John 17

17:1—18:1 Yesos-ni Lapa Pulu Yili-Kene Popu Topa Ung Nimba Mawa Tembandu (1-5) Yesos Yu “Bi Ola Pípili.” Nimba Mawa Tepa Kene (6-19) Yu Lumbili Andúlimanga Nimba Mawa Tenjipa, (20-26) Yu Penga ‘Sika’ Niku Tondulu Munduku Piliingí Yambumanga Pulu Yili Mawa Tinjirim Temanele

Yesos-ni yu lumbili anduli yimandu ung akuma nimba pora sipa kene, mulú-koleana olandu-sipa kanupa kene nimba mele:

“Tata, na-ni tembu mele nu-ni niku panjirinu enale wendu okum. Nu-ni yambu sirinu yambuma eninindu pali na-ni ‘ ‘Kona molku mindi pangi.’ nipili.’ nikunu, na-ni ma-koleana yambuma pali ‘Nukupili.’ nikunu, nunga Marena namba sirineliinga nunga bili ‘Ola pípili.’ nikunu nunga Marenanga bili paka tunjuyo.

“Kona molku mindi pungí akili i-sipa mele: ‘Nu tiluele mindi sika Pulu Yili.’ niku piliiku, ‘Na nu-ni ‘yambuma nokupa konjumba yi te liipu mundumbu.’ nikunu makó tokunu kene na liiku mundurunu yi-nuim Kraisele.’ niku piliiku, olsu-kene wasie tapú-toku molemele mulungí yambuma kona molku mindi pungí. Nu-ni kongun na sirinu kanili tepu pora síndele-ni nunga bili paka tunjundu. Tata, ma-koleale wendu naa upili nu-kene wasie molambili na bi ola molupa tondulu pupili mulurundu kanu-mele ‘Ekupu na-kene wasie kelepu molambili.’ nikunu ui mulurundu mele ‘Kelepu na aku-sipa bi ola pepa tondulu pupili wasie molambili.’ nikunu ti.” ⸤nirim.⸥

“Ma-koleana-yambumanga yi mare nu-ni sirinuma eninindu nu tondulu pullu mele kene, aima olandupa mollu mele kene, nimbu para sirindu. Ui enini nunga yima muluring, penga na sirinu. Enini nunga ungele piliiku liiku teku muluring mele molemele. Nu-ni nandu nirinu ungma na-ni eninindu nimbu sirindu kene, enini ung kanuma piliiku liiku kene nu mulurununa na molupu kene urundu akili piliiku kongnjuku kene ‘Nu-ni na sika mana liiku mundurunu.’ niku tondulu munduku piliiku kene aku-siku teku muluring-na ekupu mélema nu-ni na sirinu mélema pali nu molluna wendu olemú enini piliilimili.

“Eninga nimbu nu-kene popu topu ung nimbu mawa tenjiker. We-mana-yambumanga nu-kene ung naa nimbú, mólu. Nu-ni sirinu yima nunga yima molemeláliinga na eninga mendepulu nu-kene ung nimbu mawa tenjiker. 10 Nanga mélema pali nunga, nunga mélema pali nanga. Nu-ni sirinu yima enini molku konjulemelále-ni nanga bili ola pelemú. 11 Ekupu na nu molluna okuraliinga na mana-yambuma-kene wasie naa molemulu mele tekem. Akiliinga-pe yima enini ma-koleana-yambuma-kene molemele mele mulungí.

“Tata Kake Tiliele, na nu mulunina ombú kene na sirinu lumbili andúlima eni-enini mana-yambuma-kene wasie mulungí kene ‘Olsu yambu tiluele mele molupu numanu tiluna pupili molembulu kanu-mele na sirinu lumbili andúlima enini aku-siku yambu tiluele mele molku numanu tiluna pupili molangi.’ nikunu nunga tondulu na sirinu akili-ni enini nukui.
12 Na enini-kene wasie mulurumulu kene nunga tondulu na sirinu akili-ni na-ni enini ‘ulu te naa tipili.’ nimbu nukurundu. Na-ni enini tápu tirindu kene te ulsu pupa yambuma mindili nungí koleana pulimú kupulanum-na naa purum. Yi tiluele mindi, nunga buk tunjuring ung te wendu ombándu yambuma mindili nungí koleana pumba telemú yili mindi ulsu molupa mindili nombá koleana pulimú.

13 “Ekupu nu molluna okuraliinga na numanu lakuku sipu moliu ‘Aku-mele enini aku-siku numanu kaí panjiku molangi.’ nimbu ui na olandu naa ombu kene ya ma-koleana molupu ung ima niker. 14 Nunga ungele enini sipu pora sirindu. Na ya ma-kolealiinga yi te mólu, aku-siku enini ma-kolealiinga yima móluko. Olsunga yima molku olsunga ung-manima piliiku liiku telemeláliinga mana-uluma mendepulu piliiku telemele yambuma-ni enini numanu kis panjiku enini-kene ele-tu yambuma molemele. 15 ‘Enini ma-koleana wendu lii.’ nimbu mawa naa teker. Akiliinga-pe ‘ ‘⸤Ya ma-koleana olsunga kongun tenjiku mulungí kene⸥ ulu-kismanga pali ulu-pulele molemú ⸤kur⸥ale-ni enini kundi topa tepa kis naa sipili.’ nikunu nukui.’ nimbu eninga nimbu mawa tenjiker. 16 Na ma-kolealiinga yili naa moliu mele enini ma-kolealiinga yima naa-ko molemele.

17 “‘Ung-sikale-ni enini nunga yi mendepulu molku yi kake tílima molangi.’ niku tiyo. Nunga ungele ung-sikale. 18 Nu-ni na ma-koleana liiku mundurunu mele na-ni enini ma-koleana liipu mundurunduko. 19 ‘Enini numanu kake tipili molku nunga niku mendepulu molangi.’ nimbu na ‘numanu kake tipili nunga nimbu mendepulu molambu.’ nimbu moliu.” ⸤nirim.⸥

20 “Tata, na-ni nanga lumbili andúlimanga mendepulu mawa naa tenjiker. Penga enini ung niku singí yambuma ‘Na sika nunga Málu ya ma-koleana liiku mundurunu.’ niku tondulu munduku piliingí yambumanga kepe popu topu mawa tenjiker. ‘Nu nanga numanuna mollu, na nunga numanuna moliu mele aku-siku yambu kanuma pali yambu tiluele mele numanu tiluna pupili molangi.’ nimbu aku-sipu eninga mawa tenjiker. ‘Ma-koleamanga yambuma-ni pali ‘Nu-ni na liiku mundurunu-na urundu.’ niku tondulu munduku piliangi.’ nimbu ‘Yambu kanuma olsu-kene yambu tiluele mele numanu tiluna pupili molamili.’ nimbu aku-sipu mawa tenjiker. 22 Nu-ni nanga ‘Bili ola pípili.’ niku sirinu ulele na-ni enini sirindu. Akili ‘Olsu numanu tiluna pupili molembulu mele enini aku-siku numanu tiluna pupili molangi.’ nimbu enini sirindu. 23 ‘Enini aima kamu numanu tiluna pupili molangi.’ nimbu aku-sipu “Nu nanga numanuna mollu mele na eninga numanumanga molambu.” nimbu mawa tenjiker. Na numanu monjullu mele nanga ungele ‘Sika’ niku tondulu munduku piliilimili yambuma aku-siku numanu monjullu mele kepe ‘nu-ni na liiku mundurunu mele kepe, ma-koleamanga pali yambuma-ni piliangi.’ nimbu na-ni aku-sipu nu mawa tepu ‘Enini aima kamu numanu tiluna pupili molangi.’ niker.

24 “Tata, ‘nu-ni na yambu sirinuma na molumbuna wasie molupu, male ui naa teambili na numanu monjukunu kene ‘nanga bili ola pepa talang pupa tondulu pupili.’ niku sirinu akili kanangi.’ nimbu piliiker.

25 “Tata Sumbi-Niliele, sika we-mana-yambuma-ni nu naa kanolemele akiliinga-pe na-ni nu kanoliu, yambu nanga ungele piliiku liilimelema-ni ‘Nu-ni na liiku mundurunu-na urundu.’ niku piliilimili. Na-ni nu mollu mele enini nimbu sirindu. Penga nimbu sipuko molumbu. ‘Nu-ni na numanu monjullu mele eni-enini aku-siku anju-yandu numanu monjangiko. Na eninga numanuna molambuko.’ nimbu aku-sipu nimbu síli-síli tepu molumbu.” nimba Yesos-ni Pulu Yili-kene aku-sipa popu topa nirim.

26 

Kolomgo-Auli 18—19 Yesos Ka Siku, Kot Tenjiku, Unji-Perana Ola Toku Konjuku, Ónu Tiring Temanele

Copyright information for `MUX