b1:7Tuwa 7:17
c1:8Tuwa 7:18
d1:10Tuwa 7:19
f1:22Tuwa 7:19

Exodus 1

Yehoba Mosese I Lovivina-an ge I Patuna

(Awalehina 1—4)

Isileli Hi Miloloyowan Itipita

a Yakobo natunau bolau bolo alonau hi nok hi na Itipita avaliyau ge natuliyau alaliya i ola hiwe: Lubeni, Simiyon, Libai, Yuda, Isaka, Sebuloni, Beniyamina, Dani, Napitalai, Gada ge Aseli. Bolo ya Yakobo natunau ge tubunau ali gewi sebenti. He natuna Yosepa iyoho Itipita.

Hi minamina ee, yaka abwe Yosepa ge talinau, heliya ha bolo o, hi yaomal haba. b Yaa tubuliyau Isileli hi talaabab yaka hi gewi nabi, inoke Itipita hi pakalaopop.

c Yaka abwe kin vavaluna etega hauna Yosepa i ginol Itipita wasana nige i aatena i milil ge i tologugui Itipita. I baek wana gamagalau eliyalil i ba, “Isileli iyaka hi gewi nabi, he kila wala abanak etega to. 10  d Binimala ebo tolohaveyan enuna nihi vin, nasi Isileli nihi na avaliyau nihi boda pamaisena ge nihi haveyan elala, inoke wala panuwa nihi louluwan. He nuwatu etega ta ginol ge bahi nihi gegewi al.”

11 Inoke Itipita Isileli hi paloloyowan-agil. Ali tomatahikan hi telel tuwalali gasigasisena hi pek tage yawaliliya nihi apanak. Yaka Isileli taun bwabwatal Pitom ge Lamesese hi talil, kin wana bugul ana abapwahipwahin. 12 Yaa sauga Itipita Isileli yawaliliya hi apapanak-an, yaka heliya ali gewi i heheya ge wali awan hi pwabwaya al. Yaka Itipita hi lovakun Isileli eliyalil, 13 inoke hi ba tuwalali pupulowanina hi ginol ge i papanuwaleyan-agil. Hi patuwalali-agil limi hi taltal ge eyowa hi awaawaginol, nige hi nunuwanak-agil.

15 Yaka Itipita wali kin i liwaliwan yowau labui, Sipila ge Puwa elal, heliya Hibilu
1:15Alan Hibilu ge Isileli ali sapu maisena. Boda maisena, yaa alaliya labui.
yowauiliyau ali topapaab.
16 I ba, “Sauga Hibilu yowauiliyau nuku label ab elana, ebo nihi ab melutau, yaka nuku pipaaliga. Yaa ebo meluyova, he nuku pwamolu.” 17 Yaa topapaab hi lovakun Yabowaine elana, inoke nige hi giginol ola kin wana baaba yaka nige melubolau hi pipipaaligal. 18 Inoke kin i ba topapaab hi nem elana ge i nelil i ba, “Hauna kaiwena ku ginol ola o? Hauna kaiwena bolau ku pwamolol?”

19 Anana hi lahe hi ola, “Hibilu yowauiliyau nige hi oola Itipita yowauiliyau. Heliya hi gasisi ge wali abab i mweyaha, inoke hi ab ga mulaa abwe ama ha vin.”

20 Yabowaine yowau labui i label totoliya natuliyau i pek elal, kaiwena hi lovakunan. Yaka Isileli ali gewi i haha al, ge hi gewi nabi hot.

22  f Yaka abwe kin logugui i ginol ge i baek wana gamagalau gegewel elal i ba, “Hibilu wawayaliyau memelol bolo melutauil nuku aliyohil wewel Naile elana nihi unun, yaa bolo meluyowau nuku pwamolol.”

Copyright information for `MPX