Acts 9

Soul ikanavin nanon

(Wotet 22:6-16; 26:12-18)

Mtowen Soul singay ikawkunes Yeisuw nagamags, sivinan kid bikatimates. Mapuna inek tanuwgwes lun sitovek avakaein, ilana, “Tab kadilok kulel let, va̱gan bakow banow basekes tanuwgwes bunsiyas sinagog ven Damasik waseg; igaw tanuwgwes tapwa̱loul tasiyas bivinis, mo beitams waseg gunawotet va̱gan banineiv kid kalisiy inoyes Yeisuw inaked, ked towen kalbaleb. Magat vinay o tawaws, mo bayousis gamag tasiyas, bayawen nimes, mo batokes, bameyes Yelusalem.”

Mtowen itam, isek nalet, ikow; siney nagamag mo ineis ee... kadilakusana Damasik, mititeilin avakaein imek Soul, ikaligwen matan. Mititeilin towen ma̱wana kavikawn meinoy neim walba̱lab.

Ikalouw wapwepway, iligen aygan teitan, ilana, “Soul, Soul, aveiyag wawun kuybilebeig yey?”

Iwa̱ge Soul, ilana, “O guyaw, kavel yak?”

Ilana, “Yey Yeisuw, nukuybilebeig. Tage kutamanaw, kun ven towen wamatam, teitan gamag mo bilivnek muwotet va̱gan bukukwakin.”

Gamag tasiyas sisiy Soul ineis wa̱ked, itamanaws, bo isom ninous, peinan iliganes aygan; tage ta-kweitan gamag ikines.

Soul itamanaw, bo ikiplal matan, tage nag ikin, magina bo ikaw matan; mapuna iyousis naman mo itokes inawes ven towen Damasik.

Yam kweitoun isesuna-wan, matan nag ibwein, ta-ikam, ta-imoum, isesuna-wan.

10 Yeisuw nagamag teitan nises ven Damasik, yagan Ananiyas; anmikon waseg naguyaw idibek Ananiyas, ilana, “Ananiyas.”

Ilana, “Yey-ay.”

11 Naguyaw mo ilivan, ilana, “Kutamanaw kun kunoy ked towen yagan Didumwal, e, kun Yud wanbunatum, kunev gamag teitan gum-Talisus yagan Soul, peinan bo intougig. E, igaw ininitoug, ikin taw teitan yagan Ananiyas isap, isen naman wa̱won, va̱gan matan beibwein.”

13 Ananiyas ikatimop aygan, ilana, “O Guyaw, gamag babaw ilansa, ‘Taw towen singay takalbaleb, singaya iyagages mugwamag Yelusalem waseg;’ o tut towen ikow inalet tanuwgwes lun sitovek avakaein silma̱nin kid biyawanim yakamey takavtagin yagam yak.”

15 Naguyaw mo idibek, ilana, “Kun kuwtel agulivan ma̱wan, peinan bo akaluweg nawotet taw towen silma̱nin bikow yagag vena babaw gimgilis wasigeis, o siguyawaw wamtes, o min-Yisleil wamtes. Igaw bakatimlek taw towen youda babaw kalbaleb igaw mo bilouvat peinan yagag yey bikow.”

17 Ananiyas iligen, inoun, isiw wabunatum towen naGuyaw nikatigik, isen naman wa̱won Soul, ilana, “Bwadag ya̱koum Soul, daGuyaws nikayabeig nam, silma̱nin matam bavag beibwein, o silma̱nin Yowbad Kululuwan Towen Bwanabwein biwekeim. DaGuyaws towen Yeisuw niwekeim yak wa̱ked.”

18 Nuwanaw mo ilatimatet matan, mo ikin bwein. Itamanaw mo ibaptays.

19 Kan ikam, amnan mo ibwein.

Soul igeiguy Damasik waseg

Soul siney Yeisuw nagamag ven Damasik waseg nisesus mwasanin yam waseg.

20 Tage nuwanaw iggeiguy sinagoga babaw wasigeis, ilana, “Mounid Yowbad natun, mtowen Yeisuw.”

21 Taliganeins anilivan towen bo isunasun ninous, ilivans, “Tabta taw towen tayagagein Yeisuw nagamag Yelusalem waseg, mo im wadavanuys silma̱nin biyousis tayakelesiys, mo binawes kid tanuwgwes lun situwa̱vek wasigeis?”

22 Tage Soul mo itawtouna singay, anilivan tawtoun waseg mo ikatimlakes min-Yudiy tasiyas misikesa Damasik waseg, va̱gan kid bikakinsa Yeisuw mounida Kelis; e, tasiyas bo ibol ninous, ta-ma̱wan bikatimapus aygan.

Min-Yudiy sivines biyousis Soul

23 Yam mwasanin ikous, min-Yudiy illivans sisiyas, idokes ama̱wan bikatimates Soul; tage teitan gamag idibek Soul mo ikakin ninous. Tasiyas ikayyamats wawkwedan boul yam waseg o boug waseg; ikayyamats kid Soul bisap mo beiweiys. Ven towen nibasis boul watoulan. Gamag nitatos wadunan ked, ikayyamats.

25 Mapuna boug waseg inavamul idagis Soul in wanuwan kaynad avakaein, ikaygwagwes ee... in iton wapwepway watoulan boul, mo itamanaw inoun.

Soul in Yelusalem

26 Soul inoun in Yelusalem, sivinan kid binekes Yeisuw nagamag; tage tasiyas iwenes, ilansa, “Adok mtowen Soul nag ikanavin nanon.”

27 Tage mtowen Ba̱nabas mo itok, inekes tasiyas takaweins liva̱nen Yeisuw, ilana, “DaGuyaws bo inek taw towen wa̱ked, ikin, ilivans son, wankuyeim ven Damasik waseg mo itawtoun, igeiguy Yeisuw yagan waseg.”

28 Min-Yelusalem tasiyas iliganes aygan towen, mo Soul inekes; siney tasiyas nisesus siwotet babaw waseg; e, mo itawtoun, yagan Yeisuw waseg, illivan.

29 E, illivans wasigeis min-Yudiy tasiyas takaga-Gilis, mo ikamnimans waseg, mapuna iyokons kid bikatimates.

30 Tage Yeisuw nagamag ikakinsa ninous bikatimates Soul; mapuna itokes Soul ineis Sisaliy, wankuyeim mo ikayabes in Talisus.

31 Tage tayakelesiys babaw nisesusa bwein, wawnuwan Yudiy, o Galiliy, o Samaliy. Nag aveiyag ilivatus; bwein-wan, ikatimweisisa babaws, itawtouns, ivna̱ses Yowbad; peinan Kululuwan Towen Bwanabwein bo ilabes, imlavags singaya babaws.

Pita ivag Ayney mo ibwein

32 Pita ita̱vin inoun vena babaw wasigeis, mo iwloubus inekes Yowbad nagamag mwasanin nisesus ven yagan Lid.

33 Ven towen mo iban taguya̱gwey teitan yagan Ayney, bweilim kweinim kweitoun immasis wakaban, ta-ma̱wan binoun.

34 Pita idibek, ilana, “Ayney, Yeisuw Kelis bo iva̱geim kid bukubwein. Kutamanaw, kukow musag.” Iligen, nuwanaw mo itamanaw.

35 Mina-Lid o min-Selon tabebaws-wan ikines, mo isivins, Yowbad nakaleiwag ikawes.

Dokas ikanig, mo imov vayuwein

36 Ven Yop waseg, Yeisuw nagamag na̱tan yagan Tabit, pinyuwein yagan Dokas; vin mana̱wen nawotet bwanabwein, singaya isiwyoubus tasiyas tasimavs.

37 Misumkwey towen ikatoun avakaein, mo ikanig. Iwidis won, isewas bunatum kasiyuwein wanuwan; o peinan Yop kadilakusana Lid, o peinan Yeisuw nagamag niliganes Pita nises ven towen Lid, mo ikayabes tawaw asteiy; inounas, inekes Pita, ilansa, “Nuwanaw kum, taneis Yop.”

39 Pita iligen, itamanaw, siney tasiyas mo ineis. Pita isap, im; itokes Pita inawes bunatum towen wanakaew nakanig nimsik-yay. Nakubukwabs babaws-wan itomos wadadan Pita ivva̱lams, ikatimlakes asikweima babaw, ilansa, “Kukin amakweim. Dokas, igaw son mwamovan nises, niba̱lal maynsiyas amakweim magayana.”

40 Pita ikayabes, ineis watoulan, ibasen kitatun, initoug Yowbad waseg, mo itouvin, inek nakanig, ilana, “Tabit, kukit.” Ilivan ikous, mo ikiplal matan, ikin Pita, ikit.

41 Pita iyous wanaman, mo itamnow; idawes tayakelesiys sisiyas nakubukwabs tasiyas, mo imeis, ikines Dokas bo imov.

42 Butun wotet towen in vena babaw Yop walasin, kalamwey babaw gamag mo isimounids Yowbad waseg.

43 Pita nisesuna Yop, yam babaw waseg; mimsikey Saymon wanbunatum, mtowen naba̱lal kaleivin man.

Copyright information for `MYW