Exodus 20

Logugui Elulutega

Yabowaine i ba i ola hiwe, “Nau Yehoba wami Yabowaine, ya ahemiwa Itipita wami abaloloyowana.

“Bahi yabowaine etega al nuku kukululuek elana, nau maiseu ya.

a “Bahi gogoginol etega nuku giginol kaiwemiu, ebo labulabum bugulina kakanunina, ebo panayawi bugulina kakanunina, o ebo hoga bugulina kakanunina. b Bahi nuku kukululuek gogoginol etega elana o ebo nuku tatapwaloloek elana, kaiwena nau Yehoba wami Yabowaine nige ya tatalam o toawalaka ni gan. Lahi na pek o topihigelgel elal. Lahi ya ni kalapapanet natuliyau, tubuliyau ge tubuliyau natuliyau elal. Yaa bolo hi nunuwana-agau ge no logugui hi henapuan, na nunuwana-agil heyan ge heyan nige ni momowasi.

c “Bahi nau Yehoba wami Yabowaine alau nuku lulumen bwabwage, kaiwena ebo etega alau ni lumen bwabwage abwe na lahe.

d “Lan Sabwata nuku nuwahikan ge nuku teli ni bwabwalena. e Wami tuwalali nuku ginol lan sikis gamwanaa, 10 yaa lan sebenina elana lan veyaho i bwabwalena elau. Lan yaka bahi etega ni tutuwalali, ebo komiu, ebo natumiyau, ebo wami totuwalali, ebo wami bwasumu, o ebo bwabwali bolo hi miminaa wami panuwaa. 11  f Nau Yehoba, panayawi, labulabum, hoga, ge buguliliyau gegewel ya ginolil lan sikis gamwanaa, yaa lan sebenina ya veyaho. Heiya te kaiwena lan Sabwata ya ba muloluan ge ya teli i bwabwalena.

12  g “Tamwam ge hinam nu awatauwagil, inoke yawalim ana minamina ni yapu panuwa toto na pewa elana.

13  h “Bahi taulol.

14  i “Bahi ganawal.

15  j “Bahi kaoma.

16  k “Bahi woliwoli kakakawi.

17  l “Alom wana limi, ebo lagona, ebo wana totuwalali bolau ge yowau, ebo wana bulumwakau, wana donki ge wana bugul gegewena, bahi etega matam ni momomoni-an.”

Gamagalau Hi Lovakun

18  m He gamagalau gulumwawa ge bwagigi anana hi hago, i ola al pinamal ge oya i kasukasu hi kite, yaka lovakun kaiwena hi ginuginu. Inoke hi talmililek laha, 19 ge hi baek Mosese elana hi ba, “Owa nu baaba eliyama ge naha laegan elam. Yaa bahi Yabowaine totona ni baaba eliyama, eba naha aliga.”

20 Analiya Mosese i lahe i ba, “Bahi lovakun. Yabowaine i nem wana gasisi amnana nuku anbose, inoke iya ana lovakun ni minaa eliyamiu ge bahi nuku gegegi eliyana.” 21 Yaa gamagalau iyoho ya hi milimilil laha, inoke Mosese maisena i noha yaluyalu babalona elana, toto Yabowaine i miminaa.

Yabowaine Gogoginol ge Abapowon Baliya

Yaka Yehoba i baek Mosese elana i ba, “Nu baek Isileli elal ni ola hiwe. Bahi yabowaine etega al nuku giginol, nau maiseu ya.” Yaka abwe i ba wali abapowon ga nihi tal ola iya ana tapwalolo kaiwena. (puna 22-26)

Copyright information for `MPX