Acts 8

Soul iyagages tayakelesiys

Misumkwey towen gamag mwasanin bo isilamaws kid biyagages tayakelesiys Yelusalem waseg; e, bo iyagagesa singay. Mapuna bo igayays ineis Yudiy o Samaliy, o vena babaw wasigeis. Misinaka takaweins liva̱nen Yeisuw nisesus Yelusalem, tasiyas sinawatan teiy.

Mwasanin gamag bwana̱bweins bo idibwanis takanig towen Sitiben, iva̱lams avakaein silma̱nin.

Tage Soul bo iyagages tayakelesiys, inineves tayakelesiys bunatum katanok katanok wasigeis, iyousis tawaw o vinay, itokes, inawes wa̱deil.

Liva̱nen Yeisuw ikawes isekes min-Samaliy

O tayakelesiys tasiyas nigayays bo inawes liva̱nen Yeisuw vena babaw wasigeis.

Pilip in min-Samaliy wasiven kweitan wunovek waseg, isekes liva̱nen Mesay Kelis.

O min-Samaliy inganegs anilivan, ikines nawotet tawtoun, ninous katanok-wan va̱gan biliganes anilivan.

Pilip nawotet tawtoun; o tasiyas takayyeiluws ivag, mo iwaks avakaein, yeiluw mo ilisawes gamag tasiyas; o taguya̱gweys o takagayals ivag, mo ibweins.

Mapuna misikena gimgilis bo imwa̱saws avakaein.

Tamgameg yagan Saymon nises ven towen; min-Samaliy nikines nawotet, bo isom ninous. Mtowen Saymon bo ilivan, ilana, “Yey tatawtoun yey.” Bo iliganes anilivan, tasiyas guyawaw, o sisiyas toul, gamaga babaw, mo ilansa, “Adok natawtouna tonen, mamagina Yowbad natawtoun.” E, nagwa̱diven inganegs tamgameg towen, nameg nikines bo isom ninous.

12 Tage gamag babaw mo isimounids Pilip anilivan waseg, Yowbad nakaleiwag liva̱nen son Yeisuw yagan liva̱nen, ibapta̱yses tawaw o vinay.

13 Towen Saymon mo isimounid, ibaptays; ibaptays ikous, isesus son Pilip, ikikin nawotet tawtoun o naman mulin, bo isom nanon.

14 Takaweins liva̱nen Yeisuw igaw nisesus Yelusalem, iliganes min-Samaliy bo itams Yowbad anilivan waseg, mapuna ikayabes Pita son Yon bikines.

15 Pita son Yon isaps, mo initougs silma̱nin Yowbad Kululuwan Towen Bwanabwein binekes kid gamag tasiyas; peinan kweiboug nag inekes, deisa nibapta̱yses yagan Guyaw Yeisuw waseg.

17 Initougs ikous, mo isenas nimes wawous gamag tasiyas, Yowbad Kululuwan mo inekes.

18 Towen Saymon ikin takaweins liva̱nen Yeisuw siwotet ma̱wan, nisenas nimes gamag wawous, Kululuwan Yowbad mo inekes; towen Saymon mo isekes money, ilana, “Money towen kukow, maysan sinap towen. Sivinag sinap towen, namag kid basen gamag wawous va̱gan Kululuwan Yowbad binekes.”

20 Pita mo ikawtun taw towen, ilana, “Soum-wan mumoney kov waseg bigabum wadiginasim, peinan kudok kid bukugimwel Yowbad nasiwa̱youb. Ya̱koum tobwag gamag. Nag kweitan muwotet nises wasigeis yakamey. Yak nanoum bo ikaydodog wamatan Yowbad. Kadiloka kulavew amsinap towen kalbaleb; kunitoug Yowbad waseg. Adok mo biwid amsinap, peinan akakin-wan amkameiliw son amsinap kalbaleb bo ika̱lawt nanoum waseg.”

24 Saymon ikatimop anilivan, ilana, “Kunitougs Yowbad waseg va̱gan kid kalbaleb towen nag bimekeig yey.”

25 Pita son Yon asilivan kamnat waseg mo idibakes gamags liva̱nen siGuyaw Yeisuw, mo iyums ineis Yelusalem; o igawa wa̱ked inounas, livan towen bwanabwein mo isekes min-Samiliy, vena babaw wasigeis.

Pilip inek gum-Idiyopiy teitan

26 Yowbad ikayeb gum-liba̱leb teitan inek Pilip, ilana, “Kutamanaw kunoun kun wa̱yals, kunoy ked makadewen meinoy neim Yelusalem nein Ges.” Ked towen waseg ta-ivag ven; maka̱wan.

27 Itamanaw, inoun, mo inek gum-Idiyopiy teitan, mtowen yunak, towen tamtakavatein Kandas namoney, mana̱wen vin min-Idiyopiy sikwin. E, yunak towen nitapwa̱loul Yelusalem waseg mo iyum in waniven. Hos ibiteilis inawag, isin wanuwan ivnivin Bukitab, palopit Isaya anilivan.

29 Yowbad Kululuwan mo idibek Pilip, ilana, “Kun, kunek taw towen wanawag nises.”

30 Pilip isawl, inek, iligen ivnivin anilivan palopit towen Isaya. Pilip ikatigan ilana, “Tabta kukwakin silawun livan towen?”

31 Iwa̱ge towen ilana, “Ta-ma̱wan bavkek bakakin. Magat teitan gamag bikatimlakeig, bo bwein.” Mo ilana, “Kumwen kum, kusin wa̱wag;” mo imwen, isin wadadan taw towen.

32 Bukitab wanuwan bo ivin lelel-nen mamagin,

“Ma̱wana la̱miy gamag beiweiys, ta-ivag aygan;
o ma̱wana bibwabwes wunuwunun sip, nag beiwey, bo bikka̱pay-wan.
O gamag towen ma̱wan, nag bilivan.
Asilivan tasiyas yaweid, inaya̱tal waseg.
Anmwasin; ta-ma̱wan.
Igaw ta-kal bilivan liva̱nen angamag taw towen, peinan bo ikanig.”
34 Yunak mo ikatugwan Pilip waseg, ilana, “Liva̱nen kavel? Palopit towen liva̱nen? O teitan gamag liva̱nen?”

35 Pilip isilamaw livan towen Bukitab wanuwan, mo ikatimlek liva̱nen Yeisuw, livan towen bwanabwein.

36 Igawa ininounas wa̱ked, yunak inganeg livan towen, wankuyeim isaps wayvagam; mo yunak ilivan, ilana, “Kukin yevagam towen. Tab kadilok bukubapta̱yseig yey.”

38 E, idibakes nagamag bisewas wag wadadan ked, mo ibus tasiyas asteiy, Pilip son yunak, ineis wayvagam, ibaptays son.

39 Ibaptays ikous, iga̱lags, Yowbad Kululuwan mo ikow Pilip, inow. Yunak na-ikin Pilip; anmwa̱neta ises. Mo inoun in wa̱ked, singay imwa̱saw.

40 Wankuyeim mwasanin iba̱nes Pilip nises Asot. Inoun in ita̱vin vena babaw, illivan liva̱nen Yeisuw gamaga babaw wasigeis, wankuyeim in isap Sisaliy.

Copyright information for `MYW