Acts 12

Iweiys Yemes, mo Pita isenas wa̱deil

Misumkwey towen King Elod iyousis tayakelesiys mwasanin va̱gan kid biyagages.

Yemes, mtowen Yon tuwan, bo ibob kayon, pulut tanmunum waseg. Mapuna ikalin nuwes tasiyas min-Yudiy. O peinan ikalin nuwes, Elod mo iyous Pita, wik towen waseg min-Yudiy nag beikams bled son yist, bwaboum.

E, iyousis Pita, inawes wa̱deil, Elod siwotet isekes natakanaviys va̱gan bimtakavates Pita, natakanaviy tasiyas babiweis sinawatan teinim tatanok. Wananon idok, igaw beikous sagal towen yagan Kaltuwon, mo bitok Pita bisekes min-Yudiy va̱gan kid biyateles.

Igaw Pita nises wa̱deil, tayakelesiys singay ikalin nuwes, initougs, igilagels Yowbad waseg, va̱gan kid bileb towen Pita.

Gum-liba̱lab ikatinob Pita

Pita nises wa̱deil yam mwasanin ikous, Elod idok yamtan yam mo biya̱tal waseg. E, bo iboug, Pita imasis wanuwein takanaviys, teitan palatan, teitan palatan, immasis, o sen bo iyawanis naman Pita, walitan palatan, walitan palatan; o takanaviys mwasanin itamanaws wakoukwed, imtakavatays deil towen.

Igaw immasis, Yowbad nataka̱yob isap, itamanaw wadadan Pita; mititeilin im imteil nuwan bunatum. Gum-liba̱lab towen im igipit Pita waviligan, iwgun, ilana, “Kutamanaw! Nuwanaw!” Anasen tatonen mo ikabilow wanaman. Mo ilana, “Amuwat kuyawen, musandol kuvaligev.” Ivag ma̱wan, mo ilivan, ilana, “Amukweim kusikam, mo kum kwabkunig yey.”

Nuwanawa inek, ikabkun; ineis; nag isimounid waseg youd towen gum-liba̱lab nivag; idoki mamagina matan isisawla mav.

10 Isaps koukwed kweitan, iwekes takanaviys nisesus; isiws isaps koukwed kwayuwein waseg, iwekes takanaviy nisesus; isiws isaps koukwed avakaein waseg, tanmunum; tatonen ikaliyow, mo isaps wavtakon ven; e inounas wavtakon ven, gum-liba̱lab nuwanaw mo inoun in.

11 Wankuyeim Pita mo ikakin, ilana, “Bo akakin mounid daGuyaws nikayeb gum-liba̱lab towen nikatinabweig Elod waseg, isilbwed gog asisinap waninous tasiyas min-Yudiy takalbalebs.”

12 Nanon idumwal ma̱wan, mo inoun in Meliy wanbunatum, mana̱wen Yon inan, Yon yagan kwayuwein Mak; o bunatum towen waseg, babaw gamag nikatuyouns nimeis innitougs Yowbad waseg.

13 Igipit wakoukwed; nakubukwab nawwotet, yagan Lod, mo in ilivan, “Kal yak kuggipit?” Iligen aygan Pita, sona namwa̱saw isiwlayum; nag ikaliyow koukwed, isawl in wanuwan bunatum, ilana, “Pita bo isap, nitet watoulan.”

15 Ilansa, “Adok nakabala̱wein yak.”

Iw mana̱wen, ilana, “Mounida Pita nises.”

Mo ilansa, “Adok aluwan-nan.”

16 Igaw Pita iggipit, mo ikaliyowes koukwed, ikines Pita; singaya bo isom ninous.

17 Tage Pita naman itamnow, ikatitun asilivan, mo ita̱kud ma̱wan siGuyaw nikatinob wa̱deil, mo ilana, “Kudibakes Yemes sen nagamag,” mo inoun in kweitan ven.

18 Iyam ga̱boug mo ivag mouvit wasigeis takanaviys siyas, peinan nag iba̱nes Pita.

19 Elod siney natakanaviys mo inineivs Pita; inineivs, bo nag. Mapuna iyateles natakanaviys, ikaleiwag mo ikatimates tasiyas. Wankuyeim mo ilisow Yudiy, iwloubus in Sisaliy, nisikey-yay.

Elod ikanig

20 Elod singay ikawkunes min-Ta̱yil sisiy min-Sidon; o tasiyas sivines beimwas, mapuna isineikimas; wanmugwana imwas waseg Bilasit, mtowen nawotet King Elod wanbunatum; wankuyeim asilivan mo ikow isek King Elod va̱gan kid beimwas siney tasiyas. Iva̱ges ma̱wan peinan niggimweles kaeis Elod waniven.

21 Elod ikatigik siyam, ilana, “Yam towen waseg mo kumeis.” E, imeis, mo isap wamtes gamag tasiyas; bo isikam King kweiman, singay maynamnabwein, isin wakaban, mo iliwon wasigeis tasiyas.

22 Illivan ikous, mo iwaks, ilansa, “Nag kweitan gamag aygan ma̱wan; towen mamagina yowbad aygan.”

23 Nuwanaw Yowbad nataka̱yob mo iweiy King towen, peinan iba̱kew Yowbad yakawanan; ikasimwa̱mwat nuwan, mo ikanig.

24 Wankuyeim babaw gamag mo iliganes Yowbad aygan, vena babaw wasigeis.

25 O peinan siwotet bo ikous, Ba̱nabas son Soul mo ilisawes Yelusalem, sisiy itokes teitan gamag yagan Yon, yagan kwayuwein Mak.

Copyright information for `MYW