanea i Yoele dolanebuo memalo e weng olo yamo balinobo ge baabenea

22 eka e imin baabenea Islel ibo ne wengo kla wentine! Ibo Yesuse Nasalet bib sake tekein kebib yotabe. Sino e dabalim ele bianea ibo bekebe bie dimo Gode titilo omkahabea inamin namin okok sumo ibo sino mo watemim blimo klabea watem tekein kebib yotabe. E bain God eta dabane tlebiobe. 23 Sinanggwano Gode funanea Sinanomo Ne miine dabaia daaknea dabalim daako unameo i kweiban dimo dofanano ge funanebio kesoa inanea Yesuse ib kweiban dimo dofanea debeb moniba Lom sel isu temiba i Yesuse atdimo dabasa silo biki anaiba kaane otane 24 i Yesuse imin hananamin deibo mo waisaim blimobe. Gode Yesuse imin dofaanea kaanamin kukubo omakibilanea hananebiobe. 25 Sinanggwano nib fanine Debite inamin namin olo funanea e Gode buk temo dolanea baanea

  • Ne Sume atemia e amitie ne beketne bianea ne kweile kweitale kikib ye bie kesoa ne nakaia unangai tolo mo tosiambibabo,
26 ne bobolo ayam fumbiania e niniino dobtouleb biania kaanimio imin hananamabibo genia 27 ne kukub olo tekein kebibe. Ne kaanamabi otane kobo ne afen smike haam gloutemo mo deitnenamabebbabo, kobo fumbebo Ne Okok Naka Ayame damo mo klaanemebabo gabeb kesoa ne dame mo klaanimibabo, 28 kobo afen smik deib ayamo aletnenebbu osa eka kobo beketne bieb osa ne kla seimbibo ge baanea dlanebio kesoa

29 nekwal ibo ne weng olo ibo baabenamabibe. Nib fanine Debite kaanea nakaia unangai tom tem wat dofaibbuo e gloutemo sma bua nibo watemobbuo Debite ele weng sango mo dolaim blimobe. Naka afete weng sang ota e dolanebiobe. 30 Sinanggwano Debite Gode weng omkeimalin nakabe. Gode Debite baabanea Keb molofeite komok anea makob kleb ulab anea nakaia unangai kimanamabebo gesea Debite funaneo e wengo bainobo ge funasebe. 31 Sinanggwano Debite weng olo tekein kenea funanea Sinanomo Gode Dofakamin Nakae tenea kaanea imin hananamabebo genea e buk temo dolanea baanea

  • Gode e dame gloutemo amito mo deibaneta klaanamabebabo genebio

nibo tekein kebuobe. Weng sang olo Klaiste weng sangobo ge baabenea
32 eka Fitae imin baabenea Gode Yesus ele imin dofaanea hananea ni alukum atemobbiota oyebuobe. 33 Memalo naka ele Gode debeb utnea abilim ut danea e kweile kweitale kikib ye toumbiebe. Yesuse inanea toumbia sinanggwano Gode baabanea Ne Hobe dobklamabibo ge baabanebuo memalo bain inanea dabalea Yesuse debeisa dabanea daakenea nisu ele tlebe. Ibo inamin namin olo wateniba wengo wentenaib olo Gode Hob eta ni dobyeta atemiobe. 34 Debite weng olo dolanebuo ele dimo mo baaim blimobe. Eka e abilim ut osa mo unim blim na otane e Gode buk temo dolanea baanea

  • Gode ne Sume baabanea Kobo ne kweile kweitale kikib ye toumbianeba inamin namino kima bieba
35 sinanomo ne keb makaai alukum yalia i titilo blimanamabobo ge baabanebiobo genea Debite emaye inangge baanea dolanebio kesoa 36 Islel nakaia unanga ibo ne wengo kla wentine! Ibo Yesuse atdimo dabasa anaibbue Gode naka ele baabanea Kobo ne Kemfakamin Nakaneba komok sum anale genea inanebiobo ge baabesebe.

Naka homon unang homoni Yesuse wengo bainobo gesiobe.

37 Yuda nakai Fitae wengo wenteniba i bobolo ilum omfubenoa i Fita esa Yesuse okok dlasanin nakai mak isa baabeniba Nekwal ibo ni fatnanomabbione? ge baabesiba 38 Fitae baabenea Ibo ib hengmino deiboniba ib bobol temo deskinaniba Gode omaniba Yesus Klaiste niniin dimo aaye fuelaniba Gode ib hengmino omtlabenea e Hobe dobyeko! 39 Sinanggwano God Sume moton wengo baabenea Ibsa ib molobsel walo unaib isa bib mak bib mak sel isa Ib hengmino deiboniba ib bobol temo deskina omoniba ne omnaibo ne Hobe dobyamabibo genebio kesoa nakaia unangai e dlakanebuei inaib mole e Hobe dobyamabebo ge baabenea 40 eka e weng mak osa homon oye biam bianea eka baabenea Ibo nakaia unangai misiami i hengmino kukubo mo wafunimibe! I enin sumo tam tlubenamabobe. Ibo ib bobol temo omoniba Gode omaline gesea 41 naka homon unang homoni Fitae wengo wenteniba bainobo geniba aaye fuelasibi 3000 obe. I inaniba aaye fuelaniba sin bainobo geibbuei tenaniba mi haabisiobe.

Yesuse bainobo galin nakai kukubobe.

42 Yesuse okok dlasanin nakai inaniba aleyebiba bainobo galin nakaia unangai i wengo wente bianiba i sinwalo mibianiba bainobo galin naka mak unang maki daabesese bianiba Yesuse kaanebio bobolo fumbianiba imeno makob olminiba wembianiba eka Gode nganabanom gaib osa miniba i bobol tem makob omfaniba nganha biam bliba 43 Gode titilo omkayebea Yesuse okok dlasanin nakai inamin namin okok sumo klabiba naka homon unang homoni wateniba dlou unaniba obianiba Dowe! Kukub olo fatnamin kukub tam tlebone? ge omonsiobe. 44 Yesuse bainobo galin nakaia unangai inaniba mibianiba i afobeing osa oleb te olminiba baaniba Olo alukum bainobo gabob nibmiobo ge obianiba 45 eka inamin namino oleb moniba naka maki waloniba monio oise tlebianiba eka i dabal osa naka maki deibeiba waliba monio oise tlebiam bianiba olmina bianiba oloniba bainobo galin naka mak unang maki inamin namin blimi okaye binibbiobe. 46 I ina bianiba am obba ye bomanomo bomanomo yo dimo Yesuse bainobo galin nakaia unangai Gode am sumo temo miniba Gode nganha bianiba eka Yesuse kaanebuo bobolo fumbianiba moniba am mak am mako temo mina bianiba imeno wembianiba i imaye bie bie nin kukubo deiboniba naka maki dohalila daabesese bianiba i bobol ayam fumbianiba 47 Gode niniino dobtouleb bliba Yuda naka mak unang maki fumbianiba Bainobo galin nakaia unangai kukubo klayamobo gabiba am obba ye bomanomo bomanomo yo dimo nakaia unangai Yesuse bainobo geniba te watem te watem bianiba homon anibta binibbiobe.

Copyright information for `MPT