2 Thessalonians 3

Kunnitougs Yowbad waseg pinem yakamey

Sigwey, kweitan youd-vak balel. Sivinag bukunitougs Yowbad waseg pinem yakamey, va̱gan kid bakageiguy daGuyaws liva̱nen, tawtoun waseg; livan towen mo bitakayway wasigeis gamag babaw, ma̱wana kweiboug wasigeis yakamiy.

Kunitougs-vak va̱gan Yowbad bikatinabwem wasigeis tasiyas takalbalebs. Peinan mwasinis gamag nag isimounids Yowbad waseg.

Tage daGuyaws Tatoukum bo bikimtuweimiy, bisilbwed kalbaleb wasigeis yakamiy.

O daGuyaws waseg, kakakina yakamiy nukuliganes amalivan, mo bukukwanawes.

DaGuyaws bikatimweis amisinap, nasiwa̱youb tatonen waseg, o Kelis nakapatul waseg, mo bukusiwa̱youbs, o bukwaptules yakamiy.

Awoum bukupiyaves wotet

Sigwey, kadibakeimiy daGuyaws Yeisuw Kelis yagan waseg, kadiloka bukusina̱les budidayas tasiyas tabgumats, peinan tapiyaveins agem tasiyas.

Kukwakins-wan kadiloka bukwabwa̱kuns imaked waseg. Kweiboug simiyas yakamey nitasesus nag kapiyev wotet, nag; tage yam katanok katanok o boug katanok katanok wasigeis nakawwotet-wan, mo naka̱kam kaem tatinem. Mata ge kakamiyev kaemiy.

Bweina bukuvakamumas, tage nag bakalivan kan liva̱nen. Kadiloka bukukinbunikemas tawwotet yakamey mo bukwaylasis ked towen.

10 Kweiboug simiyas yakamey, makaleiwag mamagina, “Kukin kal bipiyev wotet, awoum beikam kan.”

11 Nakaligen gog mwasanin yakamiy tabgumats, mwasanin yakamiy tabugumatuws.

12 DaGuyaws Yeisuw Kelis yagan waseg, kadibakes gamag tasiyas, kalana, “Awoum bukubugumatuws. Bweina bukuwwotets, mo bukukwams kan.”

13 Sigwey yakamiy, awoum ge bikawegweis woumiy wotet bwanabwein waseg.

14 Malet towen neiw kuvinis. Kukin kal bisiplev amalivan, kusina̱les gamag towen mo beivag anmwasin. Awoum kwamliwes gamag towen, peinan buda̱miy. Bweina bukuguyes va̱gan bikakin.

Taneimiy-o

16 DaGuyaws tonen ansinap mamagina niwal. Mtowen bisiwyoubumiy va̱gan beitaw nuwamiy tut babaw, o mikabsis katanok katanok waseg, peinan mtowen simiy bukusesus.

17 Kalin nuwag yakamiy. Namag mulin tatoneig nalel gunaleta babaw nakabiyokous waseg.

Yey Pawl.

18 DaGuyaws Yeisuw Kelis bikalin nuwan wasigeis yakamiy.

Copyright information for `MYW