a8:30-32 Log 27:2-8
d8:33-35Log 11:29, 27:11-14

Joshua 8

Panuwa Ai Hi Pasamwalekaleka

Yehoba i ba yaka Yosuwa alonau wana tolohaveyan hi nok al Ai, yaka saugena o Ai hi pakokovel, yaka panuwa hi ton ge hi pasamwalekaleka. (puna 1-29)

Yosuwa Bateli I Ba Pavavaluna Isileli elal Oya Ebal elana

30  a Sauga etegana al Yosuwa alonau ge Isileli gegewel hi na Oya Ebal, inoke Yosuwa pat i pahe abapowon etega i ginol Yehoba Isileli wali Yabowaine kaiwena. 31  b I ginol i ola ana logugui, toto valila Yehoba wana totuwalali Mosese i baunan Isileli elal ge i leli wana Logugui ana Buki gamwanaa i ba, “Pat bwabwaligel bolo nige etuwalali aiyan elana hi tatal pasapu-agil te nuku ahe abapowon nuku pahe.” Yaka abapowon o pwatanaa bwasumu enuna hi powon pwabwaligel Yehoba elana ge enuna hi powonagil heliheliyam powonina.

32 Inoke labi o elana Mosese wana logugui toto valila i leli, Yosuwa i leli papanet pat pwataliyaa
8:32Logugui Labuina 27:2-4 elana Mosese i ba nihi ginol ola, ge pat o nihi pamilil labi o elana.
Isileli gegewel mataliyaa.
33  d He Isileli gegewel, bolo Isileli hot ge bolo bwabwali, avaliyau wali tonowakau, totuwalali alaliya bwabwatana, ge toasiyala, hi talmilila Yehoba wana Bateli ana Dedewaga bebena labui elal, awoliya i noek topowon bolo hi kaval elal, un Libai. Boda etega hi talmilila Oya Gelisim punaa ge boda etega hi talmilila Oya Ebal punaa. He hi talmilil i ola valila Yehoba wana totuwalali Mosese i ba nihi ginol ge gamagalau ba mulolu ana baaba nihi hago.
8:33Logugui Labuina 11:29 ge 27:12-13 elal Mosese i ba nihi talmilil ola, yaka ba mulolu ana baaba ge ba nuwamut ana baaba nihi baubaunan. Ba mulolu ana baaba te mulolu bolo Yehoba ni patuna elal, ebo anana nihi hago ge wana logugui nihi henapuan. Heliya iyoho Logugui Labuina 28:1-14. Ba nuwamut ana baaba te nak bolo Yehoba ni patuna elal, ebo nige anana nihi hahago ge wana logugui nihi hehenapuan. Heliya iyoho Logugui Labuina 28:15-68 ge 27:14-26. Oya Gelisim ge Oya Ebal nige ali bwaga i yayapu hot ge panuwa Sekemi i minaa labi o elana. I minaa labi Kenani nuwanuwanaa.
34 Yaka abwe Yosuwa Logugui gegewena ginebi ba mulolu ana baaba ge ba nuwamut ana baaba i vasili elal, i ola toto Mosese i leli lowan Logugui ana Buki gamwanaa. 35 Logugui maisena ge maisena bolo Mosese i leli, Yosuwa i vasili boda Isileli elal,
8:35Leleli nige i babaa ola, yaa ana awa hot i ola sauga Yosuwa ba mulolu ana baaba ge ba nuwamut ana baaba i vasili, yaka gamagalau hi ba uliulil enaa o ebo wali talam hi ginol logugui bolo i vasilel nihi henapuan. Logugui Labuina 27:12-13, ge 14-26 nu kite. Inoke eliyana bateli toto Yehoba alonau ge Isileli hi pebabateli-agil hi pavavaluna.
ginebi ana yowau ge ana wawayau, i ola al bwabwali bolo hi minaa elal.

Copyright information for `MPX