2 Timothy 1

Nakabsilamaw

Kalin nuwag natug bwanabwein ya̱koum Timotiy.

Yey Pawl balel mulet beiw mo kuvin.

Peinan Yowbad nanon waseg yey ma̱wana, liva̱nen Yeisuw Kelis akokew, va̱gan kid gamag biliganes mo biba̱nes simwamov. Yowbad nakaleiwag ma̱wan.

Tamads Yowbad son daGuyaws Yeisuw Kelis bisiwyoubum, binok nuwes ya̱koum, va̱gan mo beitaw nuwam.

Yeisuw livnen bwanabwein

Yey singaya akkulul guntovek Yowbad wamatan, singaya tut babaw akaninow aygan, ma̱wan-vak timog, tibug. Aninuweim yak tut babaw mo aninitoug peinam, yam katanok katanok, o boug katanok katanok wasigeis.

Anuway misumkwey nukutaneig nukuvlamweig gog. Yey singaya sivinag bakineim vayuwein mo bamwa̱saw avakaein.

Singaya aninuweim peinan nukusimounid bwein Yowbad waseg; ma̱wan-vak tabum kuda̱vin Lowis, wanmugwana isimounid, wankuyeim mo inam Iwnis isimounid, tatounun-vak ya̱koum. Akakin-wan singaya kusimounids bwein.

Mapuna adibakeim awoum bukusigan Yowbad nasiwa̱youb nises waseg yak, nisekeim kweiboug misumkwey yey namag nasen wa̱woum. Kutoukum va̱gan nasiwa̱youb towen-an wanuwam bitawtoun waseg ya̱koum.

Yowbad Kululuwan ivagein waseg ya̱kids nag ivag adpwa̱yats, tage tawtoun, siwa̱youb o kapatul isekeids.

Bweina bukulivan liva̱nen daGuyaws. Awoum bukumsin. Awoum kumsineig yey, peinan wa̱deil nases. Ya̱koum-vak bukugeiguy liva̱nen Kelis mo bigeg a̱bam, tage Yowbad bikimtuweim bukutawtoun mo bukutam waseg.

Yowbad gog nikayuseids silma̱nin nawotet, nag peinan adsinaps bwanabwein, nag; tage peinan nikatigikeids, mo isiwyoubuds Yeisuw Kelis waseg, tut kweibouga tonen.

10 Nasiwa̱youb bo nikaluweg kweiboug, nagein gog mo ikamat, peinan Takatinabweids bo isap, mtowen Yeisuw Kelis, iyakous kanig, mo ikatilow isen mwamovads nag beikous. Liva̱nen Yeisuw inawotet bo ma̱wan.

11 Yowbad bo ikaliwageig, liva̱nen bwanabwein isekeig va̱gan banoy ven babaw wasigeis, bakatimlakay.

12 Mapuna gamag iyagageigs, waseg a̱bag igeg; tage nag ivag agumwasin, nag. Peinan bo asimounid towen waseg, mapuna akakin-wan, aveiyag gunawotet towen nisekeig, bo bimtakavet mtowen, bisesuna ee... tut wanakougwaw nakaleiwag mo bisap ven watinow waseg.

13 Yeisuw Kelis waseg kusimounid, kusiwa̱youb mo bukulivan mounid, ma̱wan yey agulivan nukuligen. Kadiloka kuyous livan towen beibwein.

14 Peinan Yowbad kululuwan wanuwads nises, ansinap bo isekeim amsinap ya̱koum. Livan towen kumtakavet beibwein.

15 Adok kukwakin-wan tasiyas min-Esiy bo ipiyaveigs, sisiyas tasiyas Pigelus son Emogenes.

16 Sivinag Yowbad binok nuwan Onesipol sen inagamags, peinan tut babaw issiwyoubugs-wan, mo ibwein amnag. Nag imsineig yey nases wa̱deil; im ven towen Lom iligen bulagag, im ininineiv ee... mo iba̱neig.

18 Igaw yam towen waseg daGuyaws nakaleiwag bisap, sivinag daGuyaws binok nuwan waseg taw towen. Kukwakin-wan inawotet babaw ven Epesos waseg.

Copyright information for `MYW