1 Corinthians 6

Ya̱tal

Kweitan sinap kalbaleb nises wasigeis yakamiy. Kuyateles simiy, wamatan takaleiwag gabman towen nag isimounid Yeisuw waseg. Bo igak! Magat bukuyateles, kadiloka kuneves tayakelesiys mwasanin bikaleiwags wasigeis yakamiy.

Kuninuways, tasiyas iyakelesiys mounid igaw mo bikaleiwags youda babaw wasigeis. Igaw bukukwalawages youda babaw, adok ikadilokeimiy kakit sinap bukukwaleiwags, tut towen waseg, ne?

E, kuninuways; igaw bitakaleiwags min-liba̱lab wasigeis. Tab ikadilokeimiy bukukwaleiwags ven watinow? Adok ikadilokeimiy.

Tut towen sivinamiy siyas toul bikaleiwags wasigeis yakamiy. Bo igak! Agulivan towen va̱gan beivag amimwasin. Adok tassinap teitan nises wasigeis yakamiy, kadilok towen bikaleiwag. Igaw simiy asteiy biyatel son, tassinap towen mo bikaleiwag.

O nag gog, tut towen iyatel son, o towen takaleiwag nag isimounid Yeisuw waseg. Bo igak!

Sinap towen singaya kalbaleb. Bweina kuses, kukin soum biyablebeim o biyagageim, bweina kuses. Sinap towen bwanabwein.

O nag gog, ya̱tal waseg kuyablebes simiyas, o kusilponays simiyas wasigeis, tayakelesiys babaw-wan yakamiy. Bo igak!

Kukin amisinap kalbaleb ta-ma̱wan bukusiws Yowbad nakabkaleiwag wanuwan, nag. Takalbalebs nag beisiws, nag; tasiyas ikaninavays mav, nag; tawaw, o vinay ikaninavays mav, nag; gamagal ikaninavaysa mav, nag; tamgamegs nag; tassubwans nag; takkaylas nag; tayablebeins pwa̱daw nag; tasimomons nag; tavveinaws nag; takwekways nag; tamwamweins wiskiy o aveiyag bikabala̱weins, tasiyas nag; tasiyas tayyagays nag; tabba̱kews nag. Asibabaw nag beisiws Yowbad nakabkaleiwag, nag.

11 Kweiboug yakamiy mwasanin amisinap ma̱wan. Nagein gog daYowbads bo iwid amisinap towen, ikayuseimiy, bo ikidumwal amisinap, daGuyaws Yeisuw Kelis waseg, o Yowbad Kululuwan waseg.

Awoum kusubwans

12 Adok teitan yak bukulivan kid, kulana, “Kadilokeig sinap babaw.” E, mounid. Kadilokeid sinap babaw bitakow, tage sinap mwasanin nag bikatimweisid. Awoum bamlavag mamagina sinap mwasanin natouwat yey.

13 Kan toub silma̱nin, o toub kan silma̱nin; tage igaw Yowbad bigidem kan son toub. Taninuways-vak woun. Woun nag silma̱nin subwan, nag; woun silma̱nin daGuyaws; e, daGuyaws silma̱nin woun.

14 Yowbad natawtoun waseg ivag, Yeisuw mo ikit vayuwein; igaw ya̱kids ma̱wan.

15 Taninuways wouds mamagina wuliyougwan Yeisuw Kelis won tonen. Nag kadilok bitamlavags mamagin wuliyougwan nawlayas. Awoum.

16 Kukin kal imasis son na̱wen nawleyas ikatuvases son, wous asteiy imlavags mamagin wous katanok. Livan nises Bukitab waseg,

“Tasiyas asteiy ila̱tan wous katanok-wan.”
17 Tage kal ikatuvas son daGuyaws, kululuwes katanok-wan.

18 Kadiloka kupiyaves sinap towen kaninavaya mav. Sinap babaw kalbaleb gamag bivag mo biyageg son teitan; tage kal bikanavaya mav mo biyageg won tatonen.

19 Taninuways wouds ya̱kids mamagina nabunatum Yowbad Kululuwan Towen Bwanabwein. Bo iyamiyiseids Yowbad. Mtowen tanuwagan ya̱kids. Yey nag tanuwagan; yakamiy nag tanuwagan; Yowbad tanuwagan. Maysads ya̱kids, Yowbad Natun. Mapuna ikayus wouds ya̱kids. Kadiloka bitakayuses wouds silma̱nin sinap bwein; mo bikalin nuwan Yowbad.

Copyright information for `MYW