Exodus 30

Bugul Bwalena Waiwaisana ana Abatonton

Bugul etonina Aban Bwabwalena gamwanaa te bugul bwalena waiwaisana ana abatonton. Yehoba i ba nihi ginol ebwakil alana akesiya ge gold elana. (puna 1-6) Yaka i ba:

“Mweluluga gegewena sauga Eloni odam ni pabolol ge ni abubunil, yaka bugul bwalena waiwaisana ni ton ana abatontona. Ge kokoyavi gegewena sauga odam ni tonil, bugul bwalena waiwaisana ni ton al. Inoke heyan ge heyan bugul bwalena waiwaisana topowon nihi tonton ge kasona ni haha nau Yehoba maniniwa.” Baliman maisena ge maisena Eloni bugul bwalena waiwaisana ana abatonton ni pwabwabwalena. (puna 9-10)

Silba Maisena Nihi Pek Yawaliliya Molana

Yehoba i ba, “Sauga Isileli ali gewi nuku vasili, tau maisena ge maisena yawalina molana ni pwamola nau Yehoba elau. Inoke sauga gamagalau ali gewi nuku vasili, nige logabola nanakina etega nuku pwapwawa. Tau maisena ge maisena silba kekeisi ni pewa elam ge nuku patuwalali Petupatupa Limena ana tuwalali kaiwena.” (puna 11-16)

Abaulul

Bugul eluwana Petupatupa Limena tolinaa gana gamwanaa heiya abaulul. Yehoba i ba abaulul nihi ginol kopa elana. Sauga topowon nihi tuk Limi elana, houwa nimaliya ge aeliya nihi ul. (puna 17-21)

Enonu ge Bugul Bwaleliya Waiwaisal

Yehoba i ba enonu waiwaisana nihi ginol inoke limi tapwalolo bugubugulina nihi hol seuseulan. Ge i ba bugul enuna bwaleliya waiwaisal nihi vikuhu ge nihi ton limi tapwalolowa. (puna 22-38)

Copyright information for `MPX