1 Corinthians 12

Kululuwads wuliyougwan

Sigwey nukuleles liva̱nen kululuwads wuliyougwan. Sivinag bukukwakins sinapun towen.

Bo kunuwes kweiboug, igaw dadub yakamiy, yowbad tobwag nukuyousis; yowbad tobwag nag kadilok bilivans; tayyaweids tasiyas. Tage nukukwawes asisinap tasiyas, sikaleiwag katanok katanok bo kuyousis.

Mapun adibakeimiy yakamiy, nag kal bilivan Kululuwan Yowbad waseg, mo bitouyeg Yeisuw, nag. Misinaka Kululuwan Towen Bwanabwein binek gamag, mo bilana, “DaGuyaws anmwa̱net Yeisuw.”

Wuliyougwan kululuwads singay babaw, tage anmwa̱net Kululuwan Towen bo ivgen isekeids.

Wotet ma̱wan, singaya babaw, tage datoveks anmwa̱net-wan.

Sinap ma̱wan singaya babaw, Yowbad gog anmwa̱net-wan ikaleiwag teitan teitan wasigeis, silma̱nin dawotets bitawteles kweitan kweitan.

O dawotet kweitan kweitan Yowbad Kululuwan bo isekeids va̱gan bitalabes sidayas.

Bo ivgen isek teitan ansinap va̱gan bilivan bwein, teitan isek ansinap va̱gan bikamtel livan mounid; teitan isek nasimounid tawtoun Yowbad waseg; teitan isek natawtoun va̱gan bivag beibweins takatouns; teitan Yowbad nabubun tawtoun biwtel; teitan bipalopisay Yowbad anilivan; teitan bikakin kalisiy tayyaweids o kalisiy siwotet mounid Yowbad Kululuwan waseg; mayen teitan billivan wasigeis kaeig kweitan kweitan; teitan gog bikakin bikativin kaeig tasiyas.

11 Kululuwan Towen anmwa̱net ivgen isekeid ya̱kids tatonok tatanok, ma̱wan bikaleiwag, mo biwteles wotet towen.

12 E, woun katanok, tage wuliyougwan woun babaw; ma̱wan-vak Kelis katanok, o ya̱kids babaw magina wuliyougwan Kelis.

13 Kululuwan anmwa̱net waseg ibapta̱yseids mo tamlavags mamagina woun katanok. Takinew min-Yudiy yakamey, o mina-Gilis yakamiy, takinew touwat yak, o takinew tamwey yak, Kululuwan Towen anmwa̱net waseg iwmwamweids babaw ya̱kids.

14 Wuliyougwan woun nag katanok, singay babaw.

15 Kukin kwakway bilivan, “Peinan nag nim yey, adok nag wuliyougwan woun yey,” mounid anilivan, ne? Adok nag. Wuliyougwan woun towen kwakway.

16 Ma̱wan teg bilivan, “Peinan nag mat yey, adok nag wuliyougwan woun yey,” mounid anilivan, ne? Adok nag. Wuliyougwan woun towen teg.

17 Kukin woun bika̱lawt matan waseg, ta-ma̱wan biligen. O kukin woun bika̱lawt teigan waseg, ta-ma̱wan biskwen manisin.

18 Yowbad nakaleiwag bo ibun woun wuliyougwan babaw-wan, siwotet kweitan kweitan, ma̱wan nanon Yowbad.

19 Magat wuliyougwads katanok, nag beivag wouds tatonen. Tage woun wuliyougwan babaw, woun gog katanok-wan.

21 Nag kadilok mat bidibek nim, bilana, “Nag sivinag ya̱koum.” Ma̱wan kunukun; nag kadilok bidibek kwakway, bilana, “Nag sivinag ya̱koum.”

22 Nag! Magat wuliyougwan won aveiyag gamag idok nag ivag sivinan, tatagouwaw gamag towen; singay gog sivinan wuliyougwan towen. O aveiyag idok yakawanan nag, singay iyakawanes wuliyougwan towen; tavna̱ses bwein wouds wuliyougwan, aveiyag admwasins waseg, mo talumwes, tavna̱ses bwein.

24 Wouds wuliyougwan babaw ila̱tans, imlavag wouds katanok; Yowbad bo ibun ma̱wan. Wuliyougwan aveiyag yakawanan kakit, Yowbad ivag va̱gan yakawanan bivakaein kid.

25 Ivag wouds ma̱wan, va̱gan kid wuliyougwan katanok katanok mo bilabes o bivna̱ses sisiyas; awoum wouds wuliyougwan bilivis bivag bod babaw.

26 Magat won wuliyougwan katanok bilivet mamayuy, bo bigeg wuliyougwan babaw. Magat won wuliyougwan katanok bilouvat yakawanan, babaw mo bimwa̱saws.

27 Mamagina Kelis won, gamag ya̱kids; teitan teitan mamagina wuliyougwan kweitan kweitan. Peinan Yowbad nikaleiwag tayakelesiys ya̱kids dawotets kweitan kweitan. Takaweins liva̱nen Yeisuw imugwas. Wankuyeim tasiyas palopit siwotet igeiguys Yowbad nanon. Wankuyeim takatimlakeins sinapun Yowbad. Wankuyeim tasiyas iwwotets singay tawtoun. Wankuyeim tasiyas ivva̱ges va̱gan beibweins takatouns. Wankuyeim tasiyas ilabes sisiyas. Wankuyeim tasiyas magina takavaveis, ikaleiwags sisiyas wasigeis. Wankuyeim tasiyas tallivan kaeig kweitan kweitan wasigeis.

29 Tabta babaw ya̱kids takaweins liva̱nen Yeisuw? Adok nag. Tabta babaw palopits, bitageiguys nanon Yowbad, babaw ya̱kids? Adok nag. Tabta babaw ya̱kids takatimlakeins sinapun Yowbad? Adok nag. Tabta babaw ya̱kids dawotets tawtoun? Adok nag. Tabta babaw bitava̱ges va̱gan beibweins takatouns? Adok nag. Tabta babaw ya̱kids bitallivans kaeig kweitan kweitan wasigeis? Adok nag. Tabta babaw ya̱kids takakins takativinis asilivan tasiyas? Adok nag.

31 Kadiloka beivag sivinamiy vagein bwein Kululuwan Yowbad bisekeimiy. Tage ked singaya bwein bakatimlakeimiy.

Copyright information for `MYW