Acts 3

Takagayal iva̱ges mo ibwein

Kweitan yam, ka̱las bo itageg, tutan nitoug Yowbad wanbunatum, Pita son Yon mo ineis, nitoug silma̱nin.

Teitan taw igaw kweiboug inan nikop yay igayal, bo ivakaein tage angayal isigeg-wan; o yam katanok katanok issin Yowbad nabunatum wawkwedan, koukwed towen yagan Kamnabwein; e, tut babaw issin towen, ininitoug money wasigeis gamag tasiyas nisowsiws wanuwan. O siney bikokews taw towen biwayes, Koukwed Kamnabwein waseg bisin, yam babaw mo bininitoug; o taw towen ikines Pita son Yon kakita bo beisiws wakoukwed, mo initoug money wasigeis.

Pita son Yon ikikines taw towen; Pita mo ilivan, ilana, “Kukinem yakamey.”

Taw towen mo igintoves tasiyas asteiy; idoki bisiwyoubus kid.

Nag gog, Pita ilana, “Ta-ivag money waseg yey. Kweitan youd nises waseg yey, bo basekeim. Gum-Nasalet yagan Yeisuw Kelis, mtowen yagan waseg adibakeim kunoun.”

Pita iyous naman wanaka̱tay, mo itamnow. Nuwanaw idamoms kaken, o inatub meivek-wan idamoms; kaspepel, itamanaw, mo inoun; o siney tasiyas asteiy mo isiws Yowbad wanbunatum, inoun palatan palatan, ipilapel, singay iya̱kawn Yowbad waseg.

Gamag babaw bo ikines taw towen ininoun, o iliganes anaya̱kawn Yowbad waseg; iwtusis tantougein money towen kweiboug nises Yowbad nabunatum watoulan, Koukwed Kamnabwein waseg. Meiveka tasiyas bo isom ninous, mapuna ikalin nuwes, peinan ikines takagayal towen bo ibwein.

Pita igeiguy

11 Taw towen siney Pita, Yon nisesus. Bo isom ninous gamag babaw, isisawls, imimeis kwa̱now kweitan yagan Solomon nakwa̱now.

12 Pita ikin, ikatimop asilivan, ilana, “Min-Yisleil yakamiy, aveiyag wawun isom ninoumiy, o wawun kukinemas yakamey. Ta-ivag matawtoun o amasinap tatinem va̱gan bakavag beibwein takagayal towen, nag.

13 “Towen Yowbad nawotet, mtowen Ebelam naYowbad, o Aysak naYowbad, o Yekob naYowbad, o tamumwey babaw siYowbad; mtowen nivag natun Yeisuw mo iguyaw. E, yakamiy nukupiyaves taw towen, nukusilkodes wamatan Paylat; o Paylat gog sivinan bikaluweg towen Yeisuw bilik bisap.

14 “O yakamiy gog nukupiyaves taw towen bwanabwein, tadidumwal, o nukwavtagis yagan tawayin gamag, va̱gan Paylat bikaluweg taw towen bilik bisap.

15 “Nukuweiys abmwamov tanuwagan towen, o Yowbad gog bo ivag ikit kanig waseg, bo kakin yakamey.

16 “Waseg natawtoun mtowen yagan Yeisuw, taw towen bo ibwein. O kweiboug nukukines angayal taw towen, o nagein-vak kukines bo idamoms kaken, peinan bo isimounid waseg Yeisuw. E, isimounid waseg Yeisuw, mo isek natawtoun wamitamiy babaw yakamiy.

17 “Sigwey, nagein akakin nukuwteles ma̱wan peinan tatagouwaws yakamiy, o mituwa̱veks-vak ma̱wan.

18 “O Yowbad gog ikakin gamag mwasanin biyagages naKelis, o kweiboug ikatimlakes napalopit ma̱wan; e, mo ilivans ma̱wan tababaw palopit tasiyas; o ma̱wan asilivan kweiboug, ma̱wana tut towen bo ikamat.

19 “Kadiloka kuva̱ges ninoumiy bikanavin, kulavewas amisinap kalbaleb, va̱gan Yowbad biwid, binumlev. DaGuyaws mo bivag beibwein amnamiy. Peinan bo ikaleiwag Yeisuw Kelis nawotet va̱gan bilabeimiy. Magat bikanavin ninoumiy, Yowbad mo bikayeb mtowen biwekeimiy.

21 “Tut towen Kelis bo nein walba̱lab, kadiloka bisesuna ee... igaw anatut bikatilow youd babaw mo beiyum beim, ma̱wan pwa̱mug-o nilivnek Yowbad wasigeis napalopits tatonen.

22 “Moses gog anilivan ma̱wana,

‘Igaw palopit teitan daGuyaws Yowbad mo bisek nawotet, mtowen buda̱miy teitan, palopit ma̱wana yey;
kadiloka kuliganes anilivan babaw wasigeis yakamiy.
Kavel tapiyavein anilivan palopit towen, bo bagidem taw towen, bilisaweimiy, binoun.’
24 “E palopit babaw kweiboug nilivnakes youd towen, asilivan katanok-wan, tage tut towen bo nikamat. Wanmugwana Samwel anilivan ma̱wan, mo tasiyas wankuyeim asilivan bo ma̱wan.

25 “O ya̱kids tut towen mamagin tasiyas palopit tibsiyas ya̱kids o Yowbad nakaleiwag tamumwey wasigeis bo ikaluweg silma̱nin ya̱kids; anilivan Ebelam waseg, ilana,

‘Igaw ven babaw gimgilis wadaban pwepway mo bimwa̱saws tabum waseg.’
26 “Wanamug Yowbad bo isekeimiy natouwat pinamiy yakamiy, nikayeb mtowen niwekeimiy, va̱gan bukulavewas amisinap kalbaleb, mo bukumwa̱saws; wanmugwana yakamiy min-Yudiy, tage vena babaw wankuyeim mo bimwa̱saws.”

Copyright information for `MYW