Romans 16

Poru Gaun Meuma

Nu yogiyunwa Pibe me siosi kansoru wakenewa Senkrea apa, ne me wag waita waneni yenan. Garawapa Ayapan gumbe, ebu oraiwa me iyayapan iyakaisi oya me gumbe vesin mame baigan niyaya. Sira vesin mame divi da guniyap autan anoiviwa me waita waniya. Vesin mame me iyayapan obiren waita munne, sira ne gaibu waita nedne.

a Keriso Iesu gumbe Prisira ge Akuira mu ne gaibu nau desiroma.
Garawapono baigan muniya.
Iyayapan mame ne inaiinai neuma oya inaiinai muma topayag waita negiya.
Ne nekut onan, megara Ju onan igiyawa siosi mumawa undag mu gumbo gaun veme.
Sira ye garawapono siosi mu gweyowo wakeyawa gumbo baigan muniya.
Ne evenwa nonenmagawa Epaenetas gumbe baigan niyaya.
Apan mame me namuirenwa me Esia danave Keriso gumbe anotumat anewa.
Meri gumbe baigan niyaya. Me yenanwa nau yaigipamit ane.
Andronikas ge Junias gumbo baigan muniya.
Mu at desiroma igiyawa ne gaibu, sira nu nog apa undagit tenuniya.
Apasoro mu iyayapan mame yaug ano muniya mu ivuwa koka.
Mu namu Keriso gumbe wakeemewa, ne ivi.
Keriso gumbe ne evenwa nonenmagawa Ampriatas gumbe baigan niyaya.
Keriso gumbe Ubruanus me ne gaibu nau desiroma,
sira ne evenwa nonenmagawa Stakis, mu baigan muniya.
10 Aperes me Keriso ag yaune sira me aunewa, me baigan waniya.
Aristoburas gweyawa igiyawa mu baigan muniya.
11 Erodion me at neuma desiroma, me baigan waniya.
Narukisas gweyawa igiyawa mu Keriso gumbe wakeyawa mu baigan muniya.
12 Tripena ge Triposa mu Keriso gumbe nau yaigipamit emewa mu baigan muniya.
Evenwa Pasis me Keriso gumbe yusipamit nau anewa, me baigan waniya.
13  b Rupas me God watgomiyanewa me baigan waniya.
Sira me inawa ne inanwa mina, me baigan waniya.
14 Asinkritas, Peregon, Erumes, Patrobas, Erumas sira tatawaviwa gaibu mu baigan muniya.
15 Pirorogas, Juria, Nereus ge yogiyawa,
sira Orimpas ge iyayapan iyakaisiyapama undag, mu gaibu baigan muniya.
16  c Uwatoto iyakaisi gumbe baigan gara gara aya.
Keriso siosi undag mu baigan ye neme.

17  d Tatangwanen. Ne ye diruitna. Ye toewanewan yaug anoyana. Iyayapan upeba toewanewan anotan den anoeme. Mu veme mu mina ube, sira iyayapan uyug aikpe oya divi da baraupe. Meoya yaimoyai mu munan yaukape. Mu yankwemiya. 18  e Iyayapan meiba mu Ayapan numa Keriso nauwawa den eme, megara mu mumbo anoano muma gumbe nau eme. Gae memeyu ge gae me ape iyayapan degadega atanwa, gae mame gumbe mu mokona igiyawa mu ugai muneme. 19  f Iyayapan undag mu yaug anoya ye noiwa auene oya. Meoya ne ye guniyap degadega eni. Megara ne imunap, anoano oraiwa gumbe ye kuiewa oraimina aivi, sira ye kukaeba gumbe ekekenut ene.

20  g Yum Goddeba me tatevit ape Seitan aug ame danave barauya.

Ayapan numa ano oraiwa meuma ye guniyap wakeigimpe.

21  h Timoti me nau numa desiroma ye baigan yenivi.

Rusias, Jeson ge Sosipateru mu baigan yeneme.

22 Ne Terutias bira gigirum mame tenawa gaibu Ayapan gumbe baigan yeneni.

23  i Gaias me ne ge siosi igiyawa undag amaraiviwa me baigan yenivi.

Erastas me toimu kokawa danave nau koka aivi abnawa, sira tatunwa Kwarutas, mu baigan yeneme.
24 (-)
16:23Namu tenewa da danave V24 wakene. Me mamaib tene. “Ayapan numawa Iesu Keriso ano oraiwa me ye undag guniyap wakeigimpe. Amen.”


25  k Ano guwavewa me mameib taibe ane. Anoanowawa me watavit ampa guwave wakene, megara gare mame taibe ane. God gwangwan meuma yusiwa gaibu gumbe, sira propeta buka muma gumbe, iyayapan undag mu anotumat ag mokonairen atanwa oya, anoanowawa me iyayapan undag munan taibe ane. Anoanowawa mame gumbe God oma ane ape ye wan yoiya.— 27 God me anoano meuma noidauwane sira God me desirom. God gumbe eyawa wakeigimpe viripusiwa onan. Amen.

Copyright information for `MTI