2 Peter 1

Kalin nuwag

Yey Saymon Pita, Yeisuw Kelis natouwat yey, takawein anilivan. Milet balel beiw kuvinis yakamiy, nukusimounids waseg Yeisuw mo nukumwa̱saws ma̱wana yakamey. Nitasimounids peinan asteiy asisinap didumwal, daYowbads son Takatinabweids towen Yeisuw Kelis.

Kadiloka bukukwakins Yowbad son daGuyaws Yeisuw va̱gan bisiwyoubumiy singay mo beitaw nuwamiy.

Natawtoun waseg bo ilabeids mo isekeids youd babaw silma̱nin mwamovads o silma̱nin adsinaps kamnat. Bo ilabeids ma̱wan mamagina ikatimlakeids mo takakins mtowen nikatigikeids silma̱nin nakamnat tatonen son ansinap tonen bwanabwein, o youd babaw nikatigik mo itam wasigeis ya̱kids. Youd tasiyas singay bwanabwein, tawtoun, waseg bukulisawes ven watinow bikibik-nen, towen meinoy neim advikeiys kalbaleb waseg. E, bukulisawes ven watinow bikibik-nen va̱gan Yowbad ansinap bwanabwein bukukwawes.

Mapuna kutawtouns peinan tasimounids yakamiy, tage kadiloka misimounid bukwatimweisis wakunuwatan amisinap kamnat, mo kwatimweisis wakunuwatan sinap waninoumiy, mo kwatimweisis wakunuwatan kapatul, mo kwatimweisis wakunuwatan toukum, mo kwatimweisis wakunuwatan tapwa̱loul mounid, mo kwatimweisis wakunuwatan siwa̱youb sidayas wasigeis, mo kwatimweisis wakunuwatan siwa̱youb tatonen.

Kukin amisinap ma̱wan bwanabwein bituwal-wan, mo bukukwakin beibwein daGuyaws Yeisuw Kelis, mo bukuwotets beibwein. Nag beigwey mikawotet, nag.

Tage kukin kal nag ivag ansinap ma̱wan, towen mamagina toukwaw. Nuwanaw mo binumlev Yeisuw inawotet, waseg bo iwid ansinap kweiboug kalbaleb.

10 Mapuna sigwey, kutawtouns bwein, va̱gan bukusesus wanuwan Yowbad nikatigik-yay. Magat amisinap ma̱wan, nag bukukwalouws, nag.

11 Wankuyeim Yowbad mo beitam mounid va̱gan bukusiws wanuwan nakabkaleiwag mtowen takatinabweids, daGuyaws Yeisuw Kelis. Nakaleiwag towen nag beikous.

12 Mapuna tut babaw ivag sivinag bagguyeimiy va̱gan bukuninuways sinap tasiyas. Tage kukwakins-wan, o Yowbad anilivan mounid bo itawtoun wanuwamiy yakamiy.

13 Igaw son mwamovag nases ven watinow kadiloka bagguyeimiy va̱gan bukuninuways mo bukutawtouns.

14 Akakin-wan, igaw tut kayakus waseg mo balisow woug towen, peinan daGuyaws Yeisuw Kelis nikatimlakeig ma̱wan.

15 Bayokon gunawotet waseg va̱gan tutan bakanig ikous, mo bukuninuways youd tasiyas tuta babaw waseg.

Yowbad nikatigik Natun liva̱nen

16 Kweiboug kakatimlakeimiy daGuyaws Yeisuw Kelis inatawtoun, o inakabsunap ven watinow waseg. Amalivan waseg nag kataleiliw tassinaps mwasanin sitaleiliw, nag. Tage wamitem nakakin inatawtoun mo kadibakeimiy ma̱wan.

17 Peinan kweiboug simey Yeisuw, Yowbad inakoy wakunuwatan, Taman Yowbad mo isek naguyaw son nakamnat, o kaligen aygan meinoy neim walba̱lab mititeilin waseg, ilana, “Mtowen Natug bwanabwein, singay ibwein nanoug waseg.”

19 Mapuna kasimounid singay wasigeis tasiyas palopit asilivan, kweiboug nillivans. Tage yakamiy bweina bukunganegs beibwein, peinan ma̱wana wodam mititeilin ked dadub bimteil. Kuninuways oko bikiv lalayis o kubwan beipel mo bimteil kululuwamiy.

20 Kadiloka kukwakins wanamug tasiyas palopit asilivan Bukitab wanuwan. Nag gamag anmwa̱net biban silawun palopit asilivan, nag.

21 Tasiyas palopit nag ilivans ninous tatineis waseg, tage Kululuwan Bwanabwein isek ninous, mo ilivans Yowbad anilivan.

Copyright information for `MYW