Exodus 35

Lan Sabwata ana Logugui

Mosese boda Isileli gegewel i pamigogoil ge i baek elal i ba, “Logugui bolo Yehoba i ba nuku toulil i ola hiwe. a Wami tuwalali nuku ginol lan sikis gamwanaa, yaa lan sebenina elana lan veyaho i bwabwalena nau Yehoba elau. Lan o henala ebo tuwalali etega ni ginol nihi lopaaliga. Bahi ginaha nuku toton wami abaholaviya lan Sabwataa.

Gamagalau wali Mulolu Hi Pwatanim

Mosese i baek boda Isileli gegewel elal i ba, “Yehoba wana baaba i ola hiwe. Henala atena i talam, inoke bugul bolo i gan elana ni ahe ni pwatanim ge ni muloluan Yehoba elana.”

Yaka bugul bolo nihi pwatanim Mosese i baunanik, ololana gold, silba, kopa, hihiu kaliko waiwaisana kaiwena, ge bwasumu kunisina, i ola al ebwakil waiwaisana alana akesiya, enonu, mwawin bwaleliya waiwaisana ge pat waiwaisal. (puna 6-9)

Yaka bugul bolo abwe nihi ginolil i baunagil i ola hiwe: limi, Bateli ana Dedewaga, beleid bwabwalena ana teibol, odam ali abateli, bugul bwalena waiwaisana ana abatonton, abapowon, abaulul, gana, nog ge topowon ali kaliko. (puna 10-19)

20 Isileli gegewel Mosese hi eguluwan hi na wali epanapana elal. 21 Inoke bolo ateliya i talam ge hi yaliyaya, wali mulolu hi pwatanim Yehoba elana Petupatupa Limena ana taltal kaiwena, i ola al ana etuwalali gegewena ge topowon ali kaliko kaiwena. 22 Bolo ateliya i talam, bolau ge yowau, tuwan ana isela gold ona, ololana komwakomwa, niman aana ge bobot, hi pwatanim ge hi muloluan Yehoba elana. 23 Bolo hihiu ali kala bulu, pepol ge keketina o ebo hihiu kaliko waiwaisana kaiwena
35:23Sipi pupunona hi losa hihiu ali kala bulu, pepol ge keketina hi ginoliya, ge mwawin palakes nuwana hihiuina hi losa hihiu kaliko waiwaisana kaiwena hi ginoliya.
hi gan elal, bolo goti pupunona hi gan elal, bolo sipi kunisina hi kale i ket hi gan elal, ge bolo bwasumu kunisiliya waiwaisana hi gan elal, he hi ahel inoke hi pwatanim.
24 Bolo hi yaliyaya silba ge kopa nihi pwatanim, hi ginol ola ge hi muloluan Yehoba elana. Ge bolo ebwakil alana akesiya i gan elal, hi pwatanim totaltal nihi patuwalali. 25 Yowau bolo losalosa ana toatena sipi pupunona hi losa i tabwa hihiu ali kala bulu, pepol ge keketina, o ebo palakes hi losa i tabwa hihiu kaliko waiwaisana kaiwena, yaka hi pwatanim. 26 Yowau bolo hi yaliyaya ge goti pupunona ana losalosa hi atena, hi losa i tabwa hihiu. 27 Tohouwa pat waiwaisal ona, kaneliyan ge enuna al, hi pwatanim inoke totuwalali nihi teliya topowon bwabwatana ana kaliko ipod ana egimwan elal ge nihi am hikan babagal ana kama elana. 28 Bugul bwaleliya waiwaisal ona ge olibe enonona hi pwatanim, inoke totuwalali nihi patuwalali odam ali wewel, i ola al enonu toto epaepaenonu ge bugul bwalena waiwaisana toto hi toton nihi ginolil. 29 Isileli bolau ge yowau bolo ateliya i talam, alona wali yaliyaya wali mulolu hi pwatanim Yehoba elana tuwalali kaiwena, toto Yehoba i baunanek Mosese elana nihi ginol.

Petupatupa Limena ana Totaltal

30 Yaka Mosese i baek Isileli elal i ba, “Yehoba Besaleli, Uli natuna, Huli tubuna, ana un Yuda, iyaka i hile, 31 inoke Yayaluwana eliyana i pakalaopopwi siba ge aatena i pek elana tuwalali tomaha tomaha kaiweliya. 32 Lokilkil ali un puna i atenal bubun ni ginola gold, silba ge kopa elal, 33 pat waiwaisal ali vagavagal i atena, ge ebwakil ana taltal ge ana kilkil i atena. He bugul tomaha tomaha ali tuwalali i atena. 34 Alona ge Oholiyab, Ahisamak natuna, ana un Dani, Yehoba siba i pek elal gamagalau enuna al tuwalali nihi paatenal. 35 Siba i pek elal tuwalali gegewena hi atena. Lokilkil ana un puna hi atena, ge palupalul hi atena yaka matan hi ginol hihiu ali kala bulu, pepol ge keketina ge hihiu kaliko waiwaisana kaiwena elal. He tuwalali tomaha ge tomaha hi atena bubun.

Copyright information for `MPX