Exodus 24

Bateli Houhouwena ana Patunahot

Yehoba i baek Mosese elana i ba, “Alomwau Eloni, Nadab, Abihu ge Isileli wali tonowakau ali gewi sebenti nuku ha oyaa eliyau. Nuku minek laha ge nuku tapwalolo elau. Owa maisem ya te bosowaim nu nem labewa, yaa alomwau bahi nihi nenem labewa, ge gamagalau bahi nihi haha oyaa.”

Yaka Mosese i na i lau Yehoba wana baaba ge wana logugui gegewena i wasaanik gamagalau elal. Inoke gegewel pamaisena anana hi lahe hi ba, “Bugul gegewena toto Yehoba i baunan naha ginol.” Inoke Mosese Yehoba wana baaba gegewena i leli lowan.

Lan i gan mweluluga kekeisi i na oya punaa, yaka pat i pahe abapowon i ginol, ge pat elulutega eluwa al i pamilil, ali gewi i olaolaek Isileli ali un.
Yaka hevalau enuna i hilel ge i patunal bulumwakau hi powonagil Yehoba elana, enuna hi powon pwabwaligel ge enuna hi powonagil heliheliyam powonina. Mosese bwasumu saliyaliya awalehina i ahe i holek mwaha gamwanaa, ge awalehina i ahe abapowon i hol seuseulan. Yaka buki toto Yehoba wana bateli eliyalil ana logugui i leli lowana, i ahe i vasili gamagalau tanaliyaa. Yaka hi talam hi ba, “Yehoba anana naha henapuan, ge bugul gegewena toto i baunan naha ginol.”

a Yaka Mosese saliya ana mwaha i ahe gamagalau i hol seuseul-agil, ge i ba, “Saliya ya bateli toto alomiu Yehoba ku pebabateli-agimiu i patunahot. Bateli o ana logugui i ola baaba gegewena toto iyaka ya vasili eliyamiu.”

Yaka Mosese alonau Eloni, Nadab, Abihu ge Isileli wali tonowakau ali gewi sebenti hi na hi ha oyaa, 10 inoke Isileli wali Yabowaine hi kite. Aena gabulanaa bugul mamanana sasapona ana awa i ola pat sapaya,
24:10Sapaya iya pat ana awa waiwaisana ana kala bulu.
ge i namanamal i ola alalati bwagatau labulabum namanamalina.
11 Yaa Yabowaine nige nak etega i giginol Isileli wali tonowakau elal. Hi kite, inoke hi anan ge hi im Yehoba matanaa.
24:11Ebo boda labui hi pebabateli-agil, yaka enowana nihi ginol nihi anan toyawa. Mosese alonau tonowakau hi anan ge hi im, ana nuwatu i ola bateli toto Isileli avaliya Yehoba hi pebabateli-agil ananina to.


Mosese Alona Yosuwa Hi Ha Oya Sainai

12 Yehoba i baek Mosese elana i ba, “U nem u ha oyaa elau ge nu miminaa te. Pat mamanana sasapona labui abwe na pewa, toto gamagalau ali logugui ge ali ba pagasisi iyaka ya leli.”

13 Mosese alona ana tolabe Yosuwa hi lovivina ge nihi ha oya bwabwalena. 14 Inoke Mosese i baek tonowakau elal i ba, “Ku matamatan te abaholaviya ana siga naha sikalim. He Eloni ge Huli iyahei alomiyau, inoke ebo gamagalau labui bugul etega kaiwena nihi awabalgig, nihi nok nihi kitel.”

15 Sauga Mosese i na i ha oyaa, yaka yaluyalu oya i yabom, 16 ge Yehoba mwananalina namanamalina i lau oya Sainai. Isileli hi kite ana awa i ola ginaha tautauina oya pwatanaa. He lan sikis yaluyalu oya i kaus, ana siga lan sebenina elana abwe Yehoba i yogem yaluyalu gamwanaa Mosese elana. d Yaka Mosese i nosola yaluyalu gamwanaa ge i na i ha oya pwatanaa. He i miminaa oyaa lan poti ge bulin poti.

18 

Yehoba I Ba Petupatupa Limena ge Bugulina Ga Nihi Ginol Ola

(Awalehina 25—31)

Copyright information for `MPX