Genesis 6

Gamagalau Hi Gegi

Sauga gamagalau hi gewi hi debalala panayawiya ge natuliyau yowau hi abil hi gewi, he Yabowaine natunau melutauil
6:2“Yabowaine natunau melutauil” ana talisi tomaha ona. Totalisi enuna hi ba heliya aneloseyau, inoke heiya te kaiwena natuliyau hi hul kantutubwai (puna 4). Totalisi enuna hi ba heliya gamagalau hot ya. Abatelipuna 4:26 i pamasal Seti ge tubunau hi tapwalolo Yehoba elana. Yaa sauga mulaa al tubutubunau hi lut bolo nige hi tatapwalolo Yehoba elana natuliyau hi alolonagil, ebo ta ba panayawi gamagaliliyau natuliyau yowau. Tabam heliya Keni tubutubunau, heliya gamagalau nanakil (Abatelipuna 4:16, 23).
panayawi gamagaliliyau natuliyau yowau hi kitel ali awa i lowaisi hot, inoke bolo nuwaliya i noek hi alolonagil.
Inoke Yehoba i ba, “Yawal toto ya pek gamagalau eliyalil nige ni mimihot. He heliya gamagalau ya, yawaliliya abwe ni mowasi. Inoke yawaliliya ana yapu besena te baliman 120.” b He sauga Yabowaine natunau melutauil avaliyau panayawi gamagaliliyau natuliyau yowau hi kenu toyawa, yaka hi ab natuliyau hi hul kantutubwai. Inoke saugena o ge sauga o enaa al, gamagalau ololal o hi gan, heliya toasiyala bolo houhouwel, alaliya bwabwatana.

c Yehoba i kite gamagalau wali gegi i bwata nabi ge nuwatu nanakina ya te hi mimi nuwanuwatu-an ateliyaa. Yaka nuwana i nak ge i ba, “Hauna kaiwena gamagalau ya ginolil ya telel panayawi ge hi gegi?” Inoke atena i palomwan nabiyan. Yaka i ba, “Gamagalau bolo ya ginolil, avaliyau bwasumu bolo hi nawanawa, bolo hi yawayawal ge bolo hi youyou, gegewel na pwamowasel. Nuwau i nak te ibwe ge ya ginolil.” Yaa Yehoba Nowa i awa wawaisian ge i yaliyaya-an.

Nowa Liwanina

(6:9—9:29)

Yabowaine I Ba Nowa Waga I Ginol

d He Nowa alonau natunau liwaniliya i ola hiwe.

Nowa wana pagan i sapu ge iya maisena ya sauga o gamagaliliyau gamwaliyaa nige wana ginol nanakina i gagan, yaa i mipalalek hot Yabowaine elana.
10 He Nowa natunau bolau eton alaliya te Semi, Hami ge Yapeta.

11 Yabowaine matanaa gamagalau panayawi wali ginol i nak nabi ge lohalohaveyan i gasisi labena gegewena elal. 12 Yabowaine i kite panayawi iyaka i nak hot gamagalau gegewel wali pagan nanakina kaiwena. 13 Inoke i baek Nowa elana i ba, “Ya nuwatu gamagalau gegewel ge panayawi na apanakil nihi mowasi, kaiwena wali lohalohaveyan i gasisi labena gegewena elal. 14 Inoke kewadi waiwaisal nu ahel nu talil wam waga etega nu ginol. Baba tomwa ona nu ginolil gamwanaa, yaka kolta
6:14Kolta i biki hot, i neem oel ge bugul ololal o elal ge i papap. Ebo i waiwai i meimei, yaa ebo i tultul i gasisi, inoke valila hi patuwalali waga dimdim ana ebal.
nu ahe gamwanaa ge tolinaa nu ebaliya.
15 He nu ginol ni ola hiwe: ana yapu 140 mita, ana magaga 23 mita ge ana miha 13.5 mita. 16 Pwatana nu kaus ge hawawal ana bwata ni ola 50 sentamita ni gan ana vavan ge ana helhel ali hawawala. Ana nog nu ginol bebenaa, ge gamwana eton nu ginolil, etegana paiya, etegana nuwanuwanaa, ge etegana natiya. 17 He nau abwe kehe na patuna panuwa ni tub ge nub ni ha, yaka bugul gegewel bolo hi yanayana yoho ni apanakil. Inoke bugul gegewel panayawi pwatanaa nihi aliga. 18 Yaa owa elam no bateli na ginol na pwamwalimiu. He alomwau lagom, natumwau ge lagoliyau, nuku na nuku ulutuk wagaa. 19 Bwasumu gegewel yawaliliya gaganina, eluwa eluwa, tau ge yova, nu ahel, inoke bahi nihi aaliga. 20 Bwasumu bolo hi youyou gegewel, bolo hi nawanawa gegewel ge bolo hi yawayawal gegewel, eluwa eluwa alomwau nuku tuk wagaa, inoke bahi nihi aaliga. 21 I ola al aanan tomaha tomaha ona nu ahel ge nu bugul tukagil alomiyau ge bwasumu amiu.” 22  f Inoke Nowa bugul gegewena i ginol i ola Yabowaine wana baaba.

Copyright information for `MPX