a11:11Sm 12:22; Sam 94:14; Pir 3:5
b11:31Ki 19:10,14
c11:41Ki 19:18
e11:8Deu 29:4; Ais 29:10
f11:9-10Sam 69:22-23
j11:26Ais 59:20-21
k11:27Jer 31:33-34
l11:33Ais 55:8-9
m11:34Ais 40:13; 1Ko 2:16
n11:35Job 41:11

Romans 11

God Isuraeru Ano Munivi

a Meve ne watna, God me iyayapan meuma topai munne? Onan di. Ne gaibu Isuraeru abnawa, sira Ebraam yaig onnewa, Benjamin dam meuma gumbe onnewa. God me iyayapan meuma mu wait yaug anonewa den topai munne. Ye Baiboru danave Eraija oya tenewa apa aninin waivinewa den yaug anoyana. Me God gumbe Isuraeru pui yug wane. b “Ayapan, mu propeta geuma guriya boriruwaya, sira kem geuma iyakaisiyapama aueg tobiroriyaya. Ne nekut kwenegiya. Mu tonektanwa oya a ge yaug eme.” c Megara me gumbe garawa anin wane? “Ne nenan iyayapan 7,000 amareni wakeya. Mu Baaru gumbe den konuwa yueme.” Ebu desiroma, gare mame di iyayapan mu God ano oraiwa gumbe amaraivi wakeemewa mu meib di wakeya. d Me ano oraiwa gumbe ipewa, me divi da atanwa gumbe onan di. Me meib onan ipewa, ano oraiwa me ano oraiwa onan.

Meve me aninin? Isuraeru mu oma den ane auya divi da autan oya anoemewa. God wat gomiyanewa igiyawa mu auya, megara iyayapan upeba nonomagowa yaigiwane. e Mamaib tene,

“God me guwowa yusi onanwa munne,
yangowo mu den yaupewa munne,
sira naunowo mu den anotanwa munne.
Gare mame apa onnewa.”
f Devid gaibu aib waivi.

“Teboro mumawa mu munan nama ape,
gue katau ape, divi da amawa totariyatanwa anawa ape, sira garawa muma ape.
10 Mu yangowa muniwape sira mu oma den ane yaupe.
Mu daiyowa gegerai mutpe meib di wakeigimpe.”

Yoma Naniwa Da Gumbe Yunadne

11  g Sira singui watna. Mu amowa totainewa uyug aigtan oya? Onan di. Mu Gwangwan togomiyaya, me gumbe waita Ju onan igiyawa gumbo onamiya. Me mu kwemiya Isuraeru kwavi atan oya. 12 Mu Gwangwan togomiyayawa me piyu mame tawara muma oya, sira mu waropiyayawa me Ju onan igiyawa tawara muma oya. Meoya mu waita autanwa me obiren egave tawara kokavitwa autan oya.

13 Meoya ne Ju onan igiyawa yenan veni. Ne Ju onan igiyawa munan apasoro ana, meoya ne anoeniwa nau neuma me koka. 14 Sira me gumbe, ne imunap wakenewa, ne atna iyayapan neuma kwavi ape. Sira ne imunap atna iyayapan upeba yapowo waita aupe. 15 Mu epa aore muntanwa me piyu mame yum tutanwa oya ipewa, mu tamtanwa me bo gumbe sira yoipewa. Natawa meib. 16 Wiit maura namuirenwa me iyakaisiyapama ipewa, nakwai wiit atapupu undag me iyakaisiyapama. Taiwa me iyakaisiyapama ipewa, yoma naniwa gaibu me iyakaisiyapama.

17  h Yoma naniwa upeba tentamag aigiya sira ye yoma Orivu mundanavewa me gumbe yunad yenne, sira yoma Orivu taiwa gumbe mumin dauwaivi ye avigimiya ipewa, 18 ye oma den ane apanapan aigimiya yoma naniwa gumbe. Ye taiwa den waita wanene, megara taiwa me waita yenivi. 19 Ye waya, yoma naniwa togomiyayawa me ne yunatanwa oya. 20 Me meib. Mu togomiyayawa mu anotumat onanwa gumbe, megara ye anotumat yeuma gumbe yokeene. Ye apanapan den aya, megara a aya. 21 God naniwa namu wakenewa gwagwai den tupawa, me ye yenan oya gwagwai den tupe.

22  i Yauya. God baigan meuma ge yaigipamitwa. Iyayapan uyug aigemewa egowo wakenewa me yaigipamitwa. Ye egeyap wakenewa me God baigan meuma. Ye me danave wakeigimiya ipewa, me meib di wakeigimiya. Megara ye meib den ayawa, ye gaibu togomiyape. 23 Sira mu anotumat onanwa den amaraigimpewa, mu matai yunat ape. God oma ane mu sira yunat mumpe. 24 Mundana yoma Orivu gumbe togomiya yenne, sira Orivu nau danavewa gumbe yunat yenne ipewa, Orivu nau danavewa naniwa me yoma Orivu namuwa gumbe sira yunat ape. Me taibe yaigiwa onan.

Isuraeru Igiyawa Undag Waita Aupe

25 Tatangwanen, ne imunap, ye guwavewa mame yaug anotanit di. Ye aib den anoya ye ano kokawa igiyawa. Guwavewa mame natawa mamaib, Isuraeru igiyawa upeba nonomagowa yaigiwane, sira Ju onan igiyawa anintom mina obiren apewa, Isuraeru igiyawa nonomagowa yaigiwanewa me onanape. 26  j Mamaib Isuraeru undag matai waita aupe. Mamaib tene,

“Munan parau viniviwa me Saion apa uwape,
sira me Jekob gumbe tobiyape God gumbe anotumat den atanwa me aug epa aorepe.
27  k Mame me ne agi neumawa mu munan munnawa.
Me apa ne kukaeba mumawa atan autna.”
28 Gae oraiwa gumbe, mu God gumbe anavi eme igiyawa ye yenan. Megara God watgomiya munnewa gumbe, mu God baigan muniviwa isimuranowa gumbo. 29 God puyo nunnewa ge God nunan auwaiviwa me den di tobiroriyape. 30 Ye namu God gumbe noiwa den auyana, megara gare mame ye ano yemiviwa me gumbe auene mu noiwa den aueme gumbe. Mame mina mu gare mame noiwa den aueme, me mu mumbo gaibu ano muniviwa autan oya, ano yemiviwa gumbe. 32 Kuiyawa God anoiviwa me iyayapan undag gumbo ano munigimpe, meoya God ane iyayapan undag noiwa den aueme.

Baiboru Toewaneba

33  l God tawaraeba—God anoano oraiwa ge God ano meuma—
me epampa aninin!
Keptete me nu undag matai oma den ane yaug anota.
Ebu meuma me mina, nu oma den ane matai popon yuta.
34  m Kuiyawa bira Ayapan nonewa yaug anotan?
Sira bira Ayapan waitaeba ane?
35  n Sira bira God gumbe namu divi da wanne,
meve garawa sira aupe?
36  o Kuiyawa dividivi undag mu God apa, God gumbe, God oya wakeya.
Eyawa me God mame gumbe wakeigimpe viripusiwa onan. Amen.
Copyright information for `MTI