Revelation of John 8

Sipi Natuna Epapap Sebenina I Leke

Inoke Sipi Natuna epapap sebenina i kukuleke, yaka nige al butun etega i gagan labulabumwa sauga ana yapu i ola auwa awalehina.

Anelose Etega Bugul Bwalena Waiwaisana I Ton

Inoke aneloseyau ali gewi seben bolo hi talmilila Yehoba manininaa ya kitel, yaka Yehoba bwagigi ali gewi seben i pek elal.

Anelose etega al mwaha etega gold hi ginoliya i noahe, i nem i talmilila abapowon elana. Bugul bwalena waiwaisana hi gewi Yehoba i pek elana i na i ton Yehoba wana gamagalau wali awanun ana etulan, i tona abapowon gold toto i miminaa abamisiyo wawasana awonaa. a  Inoke bugul bwalena waiwaisana kasona, alona ge Yehoba wana gamagalau wali awanun, hi ha, hi neem anelose nimanaa, toto i talmilila Yehoba awonaa. Yaka anelose mwaha i ahe, i na abapowona ge kiyal i usan, inoke i ligin lowan panayawiya, yaka gulumwawa butuna, pipinamal ge mwaniknik i gan. b 

Aneloseyau Esopali wali Bwagigi Hi Yu

Inoke aneloseyau ali gewi seben wali bwagigi ali gewi seben hi lovivina-an ge nihi yu.

Inoke anelose etega wana bwagigi i yu, yaka sauga o kehe papatina ge ginaha alona saliya hi vikuhu Yehoba i ligin lowan panayawiya. Inoke panayawi awalehina etegana, ana bwata i ola wan ted (1/3) i kalas, yaka ebwakilina alona ge mwawin waiwaisana gegewena hi kalas. c 

Inoke anelose labuina wana bwagigi i yu, yaka bugul etegana i ola oya bwabwatana iyoho i tautau i soguek hogaa. Inoke hoga awalehina etega, ana bwata i ola wan ted (1/3), i tabwa saliya, motena hi loaliga ge wagana hi nak.

10 Inoke anelose etonina wana bwagigi i yu, yaka putum bwabwatana i tau i ola wita hi ton i soguem labulabumwa, i na i tal wewel sanisani ge wewel tubtub hi gewi elal. He putum o alana lelam. Inoke wewel gegewel gamwaliyaa awalehina ana bwata i ola wan ted (1/3), amnaliya i lelelam, ge gamagalau hi gewi wewel lelelamwina hi im yaka abwe hi aliga. d 

12 Inoke anelose esopalena wana bwagigi i yu, yaka sabwelu, waikena ge putum hi nak, inoke sauga enuna nige hi yayana. Inoke lana sauga i yapu nige sabwelu, ge bulina sauga i yapu waikena ge putum nige mwananaliliya. Inoke lan ge bulin ali sauga awalehina i gogou, awalehina o ana bwata wan ted (1/3). e 

13 Inoke matau ya lihin, yaka magisubu i youyouwa hawawal ali luwaluwala ya kite, ge anana i bwata ya hago i ba, “Eeu nak geb! Eeu nak geb! Eeu nak geb! Nasi gamagalau panayawi nihi nak, sauga toto bwagigi nihi kahin, bwagigi bolo aneloseyau eton al abwe nihi yu.” f 

Copyright information for `MPX