Hebrews 1

Yeisu Aneloseyau I Bwata Lakel kaiwena Iya Yehoba Natuna

Valila sauga tomaha ge tomaha ge kamwasa tomaha ge tomaha elal, tubulau Yehoba wana baaba hi hagowa palopitau elal, yaa sauga ya elana, iya sauga mowamowasena, Yehoba wana baaba ta hagowa Natuna elana. Iya eliyana Yehoba panayawi ge labulabum i ginolil, ge iya Yehoba i hile abwe bugul gegewena ni minek elana ge ni logugui-an. a  Iya Yehoba wana wasawasa mwananalina ge iya i ola hot Yehoba. Iya wana baaba ana gasisi i gan inoke baaba o eliyana bugul gegewel bolo hi gan i pagasisi-agil ge hi gangan ya. Iya i yaomal gamagalau wali gegi ni ul yoho, yaka i na labulabumwa ge i misiyowa Yehoba Tobwabwatana Hot labena awonaa. b  Inoke sauga ya iya aneloseyau i bwata lakel, i ola te alan mihahaina toto Yehoba i tun pwatanek elana aneloseyau alaliya i lake. c 

Iya alana i miha, kaiwena Yehoba iyaka i baek elana i ba:

“Owa natu;
lan ebe ya awa natunagiwa.”
Ge iya bana Yehoba i ba:

“Nau na ola Tamana,
ge iya ni ola Natu.”
Yaa nige sauga etega Yehoba i babaa ola to aneloseyau kaiweliya. d 
I ola al, sauga Yehoba Natuna gamaun i patuna i nem panayawiya, inoke i ba, “No aneloseyau gegewel nihi kululu elana.” e 

He aneloseyau baliya Yehoba i ba:

“No aneloseyau ya ginolil nihi ola mana,
heliya no totuwalali nihi ola ginaha memena.” f 
Yaa Natuna bana i ba:

Yabowaine owa, wam
abalogugui i mihot nige ni momowasi;
alom ge wam pagan sasapona
wam gamagalau u logugui pasapol. g 
Pagan sasapona u
yaliyaya-an ge pagan nanakina u towani,
inoke ginebi ge wam
yaliyaya bwabwatana, nau wam Yabowaine
enonu ya ligin kokowamwa
ge ya telewa alomwau nu logugui-agil.
10 I ola al Yehoba i baek Natuna elana i ba:

Babala, abatelipuna elana owa panayawi u ginol,
ge labulabum iya nimwam mulina. h 
11 Panayawi ge labulabum
nihi mowasi, yaa owa nu mihot.
Heliya nihi nak ni ola
kaliko i beyaunana ge i nak.
12 Abwe nu ginol ola-agil ni ola holahola hi gagabom,
abwe nu pil getogaagil ni
ola gamagalau ali kaliko hi sesensi.
Yaa owa nige u gegetoga,
ge yawalim nige ana abamowasi i gagan.
13 He Yehoba i baek Natuna elana i ba:

“U misiyowa labeu awowa
ana siga am topihigelgel
na teli lowagil aem gabulanaa.”
Yaa nige sauga etega i babaa ola to anelose etega elana. i 
14 He aneloseyau henalau? Heliya yayaluwa hi totuwalali Yehoba elana ge i papatunal gamagalau bolo abwe pwamwal hi aahe hi lalabel. j 

Copyright information for `MPX