Revelation of John 7

Gamagalau ali Gewi 144,000 ali Etotohi I Gan

Toto o enaa aneloseyau esopali ya kitel hi taltalmilil panayawi labena esopali elal, ge panayawi ana mana esopali hi pikausil bahi nihi totowa noek panuwaa, ebo hoga pwatanaa, o ebo ebwakil elal. a  Yaka anelose etega al ya kite i neem labi nati Yabowaine yawalina gaganina wana logugui ana etotohi i noahe. Inoke i yoga anana i bwata, i yoga nok aneloseyau esopali elal bolo Yehoba gasisi i pek panuwa ge hoga nihi apanakil. I ba, “Bahi ga panuwa, hoga ge ebwakil nuku aapanakil, nuku matamatan ga ana siga wala Yabowaine wana etotohi naha teliya wana totuwalali lamwaliyaa.” b  Yaka ya hago bolo ali etotohi i gan lamwaliyaa ali gewi wan handeled poti po tausan (144,000), hi neem Isileli ali un gegewel elal. c 

Tuwel tausan (12,000) hi neem un Yuda,
12,000 hi neem un Lubeni,
12,000 hi neem un Gada,
12,000 hi neem un Aseli,
12,000 hi neem un Napitalai,
12,000 hi neem un Manasa,
12,000 hi neem un Simiyon,
12,000 hi neem un Libai,
12,000 hi neem un Isaka,
12,000 hi neem un Sebuloni,
12,000 hi neem un Yosepa,
ge 12,000 hi neem un Beniyamina.

Diyon Boda Bwabwatana I Kitel ali Kaliko I Wawakeki

Toto o enaa matau ya lihin, yaka boda bwabwatana hot nige bosowaina ta vasilel ya kitel, hi neem panuwa tomaha ge tomaha, un tomaha ge tomaha, tuwan tomaha ge tomaha ge anan tomaha ge tomaha elal. Inoke hi talmilil gamagal toto i misiyowa abamisiyo wawasana elana alona ge Sipi Natuna awoliyaa, holahola yayapona i wawakeki hi galoi, ge wali yaliyaya kaiwena ebwakil lalana hi pihikan nimaliyaa. 10 Hi yoga analiya i bwata hi ba, “Pwamwal i neem wama Yabowaine toto i misiyowa abamisiyo wawasana elana, alona ge Sipi Natuna elal.” d 

11 Aneloseyau gegewel abamisiyo wawasana ge tonowakau bwabwatal avaliyau bwasumu esopali hi milil painanagil. Yaka aneloseyau hi loepwakoku ge hi kululu abamisiyo wawasana awonaa maniniliya i tupa bilibiliya, inoke hi tapwalolo Yehoba elana, 12 hi ba, “Ibwe. I ola! Wala Yabowaine ta tobalan, ta awa wasawasa-an, ta ba iya Tosiba, iya Tobwabwatana ge iya Togasisi, ta pata ateu owa eliyana ge ta awatauwan, sauga gegewena nige ni momowasi. Ibwe. I ola!” e 

13 Yaka tonowakau bwabwatal avaliya etega i nel elau i ba, “Gamagalau bolo ya ali holahola yayapona i wawakeki, tab u atena henalau o ge ga hi neem?”

14 Anana ya lahe ya ba, “Tonowak, nige ya aatena, owa te u atena.”

Yaka i baem elau i ba, “Bolo ya hi noem miloloyowan bwabwatana gamwanaa, toto i masala panayawiya. Sipi Natuna saliyana elana ali holahola iyaka hi ul i wawakeki.
7:14Ana sapu heiya te hi abulilek Yeisu wana yaomal eliyana inoke Yehoba iyaka i awa sapusapu-agil, nige al wali gegi etega i gagan.
,
g 

15 Inoke heliya hi miminaa
Yehoba wana abamisiyo wawasana awonaa,
lan ge bulin hi totuwalali
elana wana Limi Bwabwalena gamwanaa;
ge gamagal toto i misiyo abamisiyo wawasana
elana avaliya hi mina ge iya i libuagil.
16 Nige al nihi gagalebu, nige al nihi wawalem, ge
sabwelu kalakalasina nige ni lololil, h 
17 kaiwena Sipi Natuna, iya i miminaa luwaluwala
abamisiyo wawasana labenaa,
i matahikagil i ola te
tomatahikan sipi wana sipi i matahikagil,
i nulil hi na hi im wewel toto i bwanabwana pitpit
ge yawalina gaganina elana.
Ge matanunuliya
gegewena Yehoba iyaka i abut yoho.” i 
Copyright information for `MPX