1 Corinthians 16

Muloul

Kweitan youd, muloul Yowbad nagamag silma̱nin. Ma̱wan bo akaleiwag min-Galetiy tasiyas tayakelesiys wasigeis, kadiloka kuva̱ges ma̱wan.

Wik nakabsilamaw, yam tapwa̱loul waseg, kumulouls. Babaw yakamiy kusemos mimuloul; ma̱wana wotet anagin bukuban, mo bukumuloul ma̱wan. Igaw mo baw, mimuloul nanawan.

Igaw baw, yakamiy mo bukwaleiwags kalisiy bikawes mimuloul binawes Yelusalem; yey bo balel let silma̱nin min-Yelusalem, basek gamags tasiyas, va̱gan bikawes son mimuloul, binawes Yelusalem.

Kukin sivinamiy, sigwey tasiyas bo bakan Yelusalem.

Igaw ban Masidoniy, wankuyeim mo bawekeimiy, peinan banekes min-Masidoniy, mo bawekeimiy wankuyeim. Yey amibwabwal yey basesun-wan. Adok biyakous bulbweilim mo bukutaneigs ampalawen ba̱noy.

Nag sivinag baw mo basina̱nam balisaweimiy, nag; kadiloka tut kalamwey biveiyov wasigeis yakamiy bases; magat daGuyaws nanon ma̱wan waseg yey.

Basesun Epesos, ee... sagal yagan Pentikos beikous, mo baw. Peinan ven towen Epesos waseg kadilokeig wotet avakaein bawtel, o gamag babaw sivines kid bisilbwades gunawotet.

10 Igaw Timotiy beiw, kukines a̱ban beibwein wasigeis yakamiy, peinan iwtel daGuyaws nawotet, ma̱wana yey nawtel.

11 Awoum teitan gamag bikasigum mtowen Timotiy. Igaw bilisaweimiy, bimekeig, kadiloka kutanes bwein, peinan akaymates towen siney tayakelesiys mwasanin.

12 Liva̱nen veiyouds towen Apolos nukulivans, bo asimkin towen binoun biwekeimiy siney tasiyas tayakelesiys mwasanin. Asimkakina nag; peinan idoki bikayamat kweitan tut bwein, mo beiw.

13 Kadiloka kuvna̱ses amisinap va̱gan tut babaw bukusimounids Yowbad waseg. Kukwapwapouts, kutawtouns. Youda babaw kuva̱ges siwa̱youb waseg.

15 O sigwey, sivinag bukuvna̱ses bwein Sitepa̱nas sen nagamags. Tasiyas wanamugwana ven Akay waseg isimounids Yeisuw waseg; gamag babaw sisimounid ikuyeim. O tasiyas Sitepa̱nas sen nagamag bwein imtakavates Yowbad angamags. Kadiloka kwanawes ages Sitepa̱nas, sen gamag kalisiy biwotets siwotet ma̱wana towen.

17 Bo isaps tasiyas Sitepa̱nas, Poltunet, Akeikos, mapuna ikalin nuwag seikwan, peinan yakamiy kadiveiyov nag kadilok bukulabeigs, o tasiyas bo ilabeigs bwein, mo itaw nuwag, o adok yakamiy ma̱wan. Kadiloka bitavna̱ses gamag tasiyas beibwein.

19 Tasiyas tayakelesiys ven avakaein Esiy waseg asilivan siwa̱youb wasigeis yakamiy. Tasiyas Akwil son nakwav Pilisik singay ikalin nuwes yakamiy, daGuyaws silma̱nin; o tasiyas babaw nitapwa̱louls wasibunatum asilivan ma̱wan.

20 Yowbad nagamag babaw asilivan siwa̱youb wasigeis yakamiy. Kadiloka kuyaseles nimamiy simiyas wasigeis, kumulouls beibwein.

21 Gunamuloul towen nalel namag toneig waseg niwekeimiy. Yagag kukines Pawl.

22 Kukin teitan bipiyev daGuyaws, kupiyaves gamag towen, kwayabes bein watoulan. Nuwanaw bo beim daGuyaws tonen.

23 DaGuyaws Yeisuw bisiwyoubumiy.

24 Yey asiwyoubumiy babaw yakamiy, Yeisuw Kelis peinan.

Yey Pawl.

Copyright information for `MYW