Titus 2

Weng ayam ota amitie wafu nine!

Ina otane kobole ni Gode weng ayamo alebkenobbuo weng ota naka mak unang maki aleyemale! Kobo hangkalebminwali baabeneba Ibo aay misiamo mo dowonibta weng namin namin nimibe! Ibo kukub ayam ota wafu bliba naka mak unang maki yateniba baaniba I naka ayamobo ge oyebiba ibo bobol tem funin ayam osa kukub ayam osa kla wafu bianiba ib bainobo galino sbal maniba naka mak unang maki gobe bliba eka naka mak unang maki teniba ibo enino omkayemibo ib bainobo galino sbal maine ge baabenale!

Eka konokmonwal isa baabeneba Ibo Gode bobolo fumbianiba e kukubo kla wafueine! Ibo naka mak unang maki weng dobo wengo mo oye bianiba eka aay misiamo mo wembiam nimibe! Ibo unang maki kukub ayam ota aleyemine ge baabeneba eka isak unangi souwali imaksai baabeniba Ibo ib imakwal isa meme isa kla gobe bianiba ib bobol tem funin ayam osa kukub ayam osa kla wafueine! Ibo bobol tem misiamo mo funanibta Ni imakwali deibenoba naka elita taman deib dletnine ge fumbianibta mo inamibe! Ibo ib amo okoko kla okok kebianiba eka naka mak unang maki daaye bianiba ib imakwali wengo kla wente biam bliba naka mak unang maki ib kukubo nabibo yateniba Gode weng dobo wengo ohamino deibueine ge baabeine!

Eka kobo naka tembali baabeneba Ib bobol tem funin osa ib kukub osa kla kimaine ge baabenale! Eka Taitas kobole kukub ayamo sbalma wafu bieba i keb kukub nabebo kateniba isa kukub ayamo yota wafueine! Kobo Gode kukubo i aleyemabebo bain weng ota i aleyemale! Dim wengo mo oyemebe! Kobo bain wengo naka mak unang maki omkayebebo amitie oyemale! Kobo inamebo naka mak unang maki mo oke bianibta E weng olo misiamobo ge okemomabibbabe. Kobo inameb mole nakaia unangai keb weng olo omkayebebo weng dobo weng okebibi aalo waisenamabobe. Niminbabe, i tekein keniba nib wengo molot kesoa i weng misiamo imino mo baabenomabibbabe.

Kobo nakai moni okokba besa okok keyemin nakai baabeneba Ibo ib kimanin nakai wengo kla wenteye bianiba okoko kla okok kebiba i ibo seinyemine! Ibo ib kimanini weng misiamo mo oye bianiba 10 i afobeingo ayoko mo henye biam nimibe! Ibo ib kimanini okoko amitie kla okok kebiba i ibo oye bianiba I naka molotobo, i Gode wengo wente bianiba okoko kla okok kebib kesoa nib hengmino temo dotlanebio nakae Gode wengo ayamobo ge omine ge baabenale!

11 Gode nakaia unangai daabenano gene kesoa e miine Yesus Klaiste dabanea daakenea dabalim ele tlanea at dimo kaanea nibo hengmin temo blibo dotlabenebio kesoa nibo amit nomabbiobe. Nibo yo tekein kebuobe. 12 Sino nibo Gode wengo omdibi bianoba dabalim olo kukub misiam ota wafu biob otane memalo Gode nibo daabenea kukub ayamo alebene kesoa nibo kukub misiam olo deibonobbiobe. Memalo nibo bobol tem funin ayam osa kukub ayam osa ota wafu bianoba Gode bobolo fumbianoba e wengo wafu biobobe. 13 Nibo ina bianoba nib Sume Gode tlamabeo waisa biobobe. Am olo dim ota nib hengmino temo dotlanebio nakae Yesus Klaiste e titilo ayal inamin tubuein kenebua tlea nakaia unangai atemomabiobe. 14 Sino e abilim ut bie dimo e funanea Ne daatnia atdimo kaania nakaia unangai hengmino walubenano genea daakenea atdimo kaanea nib hengmino walubenebio kesoa nibo kukub misiamo deibonoba bobol ayam fumbianoba e naka an e unang an nabianoba E kukub ayamo kla wafunomo gabuobe.

15 Kobo weng olo nakaia unangai omkayemale! Kobo bainobo galin nakaia unangai kimanin naka kesoa i sbal weng oye bianeba Ibo kukub misiamo deiboniba kukub ayam ota wafunine! Ibo ne weng olo mo omdibimibe ge baabenale!

Copyright information for `MPT