Mark 6

Nasalet bib seli Yesuse mo gobanim blimobe.

(Matyu 13:53-58 Luk 4:16-30)

Yesuse bib olo deibonea monea ele bibam unang genea unea e okok aleyemin nakai bekeba onsiobe. E inanea monea ele bibam ye bia Gode singkalin am bomanoa tanea Gode am tam unanea Gode wengo nakaia unangai omkayebea naka homon unang homoni e wengo wenteniba dlou unaniba baaniba Naka ele weng olo fatda omeb tlene? E tekein kemin sum olole fatda tekein ke tlene? Waneta e titilo omaleta okok sum olo klamene? Naka ele ni tekein kebuobo, e am genalin nakabo, Maliao miin etabo, Yems esa Yosis esa Yudas esa eka Saimon esa i hek etabo, e nengwal isa ele bliobo ge baaniba dobsuananiba e wengo mo wentubaim blim deibasiobe. I inahamsiba Yesuse baabenea Bib mak bib mak seli Gode weng omkeimalin nakai kla gobe bianiba i wengo kla wenteyebib otane ili bibam sel isa eka ili dabua tlemin isa eka ili meletan isa ile i mo gobe bianibta i wengo kla wenteyebibbabo ge baabesebe. E bibam seli mo bainobo geim blim kesoa e okok sumo ele bibamo mo klaim blimobe. E besa nakaia unangai elekiem olokiemi gembib biamo ita kweile tofubenea klaye binebiobe. Nakaia unangai mo bainobo geim blim blib kesoa e bobolo usan kehabua fumbianea I fatnanibta inabibe ge fumbianea ele bibo deibonea monea bib mak bib mako meb meb ye bio yota haabianea Gode wengo omkayebisebe.

Yesuse e okok aleyemin nakai 12 i okoko omyensebe.

(Matyu 10:5-15 Luk 9:1-6)

Yesuse e okok aleyemin nakai Dlaia moniba bib mak bib mako haabianiba hob misiami fotebenamine genea nganabenea te misiba hob misiami fotebenamin titilo omyenea baabenea Ibo fong ota tebeletnibta unine! Eka inamin namin afet osa eka imen osa eka meen osa eka moni osa mo oleb unaibe! Skil otabbumin ota otabba unine! Eka youmo dlusa unomabib otane mako mo dleb unaibe ge baabenea nakai asuke dlanea bib mak on bib mak on bliba 10 baabenea Ibo moniba bib mako unaniba amo temo tam unaibo ming yo olo tem ota bianiba aalande deibo watwat haabianibte! 11 Eka ibo moniba bib mak ye temiba bibam seli mo dleb tamniba am tam daim blim keniba eka ib weng osa mo wentubeim blim keib mole ibo bib olo deiboniba ib skilono dabalo glitaniba deibe uniba i yateniba funaniba Ni kukubo misiamobo ge funaine ge baabenea 12 dlanea i Gode wengo ometniba moniba bib mak bib mako haabianiba naka mak unang maki omkaye bianiba baabeniba Ib bobol temo deskinaniba omoniba Gode omaline ge oye bianiba 13 eka hob misiami fotebenaye bianiba eka gembib biamo naka unangi wel aayo tang kunin ayamo oloniba i gabamon dimo alibeniba klaubeiba ayam an biam bliba okok kebinibbiobe.

Yone aa fuayemin nakae kaansebe.

(Matyu 14:1-12 Luk 3:19-20 Luk 9:7-9)

14 Amo yo dimo Yesuse okoko nabeo weng sango bib mak bib mako alukum onon tlanoa balianoa wenteniba tekein ke tlanabiba eka Yudai komok sume Helot esa wentenanabea naka mak unang maki obianiba Yone aa fuayemin nakae sino anaiba kaanebuo memalo imin hanane kesoa e titil omonea okok sumo sino ni mo watemim blimo klabea ni watemebuobo gesib 15 eka maki baaniba Gode weng omkeimalin nakae Ilaiya eta imin hana tebiebo gesib eka maki baaniba E Gode weng omkeimalin nakabo, e makob sinanggwano Gode wengo omkeima binebio etabo gesib namsiba 16 Helote Yesuse weng sango wentenea baanea Sino ne awa genalin nakae dabaia monea Yone gabame waisanea kaanebu eta memalo imin hana bianeta okok kebebo ge baasebe.

17 Sino Helote e heke Filibe alelo omeisane kesoa Yone Helote baabanea Kobo keb heke alelo omeisaneb yole hekmel wengo welanebobo ge baabasea Helodiaso Yone dobsuanasoa Helote awa genalin nakai dlanea moniba Yone afuniba klabuto ge debeb moniba klabut am daibbua 19 Helodiaso dobsuananoa ananang genamsoa Helote tolobo gesebe. 20 Niminbabe, Helote tekein kenea Yone naka kiningobe. E bobol tem funino ayam kesoa e Yone tolo tosiananea tolobo genebua kima bianea e wengo wentenea e bobol asusu fumbianea E wengo fatnamine? gabianea e bobol temo ilum omfubabio otane e Yone wengo kla wentehamonsebe.

21 Helodiaso Yone deibanobua sinanoa Helote e biemo dobmikinobuo amo tlo kesoa naka sum sumi e okoko daaha binabib isa eka awa genalin nakai komokwal isa eka Galili seli naka gang isa baabenea Ibo tliba falo ga dowonomo ge baabene kesoa Helodiaso funanoa I imeno unalaib dimo Yone anaine ge funanabua 22 i dli tete tlaniba imeno unalib dim ole Helodiaso moono tamnoa biin tam unanoa komokwali imen wembibi kin dim ye biin tla blanhasoa Helot esa e bekeb isa kla goboniba komok sume Helote unang sou olo baaboneo Obo nimin dlang genebte? Obo inamin namino dlano gabeb biamo baatnenebta ne doklano ge baabonea 23 e Gode niniino taisanea baabonea Obo baaneba Kobo inamin namino donene genemebo ne doklamabibe. Obo ne baatneneba Kobo inamin namino kima biebo atosino mo waneba kimanano geneb mole waklamabibo gesea 24 unang sou olo wentenoa tamnoa awok osu tam unanoa baabonoa Ne fatnamin ota mo baabaita doneke? gesoa awoko baabonoa Obo taneba Helote baabaneba Yone aa fuayemin nakae gabam eta waisa ofutneneta obutne tele ge baabosoa moono wentenoa hebmamsab imin tamnoa komok sume 25 Helot esu tam unanoa baabanoa Kobo memale Yone gabame waisaneba flet kwame tem daak ofaneba obutne tele ge baabasobe. O funanoa Ne Yone gabame atemnita bain kaanebe genano genota weng olo Helote inangge baabasobe.

26 E wentenea e bobolo ilum omfubano otane e Gode niniino taisanea naka maki e temna imeno wembibi i kin dimo baabonea Ne inamin namino doklamabibo ge baabone kesoa e unang sou olo wengo mo ombiabueim blimobe. 27 E wentenea awa genalin naka make baabanea Kobo moneba Yone gabame waisa obeb tele ge baabanea dabanea monea klabut am unanea Yone gabame waisa obonea 28 flet kwame tem daak ofakanea obeb tenea unang sou olo obuensea eka unang sou osak obeb tamnoa awoko obuensobe. 29 I inaniba Yone gabame waisaiba e okok aleyemin nakai wenteniba teniba dame debeb moniba dofaibbiobe.

Yesuse naka homoni 5,000 i imeno oyensebe.

(Matyu 14:13-21 Luk 9:10-17 Yon 6:1-13)

30 Yesuse okok dlasanin nakai dlanea unibbuei imin teniba Yesus esu ele tlaniba i okoko nabianiba Gode wengo nakaia unangai omkayebi tlibo wengo Yesuse baabasiobe. 31 Nakaia unangai homoni unebe tlebe bliba daaye bianea Yesus esa eka e okok aleyemin naka isa i imeno mo dowonomabibba kesoa Yesuse e okok aleyemin nakai baabenea Ibo hebkeiba nibo monoba naka blim ibuantem ye unanoba ibo sinaibte ge baabe dletnea 32 i weseme obetniba moniba naka blim ibuantem ye unib 33 otane naka homon unang homoni yatemiba i unib kesoa yatemniba nakaia unangai bib sum sumo blibi alukum dalo obetniba Yesuse mema weseme tem bebea ita sin gaisaniba moniba ibuantem ye bebiba 34 Yesuse weseme obeb watnea ken wat obanea daak tlanea temea naka homon unang homoni teniba waisa blib kesoa yatenea kla dohalilanea funanea I makob eil sibsibi i kimanini blim bliba nabinabibi ulabobo genea e Gode weng homono omkaye monsebe. 35 E inayebea afoko dawabbanoa e okok aleyemin nakai teniba baabaniba Betan olo naka blim kesoa afoko dawabbanang gobo 36 kobo nakaia unangai dlaneba moniba bib gwab gwabo meb meb ele buo olo imeno mo walo doweine gesiba 37 Yesuse baabenea Ibo i mo dlaiba unaibe! Ibmaye imeno oyine gesea e okok aleyemin nakai baaibo Kobo fumbebo ni K200 o fatda olonobta imeno walonobta nakaia unanga eli oyomabbione? gesiba 38 Yesuse baabenea Ib bleto fatnamin olaibbione? Moniba watemine gesea i moniba watemniba baaibo Blet gwabo 5 olanoba eka aningi asu olananobbiobo gesiba 39 Yesuse wentenea baabeneo Ibo nakaia unangai baabeiba teniba bukuban dim ele heba toun heba toun bianiba maki 100 toula maki 50 toula bisibte gesea i baabeiba inaniba toulasiba 41 Yesuse blet gwabo 5 o olonea eka aningi asuei olonanea wafu bianea abilim ut teme bianea Gode gangobo genea blete sin obo hanea e okok aleyemin nakai oyensea oloniba nakaia unangai kikibeib ole eka aning asu osak olo hanea oya olo kikibenasiba 42 unam biniba matwayensoa 43 atosino olaib kesoa Yesuse okok aleyemin nakai oloniba tlit meeno 12 o tem daak basiobe.

44 Nakai imeno yo dowonsibi 5,000 obe. Unanga tena isa imen olo dowonsib otane i mo kieim blimobe. Naka gangi ilita kieibbiobe.

Yesuse Galili aamuke dang dim wat mama onsebe.

(Matyu 14:22-33 Yon 6:15-21)

45 Omito Yesuse e okok aleyemin nakai baabenea Ibo weseme obetniba sin watniba aamuke milim Betsaida bib emwale waitneine ge baabenea dlanea uniba deibenea 46 e elekiem bianea nakaia unangai dlane onon tlaiba deibenea e utnea amgolim ut bianea beten kebea 47 kwinota Yesuse okok aleyemin naka ile weseme obetniba watniba aamuke isak mimiabe watye bebiba eka Yesus ele elekiem amgolim ut beten kebinea daakenea ninin dim ele mabianea 48 temea e okok aleyemin nakai glole sume tenea fube dletnea alang tla unebea bumolok bianiba walbibiba amo ye bomanang genoa bing geno kesoa yatemnea aalang dim wat mama metnea gaise unang genamsea 49 e okok aleyemin nakai temiba e aalang dim wat mama tla monang genabe kesoa ateniba funaniba Winiminobo geniba kla tosiam bianiba ngansiba 50 Yesuse hebmamsab baabenea Ibo ib bobol temo mo dlou uneyebota tosianimibe! Netabo genea 51 daaknea weseme tem daak tounabea glole desea e okok aleyemin nakai ateniba dlou onsiobe. 52 Niminbabe, i Yesuse bleto 5 o nakaia unangai homoni oya doweibso e titil olo o bobolo mo funaim blimobe. I tobtlim bianibtabe.

Yesuse ginin gami homoni Genesalet betan ye klaye monsebe.

(Matyu 14:34-36)

53 I inaniba weseme obetniba aamuke yalaniba watniba Genesalet betan wat unaniba weseme ye obginabiba 54 nakaia unangai hebmamsab Yesuse atem tekein keniba 55 nakai blu blu moniba betano yo bib mak bib mako alukum onon tlaniba baaiba Nakaia unangai gembibi glouto gena dletniba tlebianiba naka mak unang maki deib ye biaibo dlo baabeniba Yesuse fab biene? geiba i baaniba E bibo yota biebo genimibo wenteniba dleb motem dleb motem bianiba 56 eka Yesuse monea bib sum osa eka bib gwab osa eka alukum bib mak betan mak yosa haanemeo i gembib naka unangi ge dleb moniba e bibo tlamabe unamabe ye doka bianiba baabaniba Kobo ginin gami deibeneba i kweilo keb youme ken eta melebaniba i ginino ayamu benoko gesiba e deibenea i inaniba e youme melebaibi ginino alukum ayamu besobe.

Copyright information for `MPT